Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: Andhra Pradesh

డా. బిఆర్ అంబేద్కర్ కోనసీమ

మున్సిపల్, పంచాయతీ ఎన్నికల నిర్వహణకు యంత్రాంగాన్ని పూర్తిస్థాయిలో సిద్ధం చేయాలి: జిల్లా కలెక్టర్

పోలింగ్ కేంద్రాలు, ఓటర్ల జాబితాలు, రిజర్వేషన్ల ప్రక్రియపై ప్రత్యేక దృష్టి: జిల్లా కలెక్టర్ డా. ఆర్. మహేష్ కుమార్. అమలాపురం,పున్నమి దినపత్రిక: మున్సిపల్, పంచాయతీ ఎన్నికల నిర్వహణకు జిల్లా యంత్రాంగాన్ని పూర్తిస్థాయిలో సిద్ధం చేయాలని జిల్లా కలెక్టర్ డా. ఆర్. మహేష్ కుమార్ అధికారులను ఆదేశించారు. ఎన్నికల నిర్వహణలో ఎటువంటి ఇబ్బందులు, లోపాలకు తావులేకుండా ముందస్తు సన్నాహక ప్రక్రియను సమగ్రంగా పూర్తి చేయాలని సూచించారు.బుధవారం రాష్ట్ర సచివాలయం నుంచి రాష్ట్ర ఎన్నికల ప్రధాన అధికారి అనిల్ చంద్ర పునేఠా అన్ని జిల్లాల జిల్లా కలెక్టర్లు, జాయింట్ కలెక్టర్లతో వీడియో కాన్ఫరెన్స్ ద్వారా ఎన్నికల ముందస్తు సన్నాహక ప్రక్రియ, పోలింగ్ కేంద్రాల ఏర్పాటు, ఓటర్ల జాబితాల ప్రచురణ, ఎన్నికల సంబంధిత ప్రచురణలు, ఎస్సీ, ఎస్టీ, బీసీ రిజర్వేషన్ల గుర్తింపు, రిజర్వేషన్ల అమలు తదితర అంశాలపై సమగ్రంగా సమీక్షించారు. ఈ సందర్భంగా జిల్లా కలెక్టర్ మాట్లాడుతూ, జిల్లాలో ఎన్నికల ముందస్తు సన్నాహక చర్యలను ప్రణాళికాబద్ధంగా చేపడుతున్నట్లు తెలిపారు. డాక్టర్ బి.ఆర్. అంబేద్కర్ కోనసీమ జిల్లాలో మొత్తం 10,90,975 మంది ఓటర్లు ఉన్నారని, జిల్లాలోని 19 మండలాల పరిధిలో 342 గ్రామ పంచాయతీలకు సంబంధించి 3,878 వార్డులను గుర్తించినట్లు తెలిపారు. వీటి పరిధిలో మొత్తం 3,968 పోలింగ్ కేంద్రాలను ఏర్పాటు చేసినట్లు వివరించారు.పోలింగ్ కేంద్రాలకు సంబంధించిన ఓటర్ల జాబితా పేజీలను నిబంధనల మేరకు పరిశీలించి, అవసరమైన చోట అదనపు పోలింగ్ కేంద్రాల ఏర్పాటుకు ప్రతిపాదనలు సిద్ధం చేస్తున్నట్లు తెలిపారు. రెండు పోలింగ్ కేంద్రాలకు సంబంధించిన ప్రతిపాదిత ఓటర్ల జాబితా పేజీల అంశాన్ని కూడా పరిశీలిస్తున్నట్లు పేర్కొన్నారు. ఓటర్లకు ఎటువంటి అసౌకర్యం కలగకుండా పోలింగ్ కేంద్రాల గుర్తింపు, జాబితాల విభజన, ప్రచురణ తదితర ప్రక్రియలను పకడ్బందీగా పూర్తి చేయాలని అధికారులను ఆదేశించారు. *ఎస్సీ, ఎస్టీ, బీసీ రిజర్వేషన్ల ప్రక్రియ వేగవంతం* స్థానిక సంస్థల ఎన్నికలకు సంబంధించి ఎస్సీ, ఎస్టీ, బీసీ రిజర్వేషన్ల గుర్తింపు, వర్గీకరణ, వర్తింపు ప్రక్రియను నిబంధనల ప్రకారం వేగవంతం చేస్తున్నట్లు జిల్లా కలెక్టర్ తెలిపారు. డివిజన్, మండల స్థాయిల్లో సంబంధిత అధికారులు సమన్వయంతో పనిచేస్తూ రిజర్వేషన్లకు సంబంధించిన వివరాలను ఖచ్చితంగా సిద్ధం చేయాలని సూచించారు.రిజర్వేషన్ల ఖరారులో ప్రభుత్వ మార్గదర్శకాలు, ఎన్నికల కమిషన్ నిబంధనలు, అమలులో ఉన్న చట్టపరమైన నిబంధనలను తప్పనిసరిగా పాటించాలని తెలిపారు. రిజర్వేషన్ ప్రక్రియలో పారదర్శకత, ఖచ్చితత్వానికి అత్యంత ప్రాధాన్యత ఇవ్వాలని అధికారులను ఆదేశించారు. *ఎన్నికల సిబ్బందికి సమగ్ర శిక్షణ* ఎన్నికల విధుల్లో పాల్గొనే అధికారులు, సిబ్బందికి అవసరమైన శిక్షణా తరగతులను నిర్వహించి, ఎన్నికల నిర్వహణకు సంబంధించిన ప్రతి అంశంపై పూర్తి అవగాహన కల్పించాలని జిల్లా కలెక్టర్ సూచించారు. పోలింగ్ విధానం, పోలింగ్ కేంద్రాల నిర్వహణ, ఓటర్ల జాబితాల నిర్వహణ, ఎన్నికల సామగ్రి వినియోగం, విధులు–బాధ్యతలు, ఎన్నికల నిబంధనలు తదితర అంశాలపై శిక్షణ ఇవ్వాలని తెలిపారు.శిక్షణ అనంతరం ఎన్నికల విధుల్లో పాల్గొనే సిబ్బందికి తమకు అప్పగించిన బాధ్యతలపై ఎటువంటి సందేహాలు లేకుండా చూడాలని, అవసరమైన చోట ప్రాక్టికల్ శిక్షణ కూడా అందించాలని సూచించారు. ఎన్నికల ప్రక్రియలో ప్రతి అధికారి, సిబ్బంది సమన్వయంతో పనిచేస్తే ఎన్నికలను సమర్థవంతంగా నిర్వహించవచ్చని తెలిపారు. ముందస్తు ఏర్పాట్లను నిర్ణీత గడువులో పూర్తి చేయాలి ఎన్నికల నిర్వహణకు సంబంధించి చేపట్టాల్సిన అన్ని ముందస్తు చర్యలను నిర్ణీత కాలవ్యవధిలో పూర్తి చేయాలని జిల్లా కలెక్టర్ ఆదేశించారు. ఓటర్ల జాబితాలు, పోలింగ్ కేంద్రాలు, ఎన్నికల సామగ్రి, సిబ్బంది, శిక్షణ, రిజర్వేషన్లు తదితర అంశాలపై సంబంధిత శాఖల అధికారులు నిరంతరం సమన్వయం చేసుకుంటూ ముందుకు సాగాలని సూచించారు. ఈ సమావేశంలో డిఆర్ఓ వి సుబ్బారావు, జిల్లా పంచాయతీ అధికారిని శాంతి కుమారి తదితరులు పాల్గొన్నారు.

డా. బిఆర్ అంబేద్కర్ కోనసీమ

భక్తులకు మెరుగైన మౌలిక సదుపాయాలు కల్పించేలా ప్రణాళికలు రూపొందించాలి: జిల్లా కలెక్టర్‌

పవర్ పాయింట్ ప్రజెంటేషన్ ద్వారా ఆలయ అభివృద్ధి ప్రతిపాదనలపై జాయింట్ కలెక్టర్ సమీక్ష పున్నమి దినపత్రిక ఆగష్టు19,2026:డాక్టర్ బి.ఆర్. అంబేద్కర్ కోనసీమ జిల్లా, అమలాపురం భక్తులకు మెరుగైన మౌలిక సదుపాయాలు కల్పించేలా ప్రణాళికలు రూపొందించాలని జిల్లా జాయింట్ కలెక్టర్ వై. ఖోమ్. నైడియా దేవి తెలిపారు. బుధవారం స్థానిక కలెక్టరేట్ లోని వివేకానంద సమావేశం మందిరంలో శ్రీవత్స ఫౌండర్ సీఈవో బమిడిపాటి కిరణ్ కుమార్ పవర్ పాయింట్ ప్రజెంటేషన్ ద్వారా వాడపల్లి శ్రీ వెంకటేశ్వర స్వామి ఆలయ అభివృద్ధి మాస్టర్ ప్లాన్ సమగ్రంగా సమీక్ష నిర్వహించారు.ఈ సందర్భంగా జాయింట్ కలెక్టర్ మాట్లాడుతూ వాడపల్లి ఆలయ అభివృద్ధికి సంబంధించి రూపొందిస్తున్న మాస్టర్ ప్లాన్‌ను సమగ్రంగా, భవిష్యత్ అవసరాలకు అనుగుణంగా రూపొందించాలని జాయింట్ కలెక్టర్ అధికారులను సూచించారు.ఆలయానికి వచ్చే భక్తులకు మెరుగైన సౌకర్యాలు కల్పించడంతో పాటు ఆలయ పరిసర ప్రాంతాన్ని ఆధ్యాత్మిక, పర్యాటక కేంద్రంగా అభివృద్ధి చేసేలా ప్రణాళికలు రూపొందించాలని తెలిపారు. ఆలయ ప్రస్తుత పరిస్థితి, భక్తుల రాకపోకలు, అందుబాటులో ఉన్న మౌలిక సదుపాయాలు, భవిష్యత్‌లో పెరిగే భక్తుల సంఖ్యను దృష్టిలో ఉంచుకుని చేపట్టాల్సిన అభివృద్ధి పనులపై అధికారులు వివరాలు సమర్పించారు.మాస్టర్ ప్లాన్‌లో ఆలయ ప్రాంగణ అభివృద్ధి, భక్తుల రాకపోకలకు అనుగుణంగా రహదారులు, పార్కింగ్ సదుపాయాలు, తాగునీరు, మరుగుదొడ్లు, విద్యుత్, పారిశుధ్యం, క్యూలైన్ వ్యవస్థ, భక్తుల విశ్రాంతి ప్రాంతాలు, వాహనాల నియంత్రణ, పచ్చదనం, పరిసరాల సుందరీకరణ వంటి అంశాలకు ప్రాధాన్యత ఇవ్వాలని జాయింట్ కలెక్టర్ సూచించారు.భక్తులకు ఎటువంటి ఇబ్బందులు కలగకుండా ప్రవేశం, నిష్క్రమణ మార్గాలను శాస్త్రీయంగా రూపొందించాలని, రద్దీ సమయాల్లో భక్తుల నియంత్రణకు అవసరమైన ఏర్పాట్లను మాస్టర్ ప్లాన్‌లో పొందుపరచాలని తెలిపారు. వృద్ధులు, దివ్యాంగులు, మహిళలు, చిన్నారులకు అనుకూలంగా ప్రత్యేక సౌకర్యాలు కల్పించే అంశాన్ని కూడా పరిగణనలోకి తీసుకోవాలని సూచించారు.ఆలయ ప్రాంగణం, పరిసర ప్రాంతాల్లో పారిశుధ్య నిర్వహణకు ప్రత్యేక ప్రణాళిక రూపొందించాలని, వ్యర్థాల నిర్వహణ, డ్రైనేజీ వ్యవస్థ, పచ్చదనం తదితర అంశాలకు తగిన ప్రాధాన్యత ఇవ్వాలని అధికారులను ఆదేశించారు.పవర్ పాయింట్ ప్రజెంటేషన్ ద్వారా మాస్టర్ ప్లాన్‌లో ప్రతిపాదించిన వివిధ అభివృద్ధి పనులను పరిశీలించిన జాయింట్ కలెక్టర్, అవసరమైన మార్పులు, చేర్పులు చేసి సమగ్ర ప్రణాళికను సిద్ధం చేయాలని సూచించారు. సంబంధిత శాఖల అధికారులు సమన్వయంతో పనిచేసి ప్రతిపాదనలను పరిశీలించి, సాధ్యాసాధ్యాలను అంచనా వేసి తదుపరి చర్యలు చేపట్టాలని తెలిపారు.వాడపల్లి ఆలయ అభివృద్ధి పనులు భక్తుల సౌకర్యాలతో పాటు ప్రాంతీయ పర్యాటక అభివృద్ధికి దోహదపడేలా ఉండాలని జాయింట్ కలెక్టర్ పేర్కొన్నారు. మాస్టర్ ప్లాన్‌ను నాణ్యత, భద్రత, పర్యావరణ పరిరక్షణ, భవిష్యత్ అవసరాలను దృష్టిలో ఉంచుకుని రూపొందించాలని అధికారులకు సూచించారు.ఈ సమావేశంలో అమలాపురం ఆర్డీవో జి వి వి సత్యనారాయణ, దేవాదాయ శాఖ అధికారి వి సత్యనారాయణ,జిల్లా రవాణా అధికారి డి. శ్రీనివాసరావు, అగ్నిమాపక శాఖ అధికారి పార్థసారథి, ఆత్రేయపురం ఎమ్మార్వో టి. రాజేశ్వరరావు,ఇండస్ట్రీస్ జిఎం అరుణ జిఐఎస్ కోఆర్డినేటర్ లీర్తి, ఇంజినీరింగ్ విభాగాల ప్రతినిధులు తదితరులు పాల్గొన్నారు.

డా. బిఆర్ అంబేద్కర్ కోనసీమ

ఈ నెల 19న కలెక్జటరేట్‌ వద్ద జరిగే ధర్నాను జయప్రదం చేయండి:ఏపిఆర్పిఏ

అమలాపురం ఎంప్లాయీస్ హోమ్‌లో కరపత్రాల ఆవిష్కరణ ​ఆల్ పెన్షనర్స్ అండ్ రిటైర్డ్ పర్సన్స్ అసోసియేషన్ (ఏపిఆర్పిఏ) పిలుపు పున్నమి దినపత్రిక ​అమలాపురం, ఆగష్టు -17: కేంద్ర, రాష్ట్ర ప్రభుత్వ ఉద్యోగులు, ఉపాధ్యాయులు, కార్మికులు మరియు పెన్షనర్ల పెండింగ్ సమస్యలను తక్షణమే పరిష్కరించాలని డిమాండ్ చేస్తూ, ఈనెల ఆగస్టు 19వ తేదీ (బుధవారం) నాటి ‘చలో కలెక్టర్ కార్యాలయం’ ధర్నా నిరసన కార్యక్రమాన్ని జయప్రదం చేయాలని ఆల్ పెన్షనర్స్ అండ్ రిటైర్డ్ పర్సన్స్ అసోసియేషన్ ( ఏపిఆర్పిఏ) నాయకులు పిలుపునిచ్చారు.​సోమవారం అమలాపురం ఎంప్లాయీస్ హోమ్ నందు నిర్వహించిన విలేకరుల సమావేశంలో నాయకులు ఇందుకు సంబంధించిన పోస్టర్లు, కరపత్రాలను ఆవిష్కరించారు. ​ఈ సందర్భంగా సంఘ రాష్ట్ర అసోసియేట్ అధ్యక్షులు ఎం వెంకటేశ్వరరావు , జిల్లా అధ్యక్షులు కడలి సత్యనారాయణ( కేఎస్ఎన్) ప్రధాన కార్యదర్శి జి.వి. గోపాల కృష్ణ,ప్రతినిధులు మాట్లాడుతూ కేంద్ర, రాష్ట్ర ప్రభుత్వాలు ఉద్యోగ, ఉపాధ్యాయ, పెన్షనర్ల సమస్యల పట్ల తీవ్ర నిర్లక్ష్య ధోరణి అవలంబిస్తున్నాయని ఆవేదన వ్యక్తం చేశారు. న్యాయమైన కోరికలు తీర్చమని పోరాటాలు చేస్తుంటే పక్కదారి పట్టిస్తున్నారని విమర్శించారు. ​కేంద్ర ప్రభుత్వాన్ని డిమాండ్లు కోరుతూ: ​కోట్లాదిమంది పెన్షనర్లకు నష్టం కలిగించే పెన్షన్ రివాల్యుయేషన్ బిల్లు 2025ను తక్షణమే రద్దు చేయాలి. ​కేంద్ర ప్రభుత్వ ఉద్యోగులకు 8వ పీఆర్‌సీ నివేదికను రప్పించి 01.01.2026 నుండి అమలు చేయాలి, అంతవరకు మధ్యంతర భృతి (IR) (ఐఆర్) చెల్లించాలి. ​ఈపీఎస్ 95 (ఈపిఎస్95) పెన్షనర్లకు కనీస పెన్షన్ రూ. 9,000/- మరియు డిఏ కలిపి చెల్లించాలి. ​హయ్యర్ పెన్షన్ అమలుపై కోర్టు తీర్పులను వెంటనే అమలు చేయాలి. ​ఎన్‌.పి.స్, సిపిస్,యుపిస్ లను రద్దు చేసి పాత పెన్షన్ విధానాన్ని (OPS) పునరుద్ధరించాలి. ​పోస్టల్, బీఎస్‌ఎన్‌ఎల్, బ్యాంకింగ్ రంగ ఉద్యోగుల పెండింగ్ సమస్యలు పరిష్కరించాలి. ​రాష్ట్ర ప్రభుత్వాన్ని కోరుతూ: ​12వ పీఆర్‌సీ కమిషనర్ ను నియమించి 30% మధ్యంతర భృతి (ఐఆర్) ప్రకటించాలి. ​పెండింగ్‌లో ఉన్న ఐదు విడతల డి.ఎ (డిఏ) లను వెంటనే విడుదల చేయాలి. ​పెండింగ్ బకాయిలు రూ. 25 వేల కోట్లను విడతల వారీగా చెల్లించడానికి షెడ్యూల్ ప్రకటించాలి. ​సీపీఎస్ (సిపిస్) రద్దు చేసి పాత పెన్షన్ విధానాన్ని (ఓపిస్) అమలు చేయాలి. ​కాంట్రాక్ట్, అవుట్‌సోర్సింగ్ ఉద్యోగులను క్రమబద్ధీకరించాలి (రెగ్యులరైజ్ చేయాలి) ​ముఖ్యంగా అంగన్‌వాడీ, ఆశా, ఇతర అసంఘటిత రంగ కార్మికులకు వేతనాల నుండి ఈపీఎఫ్ చందాను వసూలు చేసి పెన్షన్ సదుపాయం కల్పించాలి.​ ఉద్యోగులు, ఉపాధ్యాయులు, కార్మికులు, పెన్షనర్లు మరియు ప్రజానీకం పెద్ద ఎత్తున తరలివచ్చి ఈ ధర్నా నిరసన కార్యక్రమాన్ని జయప్రదం చేయాలని, ఈ పోరాటానికి తమ మద్దతు తెలియజేసి సంఘీభావం తెలపాలని కోరడమైనదని సంఘం రాష్ట్ర కమిటీ సభ్యులు కారెం వెంకటేశ్వరరావు తెలియజేశారు ఈ కార్యక్రమంలో అధ్యక్షులు డి.శ్రీరామ్మూర్తి, కార్యదర్శులు ఎస్.కృష త్రిమూర్తులు, కండవల్లి శ్రీనివాస్, డి.నాగేంద్ర రాజు, పి.కొండలరావు, జి.రవికుమార్ తదితరులు పాల్గొన్నారు.

డా. బిఆర్ అంబేద్కర్ కోనసీమ

దేశభక్తి, సమైక్యతా స్ఫూర్తితో 80వ స్వాతంత్ర్య దినోత్సవ వేడుకలు

పున్నమి తెలుగు దినపత్రిక: అమలాపురం, ఆగస్టు 15, 2026: దేశ స్వాతంత్ర్యం కోసం ప్రాణత్యాగం చేసిన మహనీయుల త్యాగాలను స్మరించుకుంటూ, దేశ ప్రగతిలో ప్రతి ఒక్కరూ భాగస్వాములు కావాలని జిల్లా కలెక్టర్ డా. ఆర్. మహేష్ కుమార్ పిలుపునిచ్చారు. 80వ స్వాతంత్ర్య దినోత్సవాన్ని పురస్కరించుకుని శనివారం అమలాపురం కలెక్టరేట్ ప్రాంగణంలో జిల్లా కలెక్టర్ డా. ఆర్. మహేష్ కుమార్, జాయింట్ కలెక్టర్ వై. ఖోమ్. నైడియా దేవితో కలిసి స్వాతంత్ర్య సమరయోధులు, జాతిపిత మహాత్మా గాంధీ, రాజ్యాంగ నిర్మాత డాక్టర్ బి.ఆర్. అంబేద్కర్ విగ్రహాలకు పూలమాలలు వేసి ఘనంగా నివాళులర్పించారు.అనంతరం పోలీసు కవాతు నుంచి గౌరవ వందనం స్వీకరించిన జిల్లా కలెక్టర్ జాతీయ పతాకాన్ని ఆవిష్కరించారు. ఈ సందర్భంగా జిల్లా ప్రజలకు 80వ స్వాతంత్ర్య దినోత్సవ శుభాకాంక్షలు తెలిపారు. 10 కోట్ల మత్తు రహిత ప్రతిజ్ఞలు దేశవ్యాప్తంగా మాదక ద్రవ్యాల వినియోగాన్ని నిరోధించే లక్ష్యంతో నిర్వహిస్తున్న ‘నషా ముక్త్ భారత్ అభియాన్’లో భాగంగా మిషన్ స్పందన్, బ్రహ్మకుమారీస్ ఆధ్వర్యంలో నిర్వహించిన “10 కోట్ల మత్తు రహిత ప్రతిజ్ఞలు” కార్యక్రమంలో జిల్లా కలెక్టర్, జాయింట్ కలెక్టర్, ప్రజాప్రతినిధులు, పుర ప్రముఖులు, స్వచ్ఛంద సంస్థల ప్రతినిధులు, విద్యార్థినీ విద్యార్థులు పాల్గొని ప్రతిజ్ఞ చేశారు.దేశవ్యాప్తంగా 10 కోట్ల మందితో మాదక ద్రవ్యాలకు దూరంగా ఉంటామని ప్రతిజ్ఞ చేయించడమే ఈ కార్యక్రమం ప్రధాన లక్ష్యమని జిల్లా కలెక్టర్ తెలిపారు. స్వాతంత్ర్య సమరయోధుల త్యాగాలు, వారి స్ఫూర్తి ప్రతి ఒక్కరికీ ఎప్పటికీ మార్గదర్శకమని ఆయన పేర్కొన్నారు. స్వాతంత్ర్యం అనేది కేవలం హక్కులను పొందడం మాత్రమే కాదని, దేశం పట్ల బాధ్యతలను నిర్వర్తించడం కూడా అని అన్నారు.దేశం అభివృద్ధి పథంలో వేగంగా ముందుకు సాగుతోందని, ఆర్థికాభివృద్ధి, సాంకేతిక పరిజ్ఞానం, విద్య, వైద్యం, మౌలిక వసతులు తదితర రంగాల్లో గణనీయమైన పురోగతి సాధిస్తోందని తెలిపారు. అభివృద్ధి ఫలాలు సమాజంలోని ప్రతి వర్గానికి అందేలా ప్రభుత్వం అనేక సంక్షేమ, అభివృద్ధి కార్యక్రమాలను అమలు చేస్తోందన్నారు. వికసిత్ భారత్ @2047లో యువత కీలకం వికసిత్ భారత్ @2047 లక్ష్య సాధనలో యువత కీలక పాత్ర పోషించాలని జిల్లా కలెక్టర్ సూచించారు. విద్య, నైపుణ్యాభివృద్ధి, ఆవిష్కరణలు, సాంకేతికత, స్టార్టప్‌లు, సామాజిక సేవ వంటి రంగాల్లో యువత ముందుకు రావాలని పిలుపునిచ్చారు. దేశ భవిష్యత్తును నిర్మించడంలో యువశక్తి ప్రధానమైనదని పేర్కొన్నారు. జిల్లా అభివృద్ధిలో ప్రజల భాగస్వామ్యం అత్యంత ముఖ్యమని, ప్రభుత్వ పథకాలను అర్హులైన ప్రతి ఒక్కరికీ పారదర్శకంగా, సమర్థవంతంగా అందించేందుకు అధికారులు కృషి చేయాలని అన్నారు. పేదలు, మహిళలు, రైతులు, యువత, విద్యార్థులు, కార్మికులు, అణగారిన వర్గాల సంక్షేమానికి ప్రాధాన్యత ఇవ్వాలని సూచించారు. పర్యావరణ పరిరక్షణ, పరిశుభ్రత, నీటి సంరక్షణ, పచ్చదనం పెంపు వంటి అంశాల్లో ప్రజలు చురుకైన పాత్ర పోషించాలని కోరారు. “దేశ అభివృద్ధి – మన బాధ్యత” అనే భావనతో ప్రతి పౌరుడు తన వంతు కృషి చేయాలని పిలుపునిచ్చారు. ఈ సందర్భంగా జాయింట్ కలెక్టర్ మాట్లాడుతూ జాతీయ జెండా, జాతీయ గీతం, రాజ్యాంగ విలువలను గౌరవిస్తూ దేశ సమగ్రత, సార్వభౌమత్వం, సామాజిక సామరస్యాన్ని కాపాడేందుకు ప్రతి ఒక్కరూ కట్టుబడి ఉండాలని ఆకాంక్షించారు. 80వ స్వాతంత్ర్య దినోత్సవం సందర్భంగా దేశభక్తి, ఐక్యత, సమైక్యతా స్ఫూర్తిని మరింతగా పెంపొందించుకుని, అభివృద్ధి చెందిన భారతదేశ నిర్మాణంలో ప్రతి ఒక్కరూ భాగస్వాములు కావాలని ఆమె పిలుపునిచ్చారు. ఈ కార్యక్రమంలో జిల్లా రెవెన్యూ అధికారి, జిల్లా పరిపాలన అధికారి, జిల్లా అధికారులు, ప్రజాప్రతినిధులు, స్వచ్ఛంద సంస్థల ప్రతినిధులు, పుర ప్రముఖులు, విద్యార్థినీ విద్యార్థులు తదితరులు పాల్గొన్నారు. పున్నమి దినపత్రిక రిపోర్టర్‌ : శివకృష్ట.పి

డా. బిఆర్ అంబేద్కర్ కోనసీమ

*వెన్నెల గద్దర్‌ను సత్కరించిన కోరుకొండ జాన్

పున్నమి దినపత్రిక పి. గన్నవరం, ఆగస్టు 15: డా. బి.ఆర్. అంబేద్కర్ కోనసీమ జిల్లా పి. గన్నవరం ప్రాంతానికి చెందిన మమత స్వచ్ఛంద సేవా సమితి వ్యవస్థాపక అధ్యక్షులు డా. కోరుకొండ జాన్, ఆయన కుమారుడు కోరుకొండ నవీన్ కలిసి తెలంగాణ రాష్ట్ర సాంస్కృతిక శాఖ రథసారథి, ప్రజా గాయకుడు, ప్రజా యుద్ధనౌక గద్దర్ కుమార్తె డా. వెన్నెల గద్దర్‌ను ఆగస్టు 15వ తేదీ శనివారం ఉదయం 10 గంటలకు తెలంగాణ ప్రభుత్వ భాషా సాంస్కృతిక ప్రధాన కార్యాలయంలో మర్యాదపూర్వకంగా కలిసి సత్కరించారు. ఈ సందర్భంగా డా. వెన్నెల గద్దర్ మాట్లాడుతూ డా. బి.ఆర్. అంబేద్కర్ కోనసీమ జిల్లాలో మమత స్వచ్ఛంద సేవా సమితి ద్వారా గద్దర్ పేరుతో నిర్వహిస్తున్న సేవా కార్యక్రమాలను చూసి సంతోషం వ్యక్తం చేసి, అభినందించారు. రానున్న రోజుల్లో మరిన్ని సేవా కార్యక్రమాలు చేపట్టాలని ఆకాంక్షించారు.తన తండ్రి గద్దర్ పేరుతో ఆంధ్రప్రదేశ్, తెలంగాణ రాష్ట్రాల్లోని అన్ని జిల్లాల్లో ఒక ప్రణాళికను రూపొందించి సేవా కార్యక్రమాలను మరింత విస్తరించాలని ఆమె సూచించారు. ఈ సందర్భంగా మమత స్వచ్ఛంద సేవా సమితి వ్యవస్థాపక అధ్యక్షులు డా. కోరుకొండ జాన్, డా. వెన్నెల గద్దర్‌కు చేతి గడియారాన్ని బహూకరించి సత్కరించారు. # శివకృష్ణ.పినిపే- పున్నమి దినపత్రిక

కర్నూలు

బైలుప్పల ఎంపీపీ స్కూల్ లో ఘనంగా స్వాతంత్ర దినోత్సవ వేడుకలు

స్కూల్ ఆవరణం లో పండగ వాతావరణం పిల్లలకు ఉపాధ్యాయులు స్వాతంత్ర దినోత్సవ సందర్భంగా స్వాతంత్రం కోసం పోరాడిన మనహనుభావుల గురించి పిల్లలు తెలియజేశారు. ఈ కార్యక్రమంలో HM కలాం భాషా గారు, మాజీ సర్పంచు మరియు ఎంపీటీసీ గారు అలాగే పంచాయతీ సెక్రెటరీ బాలరాజు గారు అగ్రికల్చర్ అసిస్టెంట్ రహీం భాష గారు వెల్ఫేర్ అసిస్టెంట్ నరసింహుడు గారు డిజిటల్ అసిస్టెంట్ జై వీరు గారు ఈ కార్యక్రమంలో పాల్గొని విజయవంతం చేయడం జరిగింది Uploaded Video:

డా. బిఆర్ అంబేద్కర్ కోనసీమ

ఎస్పీ కార్యాలయంలో రెపరెపలాడిన జాతీయ పతాకం

ఎస్పీ క్యాంపు కార్యాలయంలో 80వ స్వాతంత్ర్య ఘనంగా వేడుకలు జెండా వందనం చేసిన ఎస్పీ పోలీసు సిబ్బందికి శుభాకాంక్షలు తెలిపిన ఎస్పీ పున్నమి దినపత్రిక, ఆగస్టు 15: డా.బి.ఆర్.అంబేద్కర్ కోనసీమ జిల్లా ఎస్పీ రాహుల్ మీనా, ఐపీఎస్ ఆధ్వర్యంలో ఎస్పీ క్యాంపు కార్యాలయంలో 80వ స్వాతంత్ర్య దినోత్సవ వేడుకలు ఘనంగా నిర్వహించారు. ఈ సందర్భంగా ఎస్పీ రాహుల్ మీనా జాతీయ పతాకాన్ని ఆవిష్కరించి జెండా వందనం చేశారు. అనంతరం పోలీసు సిబ్బంది నుంచి గౌరవ వందనంఈ సందర్భంగా ఎస్పీ రాహుల్ మీనా పోలీసు అధికారులు, సిబ్బందికి 80వ స్వాతంత్ర్య దినోత్సవ శుభాకాంక్షలు తెలిపారు. దేశ సేవలో పోలీసు శాఖ కీలక పాత్ర పోషిస్తోందని, ప్రజల భద్రత, శాంతిభద్రతల పరిరక్షణలో ప్రతి ఒక్కరూ అంకితభావంతో విధులు నిర్వర్తించాలని సూచించారు. అనంతరం పోలీసు సిబ్బందికి మిఠాయిలు పంపిణీ చేశారు. ఈ కార్యక్రమంలో జిల్లా పోలీస్ కార్యాలయ అధికారులు, ఎస్బీ సీఐ పుల్లారావు, డీసీఆర్‌బీ సీఐ రాజేష్, సోషల్ మీడియా సీఐ తమ్మినాయుడు, ఆర్‌ఐ బ్రహ్మానందం, ఆర్‌ఎస్‌ఐ ఏసుబాబు, పోలీసు అధికారులు, సిబ్బంది పాల్గొన్నారు. *# శివకృష్ణ.పినిపే -పున్నమి దినపత్రిక*

ఆంధ్రప్రదేశ్ జాతీయ అంతర్జాతీయ తెలంగాణ

ప్రజలందరికీ రాఖీ పండుగ శుభాకాంక్షలు

భారతీయ సంస్కృతిలో రాఖీ పండుగ రోజు అన్న, తమ్ములకు ఆడబిడ్డల ఆశీర్వాదం హైదరాబాద్, ఆగస్టు 09, పున్నమి ప్రతినిధి; రాఖీ, రక్షా బంధన్ లేదా రాఖీ పౌర్ణమి అని పిలిచే ఈ పండుగను కొన్ని ప్రాంతాలలో శ్రావణ పౌర్ణమి లేదా జంద్యాల పూర్ణిమ అని కూడా పిలుస్తారు. అన్నాచెల్లెళ్లు లేదా అక్కాతమ్ముళ్ల మధ్యన ప్రేమానురాగాలకు సూచకంగా ఈ పండుగను జరుపుకుంటారు. రాఖీ అనగా రక్షణ బంధం. చెల్లి తన అన్నయ్య మహోన్నత శిఖరాలకు ఎదగాలని కోరుకుంటూ అన్నయ్యకు కట్టేదే ఈ రాఖీ. రాఖీపౌర్ణమి నాడు నిత్యపూజలు చేసి ఇంటిలో ఒక చోట ముగ్గు, పీట వేసి సోదరుడుని కూర్చోబెట్టి బొట్టు పెట్టి రాఖీ కట్టవలెను. మిఠాయిలు తినిపించవలెను. సోదరుడు కృతజ్ఞతగా తన సోదరికి ధనము, బట్టలు, నగలు గానీ కానుకగా ఇవ్వడం ఆచారం. పూర్వం దేవతలకు, రాక్షసులకు మధ్య పుష్కరకాలం యుద్ధం సాగింది. యుద్ధంలో ఓడిపోయిన దేవతల రాజు దేవేంద్రుడు తన పరివారమంతటినీ కూడగట్టుకొని అమరావతిలో తలదాచుకుంటాడు. భర్త నిస్సాహాయతను చూసిన ఇంద్రాణి తరుణోపాయం ఆలోచిస్తుంది. భర్త దేవేంద్రుడికి సమరం చేయడానికి ఉత్సాహాన్ని కల్పిస్తుంది. సరిగ్గా ఆ రోజు శ్రావణ పౌర్ణమి కావడంతో పార్వతీ పరమేశ్వరులను, లక్ష్మీనారాయణులను పూజించి రక్షాను దేవేంద్రుడి చేతికి కడుతుంది. అది గమనించిన దేవతలందరూ వారు పూజించిన రక్షలను తీసుకువచ్చి ఇంద్రుడికి కట్టి పంపుతారు. సమరంలో గెలిచిన ఇంద్రుడు తిరిగి త్రిలోక ఆధిపత్యాన్ని పొందుతాడు. శచీదేవి ప్రారంభించిన ఆ రక్షాబంధనం.. నేడు రాఖీ పండుగగా ఆచారమైందని పురాణాలు చెబుతున్నాయి. ఇతిహాసాల ప్రకారం చూస్తే ద్రౌపది, శ్రీకృష్ణుడి కి అన్నాచెల్లెల అనుబంధం అత్యంత గొప్పగా కనిపిస్తుంది. శిశుపాలుడి ని శిక్షించే క్రమంలో సుదర్శన చక్రాన్ని ప్రయోగించిన కృష్ణుని చూపుడు వేలుకు రక్తం ధారగా కారుతుందట. అది గమనించిన ద్రౌపది తన పట్టుచీర కొంగు చింపి వేలికి కట్టు కట్టిందట. దానికి కృతజ్ఞతగా ఎల్లవేళలా అండగా ఉంటానని శ్రీకృష్ణుడు ద్రౌపదికి హామీ ఇస్తాడు. అందుకు ప్రతిగా దుశ్శాసనుడి దురాగతం నుండి ఆమెను కాపాడుతాడు. శ్రీ మహావిష్ణువు బలి చక్రవర్తి కోరిక మేరకు అతనితోపాటు పాతాళంలో ఉండిపోతాడు. శ్రీమహాలక్ష్మి వెళ్లి బలిచక్రవర్తికి రక్షాబంధంకట్టి, తన భర్తను వైకుంఠానికి తీసుకొనిపోతుంది. అందుకే రక్షాబంధానికి ఇంత ప్రాధాన్యత ఏర్పడింది. యేన బద్ధో బలీరాజా దానవేంద్రో మహాబలః |తేన త్వామభి బధ్నామి రక్షమాచల మాచల || -పై శ్లోకాన్ని పఠిస్తూ సోదరి-సోదరునకు విజయ ప్రాప్తి కోసం సోదరుని ముంజేతికి రాఖీ కట్టవలెను. శ్రీ మహావిష్ణువు శక్తిచే మహాబలుడు అయిన బలిచక్రవర్తిని బంధించినట్లుగా, ఓ రక్షాబంధనమా ! నీవు చలించక వీనికి రక్షణ కల్పించుము అని పై శ్లోకం అర్దం.