నంద్యాల
రాయలసీమ ప్రాంతాన్ని వ్యవసాయ-ఉద్యాన రంగాల్లో సమగ్రంగా అభివృద్ధి చేసి, ప్రపంచస్థాయి ఉద్యాన ఉత్పత్తుల కేంద్రంగా తీర్చిదిద్దే లక్ష్యంతో ప్రభుత్వం ప్రతిష్టాత్మకంగా చేపట్టిన ‘గ్లోబల్ హార్టికల్చర్ హబ్ -రాయలసీమ రైజింగ్’ కార్యక్రమానికి నంద్యాల జిల్లాలో విస్తృత ప్రచారం కల్పించారు. కార్యక్రమంలో భాగంగా బుధవారం జిల్లా కలెక్టరేట్‌లోని పిజిఆర్‌ఎస్‌ హాల్‌ నుంచి ఇండోర్‌ స్టేడియం వరకు నిర్వహించిన భారీ ట్రాక్టర్‌ ప్రచార ర్యాలీని రాష్ట్ర న్యాయ, మైనారిటీ సంక్షేమ శాఖ మంత్రి ఎన్‌ఎండీ ఫరూక్, జిల్లా కలెక్టర్ జి. రాజకుమారి, జాయింట్ కలెక్టర్ సూరజ్ ధనుంజయ్ లు ప్రారంభించారు.కలెక్టరేట్‌ నుంచి ప్రారంభమైన ర్యాలీ నూనెపల్లె, ప్రభుత్వ సర్వజన ఆసుపత్రి, టెక్కె మార్కెట్‌ యార్డు మీదుగా ఇండోర్‌ స్టేడియానికి చేరుకుంది. ర్యాలీలో జిల్లా కలెక్టర్ శ్రీమతి జి. రాజకుమారి, జాయింట్ కలెక్టర్ సూరజ్ ధనుంజయ్ ట్రాక్టర్లపై ప్రయాణిస్తూ “హార్టికల్చర్ హబ్-రాయలసీమ రైజింగ్” నినాదాలతో ఉత్సాహాన్ని నింపారు. ‘గ్లోబల్ హార్టికల్చర్ హబ్-రాయలసీమ రైజింగ్’ లక్ష్యాలు, ఉద్యాన రంగ అభివృద్ధి ద్వారా రైతులకు లభించే అవకాశాలపై ప్రజల్లో విస్తృత అవగాహన కల్పించారు.రాయలసీమ భవిష్యత్ రూపురేఖలను ఆవిష్కరించిన డ్రోన్‌ షో అనంతరం ఇండోర్‌ స్టేడియంలో నిర్వహించిన భారీ డ్రోన్‌ షో ప్రత్యేక ఆకర్షణగా నిలిచింది. రాయలసీమలోని కరవు పరిస్థితులను అధిగమిస్తూ, వ్యవసాయ-ఉద్యాన రంగాల అభివృద్ధితో భవిష్యత్తులో ప్రాంతం ఏ విధంగా రూపాంతరం చెందనుందో రంగురంగుల డ్రోన్‌ కాంతుల విన్యాసాల ద్వారా ఆకాశంలో అద్భుతంగా ఆవిష్కరించారు. రాయలసీమ ఉద్యాన సంపద, ఆధునిక సాగు విధానాలు, ఉద్యాన ఉత్పత్తుల అభివృద్ధి, రైతుల ఆదాయ వృద్ధి, ప్రపంచస్థాయి హార్టికల్చర్ హబ్‌గా ప్రాంతం రూపుదిద్దుకునే భవిష్యత్ దృశ్యాలను ప్రతిబింబించేలా డ్రోన్‌ షోను రూపొందించారు. ఈ ప్రదర్శనను మంత్రి ఎన్‌ఎండీ ఫరూక్, జిల్లా కలెక్టర్ జి. రాజకుమారి, జాయింట్ కలెక్టర్ సూరజ్ ధనుంజయ్ ఆద్యంతం వీక్షించి అభినందించారు.ఉద్యాన పంటలతో రైతులకు మరింత లాభదాయకమైన అవకాశాలు: మంత్రి ఎన్‌ఎండీ ఫరూక్ ఈ సందర్భంగా మంత్రి ఎన్‌ఎండీ ఫరూక్ మాట్లాడుతూ, రాయలసీమ ప్రాంతాన్ని, ముఖ్యంగా మదనపల్లె పరిసర ప్రాంతాలను ఉద్యానవన హబ్‌గా అభివృద్ధి చేయాలనే దిశగా ప్రభుత్వం కార్యాచరణ చేపట్టిందన్నారు. సాధారణ వ్యవసాయంతో పోలిస్తే ఉద్యాన పంటల ద్వారా రైతులకు మెరుగైన ఆదాయ అవకాశాలు లభించే అవకాశం ఉన్నందున ఉద్యాన రంగాన్ని విస్తృతంగా ప్రోత్సహిస్తున్నట్లు తెలిపారు. రాయలసీమలోని 10 జిల్లాల్లో సుమారు రూ.లక్ష కోట్ల పెట్టుబడులతో ఉద్యాన రంగాన్ని అభివృద్ధి చేసే కార్యక్రమం చేపట్టినట్లు చెప్పారు. మామిడి, డ్రాగన్‌ ఫ్రూట్‌, జామ, సపోటా తదితర వివిధ రకాల పండ్ల తోటల సాగుకు ఈ ప్రాంతంలో అనుకూల పరిస్థితులు ఉన్నాయని పేర్కొన్నారు. వర్షాభావ పరిస్థితులు, ఎల్‌నినో ప్రభావం వంటి ప్రతికూల పరిస్థితులు ఉన్నప్పటికీ కాలువల ద్వారా నీటిని అందించడం, భూగర్భ జలాలను పెంపొందించేందుకు బోర్‌ బావుల రీచార్జ్‌ చర్యలు చేపట్టడం వంటి కార్యక్రమాలు కొనసాగుతున్నాయని మంత్రి తెలిపారు. రానున్న వేసవి కాలంలో ఎండల తీవ్రత, నీటి కొరత ఏర్పడే అవకాశం ఉన్నందున అందుబాటులో ఉన్న నీటిని పొదుపుగా వినియోగించాలని, పండ్ల తోటలకు మరియు తాగునీటి అవసరాలకు ప్రాధాన్యతనిస్తూ నీటిని వృథా చేయకుండా సద్వినియోగం చేసుకోవాలని రైతులకు మంత్రి విజ్ఞప్తి చేశారు.రాయలసీమను అంతర్జాతీయ ఉద్యాన కేంద్రంగా తీర్చిదిద్దడమే లక్ష్యం: కలెక్టర్ జి. రాజకుమారి జిల్లా కలెక్టర్ జి. రాజకుమారి మాట్లాడుతూ, ఉద్యాన రంగాన్ని సమగ్రంగా అభివృద్ధి చేసి రైతులకు మెరుగైన ఆదాయ అవకాశాలు కల్పించడంతో పాటు రాయలసీమను అంతర్జాతీయ స్థాయి ఉద్యాన ఉత్పత్తుల కేంద్రంగా తీర్చిదిద్దడమే ‘గ్లోబల్ హార్టికల్చర్ హబ్-రాయలసీమ రైజింగ్’ ప్రధాన లక్ష్యమని తెలిపారు. ఈ కార్యక్రమంపై నంద్యాల జిల్లాలో గత వారం రోజులుగా విస్తృత ప్రచార, అవగాహన కార్యక్రమాలు నిర్వహించినట్లు చెప్పారు. రైతులు, ప్రజాప్రతినిధులు, అధికారులు, వ్యవసాయ-ఉద్యాన రంగ నిపుణులు, వివిధ వర్గాల భాగస్వామ్యంతో ఆధునిక సాగు విధానాలు, విలువ ఆధారిత ఉత్పత్తులు, మార్కెటింగ్‌, ఎగుమతులు తదితర అంశాలపై అవగాహన కల్పించినట్లు వివరించారు.
shaikabdulmazeed
