సెప్టెంబర్ 13( పున్నమి ప్రతినిధి ) కొవ్వూరు కొవ్వూరు బస్టాండ్లోని అంబేద్కర్ పార్కు నిర్వహణ లేక నిరుపయోగంగా మారిందని స్థానికులు ఆవేదన వ్యక్తం చేస్తున్నారు. పట్టణ ప్రజలకు ఆహ్లాదాన్ని అందించడంతో పాటు ఉదయం, సాయంత్రం వేళల్లో నడకకు, విశ్రాంతికి ఉపయోగపడాల్సిన పార్కు ప్రస్తుతం సరైన నిర్వహణ లేక అధ్వానంగా తయారైందని వారు పేర్కొంటున్నారు.
పార్కులో ఉదయం, సాయంత్రం వేళల్లో సీనియర్ సిటిజన్లు, చిన్నారులు, స్థానికులు సేదతీరేందుకు పెద్ద సంఖ్యలో వచ్చేవారని స్థానికులు తెలిపారు. అయితే ప్రస్తుతం పార్కు పరిసరాల్లో పూల మొక్కలు, గడ్డి విపరీతంగా పెరిగిపోవడంతో పార్కు ఆవరణ మొత్తం అస్తవ్యస్తంగా మారిందని చెబుతున్నారు. మొక్కలు, గడ్డి పెరిగి నడకకు కూడా ఇబ్బందికరంగా మారడంతో పార్కును పూర్తిస్థాయిలో వినియోగించుకోలేకపోతున్నామని వాపోతున్నారు.
పార్కులో ఎప్పటికప్పుడు గడ్డి, పిచ్చిమొక్కలను తొలగించడం, మొక్కలను క్రమబద్ధీకరించడం, పరిసరాలను పరిశుభ్రంగా ఉంచడం వంటి నిర్వహణ పనులు చేపట్టాల్సి ఉందని స్థానికులు కోరుతున్నారు. ప్రజలకు ఉపయోగపడేలా ఏర్పాటు చేసిన పార్కు నిర్వహణ లోపంతో అడవిని తలపించే విధంగా మారడం పట్ల వారు అసంతృప్తి వ్యక్తం చేస్తున్నారు.
ముఖ్యంగా వృద్ధులు ఉదయం, సాయంత్రం వేళల్లో నడక కోసం పార్కును ఆశ్రయిస్తుంటారని, చిన్నారులు కూడా ఆహ్లాదకర వాతావరణంలో కొంత సమయం గడిపేందుకు పార్కుకు వస్తుంటారని తెలిపారు. ప్రస్తుతం పార్కు పరిస్థితి కారణంగా వారు ఇబ్బందులు ఎదుర్కొంటున్నారని పేర్కొన్నారు.
పార్కును అభివృద్ధి చేయాలని విజ్ఞప్తి
అంబేద్కర్ పార్కును కొవ్వూరు మున్సిపల్ అధికారులు ప్రత్యేకంగా పర్యవేక్షించి పిచ్చిమొక్కలు, గడ్డిని తొలగించి, పరిసరాలను శుభ్రం చేయడంతో పాటు మొక్కలను క్రమబద్ధీకరించాలని స్థానికులు కోరుతున్నారు. అవసరమైన నిర్వహణ పనులను క్రమం తప్పకుండా చేపట్టి పార్కును ప్రజలకు అందుబాటులోకి తీసుకురావాలని విజ్ఞప్తి చేస్తున్నారు.
ప్రజలకు ఉపయోగపడేలా నిర్మించిన పార్కులు నిర్వహణ లోపంతో నిరుపయోగంగా మారకుండా అధికారులు చర్యలు తీసుకోవాలని, పార్కు ఆహ్లాదకరంగా ఉండేలా అవసరమైన సౌకర్యాలను మెరుగుపరచాలని స్థానికులు కోరుతున్నారు.
