ఉత్సాహంగా ఎమ్మెల్యేల క్రికెట్ టోర్నీ.. ఎమ్మెల్యే సుధీర్ రెడ్డిని కలిసిన యువనేతలు

శ్రీకాళహస్తి పున్నమి న్యూస్, ఫిబ్రవరి 26: విజయవాడ వేదికగా జరుగుతున్న శాసనసభ మరియు శాసనమండలి సభ్యుల క్రికెట్ పోటీలు అత్యంత ఉత్సాహభరితంగా సాగుతున్నాయి. ఈ పోటీలలో భాగంగా శ్రీకాళహస్తి శాసనసభ్యులు బొజ్జల సుధీర్ రెడ్డి చురుగ్గా పాల్గొని తన క్రీడా ప్రతిభను చాటుకుంటున్నారు. రాజకీయ కార్యకలాపాలతో బిజీగా ఉండే ప్రజాప్రతినిధులు, ఒత్తిడిని అధిగమించి క్రీడల్లో పాల్గొనడం గమనార్హం. ఈ క్రీడా వేడుకల్లో పాల్గొంటున్న ఎమ్మెల్యే బొజ్జల సుధీర్ రెడ్డిని శ్రీకాళహస్తి నియోజకవర్గ తెలుగుదేశం పార్టీ నేతలు మర్యాదపూర్వకంగా కలిసి అభినందనలు తెలిపారు. క్రీడా మైదానంలో తమ నాయకుడిని కలవడం, ఆయన ఆడుతున్న తీరును ప్రత్యక్షంగా చూడటం పట్ల వారు హర్షం వ్యక్తం చేశారు. ఈ సందర్భంగా ఎమ్మెల్యే బొజ్జల సుధీర్ రెడ్డి మాట్లాడుతూ.. నిరంతరం ప్రజా సమస్యల పరిష్కారంలో నిమగ్నమయ్యే తమకు, ఇలాంటి క్రీడలు శారీరక దృఢత్వంతో పాటు మానసిక ఉల్లాసాన్ని ఇస్తాయని తోటి ప్రజాప్రతినిధులతో కలిసి ఆడుతుండటం వల్ల స్నేహపూర్వక వాతావరణం ఏర్పడుతుందని ఆయన పేర్కొన్నారు. ఈ కార్యక్రమంలో టీడీపీ మీడియా ఇంచార్జ్ నాగమల్లి దుర్గాప్రసాద్, నాయకులు కన్నలి ప్రతాపరెడ్డితో పాటు పలువురు పార్టీ ముఖ్య నాయకులు, కార్యకర్తలు పాల్గొని ఎమ్మెల్యేకు శుభాకాంక్షలు తెలియజేస్తూ, ఆయన జట్టు విజయం సాధించాలని ఆకాంక్షించారు.