Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: ఎలమంచిలి

అనకాపల్లి

రైతు మృతిపై కరణం ధర్మశ్రీ ఆవేదన

మృతదేహానికి గౌరవం ఇవ్వకుండా టెంట్‌ ఏర్పాటుకు అడ్డంకులా? పున్నమి ప్రతినిధి ఆనంద్ (జిల్లా బ్యూరో ) రాంబిల్లి: మండలంలోని గొరపూడి పంచాయతీలో భూసేకరణ కార్యక్రమం సందర్భంగా చోటుచేసుకున్న తోపులాటలో రైతు గుండెపోటుతో మృతి చెందిన ఘటనపై యలమంచిలి నియోజకవర్గ సమన్వయకర్త కరణం ధర్మశ్రీ తీవ్ర ఆవేదన వ్యక్తం చేశారు. మృతి చెందిన రైతు కుటుంబాన్ని పరామర్శించేందుకు వెళ్లిన ఆయనకు.. అంత్యక్రియల సమయంలో టెంట్‌ ఏర్పాటు చేసుకునేందుకు అధికారులు, పోలీసులు అనుమతించలేదనే విషయం దృష్టికి వచ్చింది. దీంతో ఆయన తీవ్ర అసహనం వ్యక్తం చేశారు. రైతు మృతి చెందిన విషాద సమయంలోనైనా మానవత్వంతో వ్యవహరించాల్సిన అవసరం ఉందని ధర్మశ్రీ పేర్కొన్నారు. కనీసం అంత్యక్రియలకు టెంట్‌ ఏర్పాటు చేసుకునే అవకాశం కూడా ఇవ్వకపోవడం ఏమిటని ప్రశ్నించారు. ఈ విషయంపై ఆర్డీవోతో ఫోన్‌లో మాట్లాడి అధికారుల తీరుపై తీవ్ర స్థాయిలో అసంతృప్తి వ్యక్తం చేశారు. మృతి చెందిన రైతు కుటుంబానికి గౌరవం కల్పించాల్సిన బాధ్యత అధికారులపై ఉందని స్పష్టం చేశారు.

అనకాపల్లి

పచ్చదనం.. పరిశుభ్రతే ధ్యేయం ప్రతి ఆదివారం శ్రమదానంతో ఆదర్శంగా నిలుస్తున్న గ్రామ జ్యోతి యువత

పున్నమి ప్రతినిధి ఆనంద్ యలమంచిలి: గ్రామాభివృద్ధి, పర్యావరణ పరిరక్షణలో భాగంగా యలమంచిలి మున్సిపాలిటీ 23వ వార్డు కొక్కిరాపల్లి గ్రామానికి చెందిన గ్రామ జ్యోతి యువత ప్రతి ఆదివారం శ్రమదానం చేపడుతున్నారు. ఆదివారం ఉదయం 6.30 నుంచి 8.30 గంటల వరకు గ్రామంలోని పలు ప్రాంతాల్లో పరిశుభ్రత కార్యక్రమాలు నిర్వహిస్తున్నారు. ఈ ఆదివారం గ్రామ ప్రధాన మార్గంలోని శివాలయం వద్ద రహదారికి ఇరువైపులా పెరిగిన పిచ్చిమొక్కలు, తీగలు, చెత్తాచెదారాన్ని తొలగించి పరిసరాలను శుభ్రం చేశారు. రోడ్డు పక్కన పిచ్చిమొక్కలు, చెత్త పేరుకుపోవడం వల్ల విషపురుగులు, విషజంతువుల సంచారంతో ప్రయాణికులకు ఇబ్బందులు కలగకుండా ముందస్తు చర్యగా శుభ్రత చేపట్టారు. అనంతరం రహదారి ఇరువైపులా చెత్త, ప్లాస్టిక్ వ్యర్థాలు వేయవద్దని ప్రయాణికులకు చేతులెత్తి నమస్కరిస్తూ విజ్ఞప్తి చేశారు. గ్రామ పరిసరాలను పరిశుభ్రంగా ఉంచడం ప్రతి ఒక్కరి బాధ్యత అని తెలిపారు. కార్యక్రమంలో గ్రామ జ్యోతి యువత సభ్యులు నిఖిల్, జయరాజ్, దరిణి, యామిని, రజని, సీతా మహాలక్ష్మితో పాటు పలువురు చిన్నారులు పాల్గొన్నారు

అనకాపల్లి

వరాహ నది బ్రిడ్జి కింద వ్యర్థాల డంపింగ్‌పై గ్రామస్థుల ఆందోళన

స్మశానవాటిక దారికి చెత్త అడ్డంకి! పున్నమి ప్రతినిధి ఆనంద్ (జిల్లా బ్యూరో ) ఏటికొప్పాక గ్రామంలోని వరాహ నది బ్రిడ్జి కింద చెత్త, వ్యర్థ పదార్థాలను వేస్తుండటంతో స్మశానవాటికకు వెళ్లే దారి ఇబ్బందికరంగా మారిందని గ్రామస్థులు ఆవేదన వ్యక్తం చేస్తున్నారు. గ్రామంలో సేకరించిన చెత్తను పారిశుద్ధ్య కార్మికులు బ్రిడ్జి కిందకు తరలించి వేస్తుండటంతో అక్కడ వ్యర్థాలు పేరుకుపోతున్నాయని చెబుతున్నారు. ముఖ్యంగా ఇదే మార్గం మీదుగా మృతదేహాలను స్మశానవాటికకు తరలిస్తుండగా, చెత్త కారణంగా వాహనాల రాకపోకలకు ఆటంకం ఏర్పడుతోందని ప్రజలు పేర్కొంటున్నారు. దీంతో అత్యవసర సమయంలో కుటుంబ సభ్యులు, బంధువులు తీవ్ర ఇబ్బందులు ఎదుర్కొంటున్నారని తెలిపారు. సంబంధిత పంచాయతీ అధికారులు, కార్యదర్శి వెంటనే స్పందించి బ్రిడ్జి కింద పేరుకుపోయిన చెత్తను తొలగించి మార్గాన్ని శుభ్రం చేయించాలని కోరుతున్నారు. చెత్తను ఇష్టానుసారంగా వేయకుండా డంపింగ్ యార్డు లేదా చెత్త నుంచి సంపద తయారీ కేంద్రానికి తరలించి శాస్త్రీయంగా నిర్వహించాలని గ్రామస్థులు విజ్ఞప్తి చేస్తున్నారు.

అనకాపల్లి

లారస్ ఫార్మా భూసేకరణపై సీపీఎం ఆగ్రహం

రైతులకు న్యాయం చేయాలని డిమాండ్.. నలుగురు సీపీఎం నాయకుల అరెస్ట్ పున్నమి ప్రతినిధి ఆనంద్ (జిల్లా బ్యూరో ) రాంబిల్లి: లారస్ ఫార్మా కంపెనీ కోసం అప్పన్నపాలెం, గోరపూడి, జెడ్‌ చింతవ గ్రామాల రైతుల భూములను సేకరించే చర్యలను సీపీఎం తీవ్రంగా వ్యతిరేకించింది. రైతులకు మద్దతుగా వెళ్లిన సీపీఎం జిల్లా కార్యదర్శివర్గ సభ్యుడు ఆర్‌. శంకరరావు, మండల కార్యదర్శి జి. దేముడు నాయుడు, మండల కమిటీ సభ్యులు ధోని కాశి, ఎర్రిపల్లి రాములను పోలీసులు అరెస్టు చేసి రాంబిల్లి పోలీస్ స్టేషన్‌కు తరలించారని పార్టీ పేర్కొంది. సుమారు 576 ఎకరాల జిరాయితీ, ప్రభుత్వ భూముల సేకరణకు ప్రభుత్వం చర్యలు చేపడుతోందని తెలిపింది. పరిహారం, ఆర్‌అండ్‌ఆర్‌ ప్యాకేజీలపై రైతులు హైకోర్టును ఆశ్రయించిన నేపథ్యంలో భూసేకరణ చర్యలు నిలిపివేయాలని డిమాండ్ చేసింది. న్యాయస్థానంలో వ్యవహారం కొనసాగుతుండగా పోలీసు బలగాలను మోహరించి కంచె ఏర్పాటు చేయడం అన్యాయమని విమర్శించింది. రైతులకు న్యాయమైన పరిహారం, పునరావాస ప్యాకేజీలు చెల్లించిన తర్వాతే భూసేకరణ చేపట్టాలని సీపీఎం డిమాండ్ చేసింది. Uploaded Video:

అనకాపల్లి

ఏటికొప్పాకలో ఆరు అంగన్వాడీ కేంద్రాల టీచర్లకు సత్కారం

సేవా సంకల్ప అభియాన్‌లో అంగన్వాడీ సిబ్బందికి ఘన సన్మానం పున్నమి ప్రతినిధి ఆనంద్ ( జిల్లా బ్యూరో) ఏటికొప్పాక: ఎలమంచిలి రూరల్ మండలం ఏటికొప్పాక గ్రామంలో సేవా సంకల్ప అభియాన్‌లో భాగంగా అంగన్వాడీ ఉత్సవ కార్యక్రమాన్ని ఘనంగా నిర్వహించారు. భారతీయ జనతా పార్టీ మండల అధ్యక్షులు అగ్రహారపు కుమారస్వామి ఆధ్వర్యంలో జరిగిన ఈ కార్యక్రమంలో గ్రామంలోని ఆరు అంగన్వాడీ కేంద్రాల టీచర్లను శాలువాలతో ఘనంగా సత్కరించారు. అంగన్వాడీ కేంద్రాల ద్వారా చిన్నారులకు అందుతున్న సేవలను గుర్తిస్తూ టీచర్లను అభినందించారు. చిన్నారుల ఆరోగ్యం, విద్య, పోషణలో అంగన్వాడీ సిబ్బంది చేస్తున్న సేవలు ప్రశంసనీయమని నిర్వాహకులు పేర్కొన్నారు. కార్యక్రమంలో బీజేపీ మండల ప్రధాన కార్యదర్శి నూకరాజు, మండల యువమోర్చా అధ్యక్షులు కడారి అప్పలరాజు, మండల కిసాన్ మోర్చా కార్యదర్శి సురేష్ తదితరులు పాల్గొన్నారు. సేవా కార్యక్రమాలను నిరంతరం కొనసాగిస్తామని నాయకులు తెలిపారు.

అనకాపల్లి

అచ్యుతాపురంలో టీడీపీ విస్తృత స్థాయి సమావేశం విజయవంతం

పున్నమి ప్రతినిధి ఆనంద్ (జిల్లా బ్యూరో ) అచ్యుతాపురం: ఎలమంచిలి నియోజకవర్గ టీడీపీ విస్తృత స్థాయి సమావేశం శనివారం అచ్యుతాపురం ఎస్‌కేఆర్ ఫంక్షన్ హాల్‌లో ఘనంగా జరిగింది. ఏపీ ఆర్‌డీసీ చైర్మన్, నియోజకవర్గ ఇన్‌చార్జి ప్రగడ నాగేశ్వరరావు అధ్యక్షతన నిర్వహించిన సమావేశానికి మాజీ ఎంపీ పప్పల తిరుపతిరావు, మాజీ జడ్పీ చైర్మన్ లాలం భవాని భాస్కర్ హాజరయ్యారు. కూటమి ప్రభుత్వం అమలు చేస్తున్న అభివృద్ధి, సంక్షేమ పథకాలను ప్రజల్లోకి విస్తృతంగా తీసుకెళ్లాలని నాయకులు పిలుపునిచ్చారు. రాబోయే స్థానిక సంస్థల ఎన్నికల్లో సమన్వయంతో పనిచేసి పార్టీ విజయానికి కృషి చేయాలని సూచించారు. పప్పల చలపతిరావు, గోంతిన హరీష్, పీలా తులసీరామ్, గొర్లె శివనారాయణమూర్తి (నానాజీ), ఇత్తంశెట్టి సన్యాసినాయుడు, లాలం శ్రీభరత్ తదితరులు పాల్గొన్నారు. నాలుగు మండలాల పార్టీ అధ్యక్షులు తమ అభిప్రాయాలు, సూచనలు వెల్లడించారు. అనంతరం 43 మంది బాధితులకు రూ.25.50 లక్షల విలువైన సీఎంఆర్‌ఎఫ్ చెక్కులు పంపిణీ చేశారు. కార్యక్రమంలో కాపు కార్పొరేషన్ డైరెక్టర్ మామిడి శివఅప్పారావు, యాదవ కార్పొరేషన్ డైరెక్టర్ దూళి రంగనాయకులు, గవర కార్పొరేషన్ డైరెక్టర్ భీమరశెట్టి శ్రీనివాసరావు, మాదిగ కార్పొరేషన్ డైరెక్టర్ డొక్కా నాగభూషణం, దాడి రమేష్, ఆడారి సాంబశివరావు తదితరులు పాల్గొన్నారు.

అనకాపల్లి

జన్మదిన వేడుకల్లో సేవా స్ఫూర్తి

గ్రామ జ్యోతి యువతకు పెన్నుల పంపిణీ.. బేరా శ్రీనివాసరావు–శ్రీదేవి దంపతులకు అభినందనలు పున్నమి ప్రతినిధి ఆనంద్ ( జిల్లా బ్యూరో ( యలమంచిలి మున్సిపాలిటీ 23వ వార్డు పరిధిలోని కొక్కిరపల్లి గ్రామానికి చెందిన మార్గదర్శకులు, మద్రాస్ వాస్తవ్యులు బేరా శ్రీనివాసరావు–శ్రీదేవి దంపతులు తమ జన్మదిన సందర్భంగా గ్రామ జ్యోతి యువతకు పెన్నులు పంపిణీ చేశారు. గ్రామాభివృద్ధి, ప్రజా శ్రేయస్సు, పర్యావరణ పరిరక్షణ, పరిసరాల పరిశుభ్రత వంటి కార్యక్రమాల్లో చురుకుగా పాల్గొంటున్న యువతను అభినందించి, ప్రోత్సహించాలనే ఉద్దేశంతో ఈ కార్యక్రమం నిర్వహించారు. వివేకానంద రీడింగ్ బుక్స్ గ్రంథాలయం వద్ద గ్రామ పెద్దలు భైరవభట్ల శివరాం చేతుల మీదుగా గ్రామ జ్యోతి యువతతో పాటు చిన్నారులకు పెన్నులు అందజేశారు. ఈ సందర్భంగా యువత బేరా శ్రీనివాసరావు–శ్రీదేవి దంపతులకు జన్మదిన శుభాకాంక్షలు తెలియజేసి, తమను ప్రోత్సహిస్తున్నందుకు కృతజ్ఞతలు తెలిపారు. కార్యక్రమంలో మాజీ కౌన్సిలర్ మజ్జి రామకృష్ణ, గ్రామ జ్యోతి యువత సభ్యులు దేవి ప్రసాద్, యస్వంత్, నాగేష్, ఆనంద్, నిఖిల్, దరిణి, యామిని, శ్రావణి తదితరులతో పాటు చిన్నారులు పాల్గొన్నారు.

అనకాపల్లి

మర్రిబంద జంక్షన్‌లో ఘోర రోడ్డు ప్రమాదం

ఆగి ఉన్న ట్రాలీని వెనుక నుంచి ఢీకొన్న ఫ్రూట్స్ లోడ్ టాటా ఇంట్రా వ్యాన్.. డ్రైవర్, క్లీనర్ మృతి పున్నమి ప్రతినిధి ఆనంద్ (జిల్లా బ్యూరో ) యలమంచిలి మండలం మర్రిబంద జంక్షన్ వద్ద శనివారం తెల్లవారుజామున ఘోర రోడ్డు ప్రమాదం చోటుచేసుకుంది. ఉదయం సుమారు 5 గంటల సమయంలో తుని నుంచి అనకాపల్లి వైపు ఫ్రూట్స్ లోడ్‌తో వెళ్తున్న AP 39 WR 3630 నంబర్ గల టాటా ఇంట్రా వ్యాన్.. రహదారి పక్కన నిలిపి ఉన్న OD 07 BG 0870 నంబర్ గల ట్రాలీని వెనుక నుంచి బలంగా ఢీకొట్టింది. ఈ ప్రమాదంలో వ్యాన్‌లో ప్రయాణిస్తున్న డ్రైవర్, క్లీనర్ ఇద్దరూ అక్కడికక్కడే మృతి చెందినట్లు సమాచారం. మృతులు గుంటూరు జిల్లా నరసరావుపేటకు చెందినవారిగా ప్రాథమికంగా గుర్తించినట్లు తెలిసింది. ప్రమాద సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని పరిశీలించారు. మృతదేహాలను పోస్టుమార్టం నిమిత్తం తరలించే చర్యలు చేపట్టారు. ప్రమాదానికి గల పూర్తి కారణాలపై పోలీసులు దర్యాప్తు చేస్తున్నారు.

అనకాపల్లి

పారిశుద్ధ్య కార్మికుల ఆరోగ్యానికి భరోసా

సేఫ్టీ పరికరాలు.. ప్రత్యేక వైద్య పరీక్షలకు హామీ పున్నమి ప్రతినిధి ఆనంద్ (జిల్లా బ్యూరో ) ఏటికొప్పాక: మహాత్మా గాంధీ జయంతి సందర్భంగా ఏటికొప్పాక గ్రామ పంచాయతీ ఆధ్వర్యంలో శుక్రవారం ప్రత్యేక కార్యక్రమం నిర్వహించారు. ఈ సందర్భంగా పంచాయతీ ప్రత్యేక అధికారి, ఎంపీపీ రాజన్న శేషగిరిరావు (శేషు) గాంధీజీ విగ్రహానికి పూలమాల వేసి ఘనంగా నివాళులర్పించారు. అనంతరం నిర్వహించిన గ్రామసభలో గ్రామ సమస్యలతో పాటు పారిశుద్ధ్య కార్మికుల సమస్యలపై చర్చించారు. విధి నిర్వహణలో కార్మికులు ఎదుర్కొంటున్న ఆరోగ్య సమస్యలను తెలుసుకుని, వారికి అవసరమైన సేఫ్టీ ఎక్విప్‌మెంట్ అందించాలని కోరారు. దీనిపై స్పందించిన ఎంపీపీ రాజన్న శేషగిరిరావు (శేషు) కార్మికుల ఆరోగ్య సమస్యలను తెలుసుకుని అవసరమైన వారిని ప్రత్యేక ఆసుపత్రికి తీసుకెళ్లి వైద్య పరీక్షలు చేయిస్తామని తెలిపారు. కార్మికుల భద్రత, ఆరోగ్య పరిరక్షణకు అవసరమైన చర్యలు తీసుకుంటామని హామీ ఇచ్చారు. ఈ కార్యక్రమంలో అన్నం స్వరాజరావు, గొంతుమూర్తి కొండయ్య నాయుడు, రావి చలపతి, బజంత్రీల శ్రీను, సచివాలయ సిబ్బంది, గ్రామ పెద్దలు, గ్రామ ప్రజలు పాల్గొన్నారు.

అనకాపల్లి

ఏటికొప్పాక పంచాయతీకి స్వచ్ఛత కిరీటం జిల్లా స్థాయి స్వచ్ఛ ఆంధ్ర అవార్డుతో ఘన గౌరవం

పున్నమి ప్రతినిధి ఆనంద్ (జిల్లా బ్యూరో) అనకాపల్లి, అక్టోబర్ 2: మహాత్మా గాంధీ జయంతి సందర్భంగా శుక్రవారం అనకాపల్లి పెంటకోట కన్వెన్షన్‌లో రాష్ట్ర ప్రభుత్వం ఆధ్వర్యంలో జిల్లా కలెక్టర్ విజయ్ కృష్ణన్ నేతృత్వంలో స్వచ్ఛ ఆంధ్ర అవార్డ్స్–2026 జిల్లా స్థాయి అవార్డుల ప్రదానోత్సవం నిర్వహించారు. రాష్ట్ర హోం శాఖ మంత్రి వంగలపూడి అనిత, మాజీ మంత్రి, అనకాపల్లి ఎమ్మెల్యే కొణతాల రామకృష్ణ పాల్గొన్నారు. స్వచ్ఛత కోసం అంకితభావంతో సేవలందించిన 67 మంది స్వచ్ఛ వారియర్స్‌కు అవార్డులు అందజేశారు. ఇందులో ఏటికొప్పాక గ్రామ పంచాయతీ కార్యదర్శి కె. గిరి ప్రసాద్ రావు స్వచ్ఛత, పారిశుధ్య రంగంలో అందించిన సేవలకు జిల్లా స్థాయి అవార్డు అందుకున్నారు. ప్రధాని నరేంద్ర మోదీ నిర్దేశించిన వికసిత భారత్–2047 లక్ష్యానికి అనుగుణంగా, ముఖ్యమంత్రి నారా చంద్రబాబు నాయుడు సంకల్పంతో స్వచ్ఛ ఆంధ్రప్రదేశ్–స్వర్ణాంధ్రప్రదేశ్ సాధనకు ప్రతి ఒక్కరూ భాగస్వాములు కావాలని ఎమ్మెల్యే కొణతాల రామకృష్ణ పిలుపునిచ్చారు. కార్యక్రమంలో పీలా గోవింద సత్యనారాయణ, జాయింట్ కలెక్టర్ శౌర్యమాన్ పటేల్, జోనల్ కమిషనర్ చక్రవర్తి, అధికారులు పాల్గొన్నారు.