ఎమ్మెల్యే సుధీర్ రెడ్డిపై ఆరోపణలు అబద్ధం… పోలీస్ స్టేషన్లో ఫిర్యాదు నమోదు
శ్రీకాళహస్తి ఎమ్మెల్యే బొజ్జల వెంకట సుధీర్ రెడ్డిపై జనసేన పార్టీకి చెందిన మాజీ, బహిష్కృత నేతలు కోట వినుత, కోట చంద్రబాబు నాయుడు చేసిన అసభ్యకర వ్యాఖ్యలను తెలుగుదేశం పార్టీ నాయకులు తీవ్రంగా ఖండించారు. పోలీసు వ్యవస్థ ఎమ్మెల్యేకు అనుకూలంగా “గుండాల్లా వ్యవహరిస్తోంది” అన్న ఆరోపణలు పూర్తిగా అసత్యమని స్పష్టం చేశారు. శ్రీకాళహస్తి పట్టణంలోని తెలుగుదేశం పార్టీ కార్యాలయంలో నిర్వహించిన విలేకరుల సమావేశంలో పార్టీ నాయకులు విజయ్ కుమార్, కాసరం రమేష్, నాగమల్లి దుర్గాప్రసాద్, జి. గోపీనాథ్, షకీర్ అలీ, కె. సుధాకర్ రెడ్డి, మహిళా నాయకులు అనిత, సుమతమ్మ మాట్లాడారు. జనసేన పార్టీ అధినేత పవన్ కళ్యాణ్ స్వయంగా బహిష్కరించిన కోట వినుతకు ప్రస్తుతం పార్టీతో ఎలాంటి సంబంధం లేదని పేర్కొన్నారు. ఎమ్మెల్యే సుధీర్ రెడ్డికి సంబంధం లేకుండా, చట్టబద్ధ అనుమతులు లేని అక్రమ నిర్మాణాన్ని మున్సిపల్ అధికారులు కూల్చివేశారని తెలిపారు. చట్టపరమైన వ్యవహారాల్లో ఎవరైనా తప్పు చేస్తే, వారు తమ పార్టీ వారైనా సరే ఎమ్మెల్యే ఎప్పుడూ సహించరని అన్నారు. అలాంటి నిష్పక్షపాత నాయకుడిపై అసత్య ఆరోపణలు చేయడం, అసభ్యంగా మాట్లాడడం పూర్తిగా అనైతికమని ఆగ్రహం వ్యక్తం చేశారు. కోట వినుత, ఆమె భర్త కోట చంద్రబాబు నాయుడుకు గట్టి హెచ్చరిక జారీ చేస్తూ, ఇకముందు ఎమ్మెల్యేపై అసత్య ప్రచారాలు, అనుచిత వ్యాఖ్యలు చేస్తే సహించబోమని స్పష్టం చేశారు. అవసరమైతే అదే స్థాయిలో ప్రతిస్పందిస్తామని హెచ్చరించారు. ఈ ఘటనపై శ్రీకాళహస్తి 1వ పట్టణ పోలీస్ స్టేషన్లో కోట వినుత, కోట చంద్రబాబు నాయుడులపై ఫిర్యాదు నమోదు చేసినట్లు తెలిపారు. పోలీసులు చట్టబద్ధంగా వ్యవహరించి, సంబంధిత వ్యక్తులను అరెస్ట్ చేసి విచారణ జరిపి, ఇలాంటి రాజకీయ కుట్రలకు చెక్ పెట్టాలని కోరారు. ఈ కార్యక్రమంలో తెలుగుదేశం పార్టీ నాయకులు, కార్యకర్తలు పాల్గొన్నారు.
thiruveedulasivakumar- April 6, 2026
- 0 Comments
- 15 Views
-
