ఇద్దరికి రూ.6.08 లక్షల ఎల్.ఓ.సీలు మంజూరు.
మైలవరం నియోజకవర్గంలో పేదల వైద్య చికిత్సలకు ఆర్థిక భరోసా.
ఎమ్మెల్యే వసంత వెంకట కృష్ణప్రసాద్ గారి చొరవతో బాధిత కుటుంబాలకు వైద్య సహాయం.
ఎన్టీఆర్ జిల్లా, గొల్లపూడి, అక్టోబర్ 14:
వైద్య చికిత్సల కోసం ఆర్థిక ఇబ్బందులు ఎదుర్కొంటున్న పేద కుటుంబాలకు అండగా నిలుస్తూ, మైలవరం నియోజకవర్గంలో ఇద్దరికి మొత్తం రూ.6,08,147 విలువైన లెటర్ ఆఫ్ క్రెడిట్ (ఎల్.ఓ.సీ.)లను మంజూరు చేశారు. మైలవరం శాసనసభ్యులు, టీడీపీ రాష్ట్ర అధికార ప్రతినిధి వసంత వెంకట కృష్ణప్రసాద్ గారు బుధవారం విజయవాడ రూరల్ మండలం గొల్లపూడిలోని తన ఎమ్మెల్యే కార్యాలయంలో ఈ ఎల్.ఓ.సీలను బాధిత కుటుంబాలకు అందజేశారు.
విజయవాడ రూరల్ మండలం జక్కంపూడి-1 గ్రామానికి చెందిన జుజ్జవరపు దైవిక్ గారికి అవసరమైన వైద్య చికిత్స నిమిత్తం రూ.2,53,500, జి.కొండూరు మండలంలోని కవులూరుకు చెందిన డి. విష్ణువర్ధన్ రావు గారికి రూ.3,54,647 విలువైన ఎల్.ఓ.సీ మంజూరయ్యాయి. ఈ రెండు ఎల్.ఓ.సీల ద్వారా మొత్తం రూ.6.08 లక్షలకు పైగా వైద్య సహాయం అందుబాటులోకి వచ్చింది.
ఈ సందర్భంగా ఎమ్మెల్యే వసంత వెంకట కృష్ణప్రసాద్ గారు మాట్లాడుతూ, వైద్య చికిత్సల కోసం పేద ప్రజలు పడుతున్న ఇబ్బందులను అర్థం చేసుకుని, వారికి అవసరమైన ఆర్థిక సహాయం అందించేందుకు కృషి చేస్తున్నట్లు తెలిపారు. అర్హులైన బాధిత కుటుంబాలకు వైద్య చికిత్సలో ఆర్థిక ఇబ్బందులు అడ్డంకిగా మారకూడదనే ఉద్దేశంతో, అందిన అభ్యర్థనలపై తక్షణమే స్పందించి గంటల వ్యవధిలోనే ఎల్.ఓ.సీల మంజూరుకు చర్యలు తీసుకుంటున్నట్లు పేర్కొన్నారు.
ప్రజల ఆరోగ్యానికి, సంక్షేమానికి ప్రాధాన్యతనిస్తూ వైద్య సహాయం అందిస్తున్న ముఖ్యమంత్రి నారా చంద్రబాబు నాయుడు గారికి ఈ సందర్భంగా కృతజ్ఞతలు తెలిపారు. పేద కుటుంబాలకు వైద్య భరోసా కల్పించేందుకు ప్రభుత్వం అందిస్తున్న సహాయాన్ని అవసరమైన వారు సద్వినియోగం చేసుకోవాలని పేర్కొన్నారు.
