ASIFABAD
గోలేటి టౌన్‌షిప్: సింగరేణి కాంట్రాక్టు కార్మికులకు 10 శాతం లాభాల వాటాను కేటాయించాలని డిమాండ్ చేస్తూ సింగరేణి కాలరీస్ కాంట్రాక్ట్ వర్కర్స్ యూనియన్ (SCCWU-IFTU) ఆధ్వర్యంలో గోలేటి టౌన్‌షిప్‌లోని సివిల్ కార్యాలయం వద్ద గేట్ మీటింగ్ నిర్వహించారు. ఈ సందర్భంగా SCCWU-IFTU రాష్ట్ర వర్కింగ్ ప్రెసిడెంట్ డి. బ్రహ్మానందం మాట్లాడుతూ.. గత సంవత్సరం సింగరేణి యాజమాన్యం పర్మినెంట్ కార్మికులకు 34 శాతం లాభాల వాటాను చెల్లించిందని, ఒక్కొక్కరికి రూ.1,96,000 లాభాల వాటా అందించిందని తెలిపారు. అయితే పర్మినెంట్ కార్మికులతో సమానంగా పనిచేస్తున్న కాంట్రాక్టు కార్మికులకు కేవలం రూ.5,500 మాత్రమే ఇచ్చిందని అన్నారు. సింగరేణి యాజమాన్యం కాంట్రాక్టు కార్మికులకు తక్కువ వేతనాలు చెల్లించడం వల్లే సంస్థకు లాభాలు వస్తున్నాయని పేర్కొన్నారు. ఒక పర్మినెంట్ కార్మికుడికి చెల్లించే వేతనంతో పది మంది కాంట్రాక్టు కార్మికులను పనిచేయించుకోవచ్చని, వేతనాల్లో భారీ తేడా ఉందన్నారు. ఒక పర్మినెంట్ కార్మికుడి స్థానంలో పది మంది కాంట్రాక్టు కార్మికులు పనిచేస్తున్నారని తెలిపారు. సింగరేణి యాజమాన్యానికి వచ్చే లాభాల్లో కాంట్రాక్టు కార్మికుల శ్రమ, చెమట చుక్కలు దాగి ఉన్నాయని అన్నారు. కాబట్టి కాంట్రాక్టు కార్మికులకు 10 శాతం లాభాల వాటాను పంచాలని SCCWU-IFTU డిమాండ్ చేస్తోందని తెలిపారు. ఈ కార్యక్రమంలో బి. తిరుపతి, అరికిళ్ల పోశం, గోలేటి శీను, భీమేష్, వెంకటేష్, చందు, పోసుబాయ్, శంకరమ్మ, సావిత్రి, ఎన్. లక్ష్మి తదితరులు పాల్గొన్నారు. Uploaded Video:
gajjelathirupathi
