తూర్పుగోదావరి జిల్లా, తాళ్లపూడి: (పున్నమి ప్రతినిధి) దశాబ్దాలుగా తాళ్లపూడి–రాగాలపల్లి గ్రామాల మధ్య రాకపోకలకు ఆధారంగా ఉన్న కోవ్వాడ కాజ్వే ప్రస్తుతం పూర్తిగా నీటమునిగింది. దీంతో ఈ మార్గాన్ని ఉపయోగించే ఆరు గ్రామాల ప్రజలు తీవ్ర ఇబ్బందులు ఎదుర్కొంటున్నారు.
గత రెండు రోజులుగా కురుస్తున్న భారీ వర్షాల కారణంగా కాజ్వేపైకి పెద్ద ఎత్తున వరద నీరు చేరింది. దీంతో రాకపోకలకు తీవ్ర అంతరాయం ఏర్పడింది. కాజ్వే పూర్తిగా నీటిలో మునిగిపోవడంతో వాహనదారులు, పాదచారులు ఈ మార్గం గుండా వెళ్లేందుకు ఇబ్బందులు పడుతున్నారు.
రైతులకు అత్యంత ఉపయోగకరంగా ఉన్న ఈ రోడ్డు నీటితో నిండిపోవడంతో తమ పొలాలకు వెళ్లేందుకు కూడా రైతులు ఇబ్బందులు ఎదుర్కొంటున్నారు. ముఖ్యంగా వ్యవసాయ పనులు కొనసాగుతున్న సమయంలో రాకపోకలు నిలిచిపోవడం వల్ల రైతులు ఆందోళన చెందుతున్నారు.
ప్రస్తుతం కాజ్వే పరిస్థితిని దృష్టిలో ఉంచుకుని అధికారులు తగిన చర్యలు తీసుకోవాలని స్థానికులు కోరుతున్నారు. వరద నీరు తగ్గే వరకు ప్రజలు అప్రమత్తంగా ఉండాలని, ప్రమాదకర పరిస్థితుల్లో కాజ్వేను దాటేందుకు ప్రయత్నించవద్దని సూచిస్తున్నారు.
