పారిశ్రామిక ఉత్పత్తి 5.1 శాతంతో ఐదు నెలల గరిష్ఠానికి చేరింది

దేశంలో పారిశ్రామిక ఉత్పత్తి (Industrial Output) మే నెలలో 5.1 శాతం వృద్ధిని నమోదు చేసి గత ఐదు నెలల్లో అత్యధిక స్థాయికి చేరుకుంది. తయారీ రంగం, విద్యుత్ ఉత్పత్తి, మూలధన వస్తువులు (Capital Goods), వినియోగ వస్తువుల ఉత్పత్తిలో నమోదైన మెరుగైన వృద్ధి ఇందుకు ప్రధాన కారణమైంది. మరోవైపు గనులు, ఖనిజాల తవ్వకాల రంగం మాత్రం వరుసగా ఐదో నెల కూడా ప్రతికూల వృద్ధినే నమోదు చేసింది. గణాంకాల మంత్రిత్వ శాఖ పారిశ్రామిక ఉత్పత్తి సూచీ (IIP)లో కొన్ని మార్పులు చేసి, ఇకపై టోకు ధరల సూచీ (WPI) స్థానంలో ఉత్పత్తిదారుల ధరల సూచీ (PPI) ఆధారంగా లెక్కలు ప్రకటించనున్నట్లు తెలిపింది. ఈ మార్పుల వల్ల తయారీ రంగ గణాంకాల్లో సవరణలు చోటుచేసుకునే అవకాశం ఉందని ఆర్థిక నిపుణులు పేర్కొంటున్నారు. వినియోగ వస్తువుల ఉత్పత్తి పెరగడం దేశీయ డిమాండ్ బలపడుతున్న సంకేతంగా భావిస్తున్నారు.