ఆచూకీ తెలిస్తే చెప్పగలరు..! ప్రజలను ఉసిగొల్పి భూములు కాజేయాలని చూసిన నాయకులు ఎక్కడ..?

ఆచూకీ తెలిస్తే చెప్పగలరు..!
ప్రజలను ఉసిగొల్పి భూములు కాజేయాలని చూసిన నాయకులు ఎక్కడ..?

ఫార్మా సిటీ బాధిత రైతుల ప్రశ్నలకు సమాధానం చెప్పాల్సిన సమయం రాలేదా..?

పున్నమి న్యూస్
30మే 2026
తెలంగాణ ఇంచార్జి

హైదరాబాద్ పరిసర ప్రాంతాల్లో ఫార్మా సిటీ పేరుతో వేలాది ఎకరాల భూములను స్వాధీనం చేసుకునే ప్రయత్నాలు జరిగిన సమయంలో రైతులకు అండగా ఉంటామని చెప్పిన పలువురు రాజకీయ నాయకులు, ఉద్యమకారులు ఇప్పుడు కనిపించడం లేదని బాధిత గ్రామాల ప్రజలు ఆవేదన వ్యక్తం చేస్తున్నారు. రైతుల కన్నీళ్లు, పేదల ఆవేదన, భూములు కోల్పోయిన కుటుంబాల భవిష్యత్తు గురించి మాట్లాడిన వారు ఇప్పుడు మౌనం పాటించడం అనుమానాలకు తావిస్తోంది.
యాచారం మండలం సహా పరిసర గ్రామాల్లో ఫార్మా సిటీకి వ్యతిరేకంగా పెద్ద ఎత్తున ఉద్యమాలు జరిగిన విషయం తెలిసిందే. అప్పట్లో ప్రజల మధ్యకు వచ్చి “భూములు కాపాడతాం”, “రైతుల పక్షాన నిలుస్తాం” అంటూ హామీలు ఇచ్చిన నాయకులు, ప్రస్తుతం ప్రజలు ఎదుర్కొంటున్న సమస్యలపై స్పందించకపోవడం తీవ్ర విమర్శలకు దారితీస్తోంది. ఎన్నికల సమయంలో మాత్రమే ప్రజలు గుర్తొస్తారా..? ఉద్యమాల సమయంలో ఫోటోలు దిగిన నాయకులు ఇప్పుడు ఎక్కడ ఉన్నారు..? అని గ్రామస్తులు ప్రశ్నిస్తున్నారు.
భూములు కోల్పోయిన కుటుంబాలు ఇంకా పరిహారం కోసం కార్యాలయాల చుట్టూ తిరుగుతుండగా, కొందరు రైతులు అప్పుల బారిన పడి తీవ్ర ఇబ్బందులు పడుతున్నారని స్థానికులు చెబుతున్నారు. గ్రామాల్లో యువతకు ఉపాధి లేక, రైతులకు భరోసా లేక పరిస్థితి దయనీయంగా మారిందని అంటున్నారు. ఉద్యమాల సమయంలో ప్రజల ముందు పెద్ద పెద్ద మాటలు చెప్పిన నాయకులు ఇప్పుడు బాధితులను పరామర్శించడానికి కూడా ముందుకు రావడం లేదని విమర్శిస్తున్నారు.
ప్రజల పోరాటాలను రాజకీయ లాభాల కోసం ఉపయోగించుకుని, తర్వాత ప్రజలను వదిలేసే ధోరణి సరికాదని పలువురు సామాజిక కార్యకర్తలు అభిప్రాయపడుతున్నారు. బాధిత రైతులకు న్యాయం జరిగే వరకు పోరాటం కొనసాగుతుందని గ్రామస్తులు హెచ్చరిస్తున్నారు. “ప్రజలతో ఉంటాం” అన్న నాయకులు నిజంగా ప్రజల పక్షాన ఉంటే వెంటనే బయటకు వచ్చి తమ వైఖరి స్పష్టం చేయాలని డిమాండ్ చేస్తున్నారు.
“ఉద్యమాల సమయంలో ముందు వరుసలో నిలిచిన వారు…
ప్రజల కన్నీళ్లు చూసే సమయానికి ఎందుకు కనిపించడం లేదు..?”