Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: Breking news

చిత్తూరు

బురుజుపల్లిలో ఘనంగా శ్రీ అయ్యప్ప స్వామి కన్యపూజ.. భారీ అన్నదానం (ఆధ్యాత్మిక శోభతో విలసిల్లిన గ్రామం )

నెల్లిమంద (సోమల), అక్టోబర్ 14 (భాను ప్రసాద్ నాయుడు, పున్నమి న్యూస్ ప్రతినిధి): సోమల మండలంలోని నెల్లిమంద పంచాయతీ పరిధిలో గల బురుజుపల్లి గ్రామంలో శ్రీ అయ్యప్ప స్వామి వారి కన్యపూజ మహోత్సవం బుధవారం అత్యంత భక్తిశ్రద్ధలతో, వైభవంగా జరిగింది. మండల దీక్షలు చేపట్టిన కన్యస్వాములు, భక్తులు గురుస్వాముల పర్యవేక్షణలో స్వామివారికి శాస్త్రోక్తంగా ప్రత్యేక పూజలు, విశేష అభిషేకాలు నిర్వహించారు. ఈ సందర్భంగా ఏర్పాటు చేసిన పూజా వేదికను రంగురంగుల పుష్పాలు, విద్యుత్ దీపాలు, స్వామివారి నామాలతో సర్వాంగ సుందరంగా తీర్చిదిద్దారు. పద్దెనిమిది మెట్లతో కూడిన పవిత్ర పడిపీఠాన్ని ప్రత్యేక పుష్పాలతో అలంకరించి పడిపూజ, అష్టోత్తర శతనామార్చనలు, దీపారాధనలు నిర్వహించి మహామంగళహారతి సమర్పించారు. గురుస్వాముల భజనలు, భక్తుల ‘స్వామియే శరణం అయ్యప్ప’ శరణుఘోషలతో బురుజుపల్లి వీధులన్నీ ఆధ్యాత్మిక పరిమళాలు వెదజల్లాయి. పూజా కార్యక్రమాల అనంతరం గ్రామానికి విచ్చేసిన భక్తులకు, గ్రామస్థులకు నిర్వాహకులు తీర్థప్రసాదాలు అందజేసి, విస్తృత ఏర్పాట్లతో భారీ అన్నదాన వితరణ చేపట్టారు. ఈ కార్యక్రమంలో బురుజుపల్లితో పాటు పరిసర గ్రామాల ప్రజలు, అయ్యప్ప మాలధారులు పెద్ద సంఖ్యలో పాల్గొన్నారు.

చిత్తూరు

కమ్మపల్లె యూత్ సేవాతత్పరత: వైభవంగా అయ్యప్ప పూజలు, అన్నదానం

నెల్లిమంద (సోమల), అక్టోబర్ 12 (భాను ప్రసాద్ నాయుడు పున్నమి న్యూస్ ప్రతినిధి): సోమల మండలంలోని నెల్లిమంద పంచాయతీ పరిధిలో గల కమ్మపల్లి గ్రామంలో శ్రీ అయ్యప్ప స్వామి వారి కన్నెపూజ మహోత్సవాన్ని ‘కమ్మపల్లె యూత్’ ఆధ్వర్యంలో అత్యంత వైభవంగా, ఆధ్యాత్మిక శోభతో నిర్వహించారు. గ్రామంలోని యువతంతా ఏకతాటిపైకి వచ్చి సమష్టిగా చేపట్టిన ఈ కార్యక్రమం స్థానికులను, భక్తులను విశేషంగా ఆకట్టుకుంది. గురుస్వాముల పర్యవేక్షణలో కమ్మపల్లె యూత్ సభ్యులు పూజా వేదికను సుమారు వందలాది కిలోల బంతి, చామంతి పూలతో పరమశివుడి లింగాకారంలో అత్యద్భుతంగా అలంకరించి నయనానందకరంగా తీర్చిదిద్దారు. పద్దెనిమిది మెట్లతో కూడిన పడిపీఠాన్ని ప్రత్యేక పుష్పాలతో తీర్చిదిద్ది విశేష అభిషేకాలు, పడిపూజ, దీపారాధనలు నిర్వహించారు. భక్తుల ‘స్వామియే శరణం అయ్యప్ప’ శరణుఘోషలతో పరిసర ప్రాంతాలు మార్మోగాయి. పూజా కార్యక్రమాల అనంతరం కమ్మపల్లె యూత్ ఆధ్వర్యంలో తరలివచ్చిన భక్తులందరికీ విస్తృత ఏర్పాట్లతో భారీ అన్నదాన వితరణ చేపట్టారు. ఆధ్యాత్మిక వేడుకను విజయవంతం చేయడంలో కమ్మపల్లె యూత్ చూపిన సేవాతత్పరత, కృషిని గ్రామ పెద్దలు, భక్తులు ఘనంగా కొనియాడారు. ఈ కార్యక్రమంలో కమ్మపల్లి యువకులు, అయ్యప్ప మాలధారులు, గ్రామస్థులు పెద్ద సంఖ్యలో పాల్గొన్నారు. (శివలింగ ఆకారంలో ప్రత్యేక పుష్పాలంకరణ.. గ్రామస్థుల ప్రశంసలు)

చిత్తూరు

బోయకొండ గంగమ్మ తల్లికి పట్టువస్త్రాలు సమర్పించిన టీడీపీ ఇన్‌ఛార్జ్ వై. మధుసూదన్ నాయుడు

పుంగనూరు చౌడేపల్లి, అక్టోబర్ 12 (భాను ప్రసాద్ నాయుడు పున్నమి న్యూస్ ప్రతినిధి): చౌడేపల్లి మండలంలోని ప్రముఖ పుణ్యక్షేత్రం శ్రీ బోయకొండ గంగమ్మ దేవస్థానంలో సోమవారం అమ్మవారికి పట్టువస్త్రాల సమర్పణ కార్యక్రమం అత్యంత వైభవంగా జరిగింది. తెలుగుదేశం పార్టీ పుంగనూరు నియోజకవర్గ ఇన్‌ఛార్జ్ శ్రీ వై. మధుసూదన్ నాయుడు సతీసమేతంగా ఆలయానికి విచ్చేసి అమ్మవారికి పట్టువస్త్రాలు, సారె సమర్పించి ప్రత్యేక పూజలు నిర్వహించారు. ఆలయానికి చేరుకున్న మధుసూదన్ నాయుడు దంపతులకు ఆలయ అధికారులు, అర్చకులు పూర్ణకుంభంతో సాదర స్వాగతం పలికారు. అనంతరం గర్భాలయంలో వెలసిన గంగమ్మ తల్లికి శాస్త్రోక్తంగా అర్చనలు, అభిషేకాలు, విశేష హారతులు నిర్వహించారు. ఈ సందర్భంగా ఆయన మాట్లాడుతూ.. అమ్మవారి ఆశీస్సులతో పుంగనూరు నియోజకవర్గ ప్రజలందరూ పాడిపంటలు, ఆయురారోగ్యాలతో సుఖసంతోషాలతో వర్ధిల్లాలని కోరుకున్నట్లు తెలిపారు. దర్శనానంతరం ఆలయ అర్చకులు వారికి తీర్థప్రసాదాలు అందజేసి వేదాశీర్వచనం చేశారు. ఈ కార్యక్రమంలో స్థానిక టీడీపీ, జనసేన కూటమి నాయకులు, ఆలయ కమిటీ ప్రతినిధులు, పెద్ద సంఖ్యలో భక్తులు పాల్గొన్నారు. (సతీసమేతంగా విశేష పూజలు నిర్వహించిన పుంగనూరు కూటమి నేత) (నియోజకవర్గ ప్రజలు సుభిక్షంగా ఉండాలని అమ్మవారికి ప్రత్యేక ప్రార్థనలు)

చిత్తూరు

నెల్లిమందలో అస్తవ్యస్తంగా పారిశుధ్యం: రోడ్ల పక్కనే ముళ్లకంచెలు, పిచ్చిమొక్కలు

నెల్లిమంద (సోమల), అక్టోబర్ 12 (భాను ప్రసాద్ నాయుడు, పున్నమి న్యూస్ ప్రతినిధి): సోమల మండలంలోని నెల్లిమంద గ్రామ పరిధిలో పారిశుధ్య నిర్వహణ పూర్తిగా అస్తవ్యస్తంగా మారిందని స్థానికులు ఆవేదన వ్యక్తం చేస్తున్నారు. గ్రామ వీధుల్లో పారిశుధ్య పనులు సక్రమంగా జరగకపోవడంతో రోడ్ల పక్కన పిచ్చిమొక్కలు, కంపచెట్లు ఏపుగా పెరిగి రాకపోకలకు తీవ్ర అంతరాయం కలిగిస్తున్నాయి. రోడ్డుకు ఇరువైపులా ఎండిన చెట్ల కొమ్మలతో కూడిన ముళ్లకంచెలు, మట్టి దిబ్బలు రాళ్ళు పేరుకుపోవడంతో వీధులు ఇరుకుగా మారి కాలినడకన వెళ్లే గ్రామస్థులు, ద్విచక్ర వాహనదారులు తీవ్ర ఇబ్బందులు ఎదుర్కొంటున్నారు. రాత్రి వేళల్లో విషపురుగులు, పాములు సంచరించే ప్రమాదం ఉందని ప్రజలు భయాందోళన వ్యక్తం చేస్తున్నారు. స్థానిక పంచాయతీ అధికారులు ఇప్పటికైనా స్పందించి వీధుల్లో పెరిగిన పిచ్చిమొక్కలను తొలగించి, రోడ్ల పక్కన పేరుకుపోయిన వ్యర్థాలను శుభ్రం చేసి గ్రామంలో పారిశుధ్యాన్ని మెరుగుపరచాలని నెల్లిమంద గ్రామస్థులు కోరుతున్నారు.

చిత్తూరు

సదుం అయ్యప్ప సన్నిధిలో భక్తుల సందడి: పోటెత్తిన మాలధారులు

(మండల దీక్షల ప్రారంభం.. శరణుఘోషలతో మార్మోగిన ఆలయ ప్రాంగణం) సదుం, అక్టోబర్ 12 (భాను ప్రసాద్ నాయుడు పున్నమి న్యూస్ ప్రతినిధి): సదుం మండల కేంద్రంలో వెలసియున్న శ్రీ అయ్యప్ప స్వామి వారి దేవాలయం భక్తుల నామస్మరణతో ఆధ్యాత్మిక శోభను సంతరించుకుంది. అయ్యప్ప దీక్షా కాలం ఊపందుకోవడంతో సోమవారం స్థానిక ఆలయానికి మాలధారణ చేసే భక్తులు భారీ సంఖ్యలో తరలివచ్చారు. మండలంతో పాటు పరిసర గ్రామాల నుంచి వచ్చిన భక్తులు గురుస్వాముల సమక్షంలో నియమనిష్టలతో శాస్త్రోక్తంగా పూజలు నిర్వహించి, తులసి, రుద్రాక్ష మాలలను ధరించి మండల దీక్షలను ప్రారంభించారు. ఈ సందర్భంగా ఆలయంలోని శ్రీ అయ్యప్ప స్వామి వారికి విశేష అభిషేకాలు, పుష్పాలంకరణలు, దీపారాధనలు అత్యంత నేత్రపర్వంగా నిర్వహించారు. ఆలయ ప్రాంగణమంతా ‘స్వామియే శరణం అయ్యప్ప’ శరణుఘోషలతో మార్మోగింది. మాలధారణ చేసుకున్న స్వాములకు, దర్శనార్థం విచ్చేసిన భక్తులకు అర్చకులు తీర్థప్రసాదాలు అందజేశారు. కార్యక్రమంలో గురుస్వాములు, స్థానిక భక్తులు పెద్ద సంఖ్యలో పాల్గొన్నారు Uploaded Video:

చిత్తూరు

సోమల నెల్లిమంద లో వైభవంగా శ్రీ అయ్యప్ప స్వామి కన్యపూజ, అగ్నిగుండ ప్రవేశం

నెల్లిమంద (సోమల), అక్టోబర్ 10 (భాను ప్రసాద్ నాయుడు పున్నమి న్యూస్ ప్రతినిధి): సోమల మండలంలోని నెల్లిమంద పంచాయతీ పరిధిలో గల తెట్టుపల్లి గ్రామంలో శ్రీ అయ్యప్ప స్వామి వారి కన్యపూజ మహోత్సవం అత్యంత భక్తిశ్రద్ధలతో ఘనంగా జరిగింది. గురుస్వాముల పర్యవేక్షణలో మాలధారణ చేసిన కన్యస్వాములు, భక్తులు స్వామివారికి శాస్త్రోక్తంగా ప్రత్యేక పూజలు, అభిషేకాలు నిర్వహించారు. ఈ సందర్భంగా ఆలయ ప్రాంగణంలో పద్దెనిమిది మెట్లను, స్వామివారి పీఠాన్ని రంగురంగుల పుష్పాలు, రంగవల్లులు, విద్యుత్ దీపాలతో సర్వాంగ సుందరంగా అలంకరించి విశేష పడిపూజ, కర్పూర హారతులు సమర్పించారు. అనంతరం అయ్యప్ప భక్తులు నిష్టతో నిర్వహించిన అగ్నిగుండ ప్రవేశం స్థానికులను విశేషంగా ఆకట్టుకుంది. ‘స్వామియే శరణం అయ్యప్ప’ నామస్మరణతో గ్రామం ఆధ్యాత్మిక శోభను సంతరించుకుంది. పూజా కార్యక్రమాల ముగింపు అనంతరం విచ్చేసిన భక్తులకు తీర్థప్రసాదాలు అందజేసి, అన్నదాన వితరణ చేపట్టారు. ఈ వేడుకల్లో పరిసర గ్రామాల ప్రజలు, అయ్యప్ప భక్తులు పెద్ద సంఖ్యలో పాల్గొన్నారు Uploaded Video:

చిత్తూరు

పుంగనూరులో వైకాపాకు భారీ షాక్: టీడీపీలో చేరిన నెక్కుంది పంచాయతీ గ్రామస్థులు

పుంగనూరు, అక్టోబర్ 09 (పున్నమి న్యూస్ ప్రతినిధి): పుంగనూరు నియోజకవర్గంలో తెలుగుదేశం పార్టీలోకి వలసల జోరు కొనసాగుతోంది. పట్టణంలోని టీడీపీ కార్యాలయంలో పలమనేరు శాసనసభ్యులు శ్రీ నూతనకాల్వ అమరనాథరెడ్డి, నియోజకవర్గ ఇన్‌ఛార్జ్ శ్రీ వై. మధుసూదన్ నాయుడు సమక్షంలో నెక్కుంది పంచాయతీ పరిధిలోని పెద్ద అల్సాపురం, చిన్న అల్సాపురం గ్రామాలకు చెందిన పలువురు గ్రామస్థులు, వైకాపా కార్యకర్తలు పెద్ద సంఖ్యలో తెలుగుదేశం పార్టీలో చేరారు. పార్టీలో చేరిన వారికి ఎమ్మెల్యే అమరనాథరెడ్డి పసుపు కండువాలు కప్పి సాదరంగా ఆహ్వానించారు. ఈ సందర్భంగా ఎమ్మెల్యే అమరనాథరెడ్డి మాట్లాడుతూ.. రాష్ట్రంలో కూటమి ప్రభుత్వం ప్రజా సంక్షేమం, రాష్ట్రాభివృద్ధే ధ్యేయంగా పనిచేస్తోందని పేర్కొన్నారు. గత ప్రభుత్వ ప్రజావ్యతిరేక విధానాలతో విసిగిపోయిన ప్రజలు, కార్యకర్తలు స్వచ్ఛందంగా తెలుగుదేశం పార్టీ వైపు చూస్తున్నారని స్పష్టం చేశారు. పార్టీలో చేరిన ప్రతి ఒక్కరికీ సముచిత స్థానం కల్పించి అండగా ఉంటామని భరోసా ఇచ్చారు. నియోజకవర్గ ఇన్‌ఛార్జ్ మధుసూదన్ నాయుడు మాట్లాడుతూ పుంగనూరులో టీడీపీని తిరుగులేని శక్తిగా తీర్చిదిద్దేందుకు సమష్టిగా కృషి చేస్తామన్నారు. ఈ కార్యక్రమంలో స్థానిక టీడీపీ నాయకులు, కార్యకర్తలు పెద్ద సంఖ్యలో పాల్గొన్నారు.

చిత్తూరు

జనసేన రాజంపేట పార్లమెంట్ సమన్వయకర్తలు, నిర్వాహక దళ్ నియామకం

పార్టీ అధినేత పవన్ కల్యాణ్ ఆదేశాల మేరకు కమిటీ ప్రకటన) (సమన్వయకర్తలుగా యల్లటూరు శ్రీనివాస రాజు, అతికారి కృష్ణ, రామ్ దాస్ చౌదరి, దాశం అనిత) రాజంపేట/మదనపల్లె, అక్టోబర్ 09 (పున్నమి న్యూస్ ప్రతినిధి): జనసేన పార్టీ సంస్థాగత బలోపేతంలో భాగంగా రాజంపేట పార్లమెంట్ నియోజకవర్గ నూతన కమిటీని పార్టీ అధిష్ఠానం ప్రకటించింది. పార్టీ అధ్యక్షుడు, ఉప ముఖ్యమంత్రి పవన్ కల్యాణ్ ఆదేశాల మేరకు రాజంపేట పార్లమెంట్ సమన్వయకర్తలు, నిర్వాహక దళ్ సభ్యులను నియమించినట్లు పార్టీ వర్గాలు వెల్లడించాయి. రాజంపేట పార్లమెంట్ సమన్వయకర్తలుగా శ్రీ యల్లటూరు శ్రీనివాస రాజు, శ్రీ అతికారి కృష్ణ, శ్రీ రామ్ దాస్ చౌదరి, శ్రీమతి దాశం అనిత నియమితులయ్యారు. వీరితో పాటు పార్లమెంట్ పరిధిలోని వివిధ ప్రాంతాలకు చెందిన 32 మంది ముఖ్య నాయకులతో ‘నిర్వాహక దళ్’ కమిటీని, అలాగే ప్రత్యేక సపోర్ట్ టీమ్‌ను పార్టీ ఏర్పాటు చేసింది. రానున్న రోజుల్లో నియోజకవర్గంలో పార్టీని మరింత క్రియాశీలకంగా నడిపించడం, కూటమి ప్రభుత్వ సంక్షేమ పథకాలను ప్రజల్లోకి తీసుకెళ్లడం, స్థానిక సమస్యల పరిష్కారానికి కృషి చేయడమే లక్ష్యంగా ఈ కమిటీ పనిచేయనుందని పేర్కొన్నారు. తమపై నమ్మకంతో బాధ్యతలు అప్పగించిన పవన్ కల్యాణ్‌కు ఈ సందర్భంగా నూతన సమన్వయకర్తలు కృతజ్ఞతలు తెలియజేశారు.

చిత్తూరు

తిరువణ్ణామలై ఆలయంలో అభిషేక భక్తులపై ఆంక్షలు (గంట ముందే ఆరోగ్య పరీక్షలు.. శని, ఆదివారాల్లో సేవకు అనుమతి నిరాకరణ

చెన్నై, అక్టోబర్ 08 (పున్నమి న్యూస్ ప్రతినిధి): ప్రసిద్ధ పుణ్యక్షేత్రం తిరువణ్ణామలై అరుణాచలేశ్వర ఆలయంలో మూలవిరాట్ అభిషేకంలో పాల్గొనే భక్తులపై ఆలయ యంత్రాంగం పలు ఆంక్షలు విధించింది. ఆలయ గర్భగుడి ప్రాంతం ఇరుగ్గా ఉండటంతో, ఏకకాలంలో ఎక్కువ సంఖ్యలో భక్తులు లోపలికి వెళ్లినప్పుడు కొందరు శ్వాసకోశ సంబంధిత, ఇతర ఆరోగ్య సమస్యలకు గురవుతున్నట్లు అధికారులు గుర్తించారు. ఈ పరిస్థితుల దృష్ట్యా మూలవిరాట్ అభిషేక సేవలో పాల్గొనే భక్తులకు గంట ముందే ఆరోగ్య పరీక్షలు నిర్వహించనున్నారు. ఆ పరీక్షల్లో ఏవైనా అనారోగ్య సమస్యలు ఉన్నట్లు తేలితే వారిని అభిషేకంలో పాల్గొనేందుకు అనుమతించబోమని ఆలయ వర్గాలు స్పష్టం చేశాయి. అంతేకాకుండా, వారాంతాల్లో భక్తుల రద్దీ అధికంగా ఉండే శని, ఆదివారాల్లో సాధారణ భక్తులకు అభిషేక సేవలో పాల్గొనేందుకు ఎలాంటి అనుమతి ఉండదని వెల్లడించారు. భక్తుల ఆరోగ్య భద్రత, రద్దీ నియంత్రణ దృష్ట్యానే ఈ నిర్ణయం తీసుకున్నట్లు ఆలయ యంత్రాంగం పేర్కొంది.

శ్రీ పొట్టి శ్రీరాములు నెల్లూరు

పల్లె పండుగ 3.0కు భారీ బందోబస్తు

నెల్లూరు జిల్లా ఉదయగిరి నియోజకవర్గం పరిధిలోని వరికుంటపాడు మండలం రామాపురం గ్రామంలో పల్లె పండుగ 3.0 కార్యక్రమం నిర్వహించనున్నారు. ఈ కార్యక్రమానికి రాష్ట్ర ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదెల పవన్ కళ్యాణ్ పాల్గొననున్న సందర్భంగా నెల్లూరు జిల్లా మారార్పురం జిల్లా ప్రకాశం జిల్లా ఎస్పీలు డాక్టర్ అజిత వేజెండ్ల, పంకజ్ కుమార్ మీనా, శ్రీ.వి. హర్షవర్ధన్ రాజు సభ వేదికను పరిశీలిస్తూ భారీ బందోబస్తు ఏర్పాట్లు చేయడం జరిగింది