దళిత మహిళను అవమానించిన తహశీల్దార్‌ను సస్పెండ్ చేయాలి
అర్హత ఉన్నా సావిత్రమ్మకు పింఛన్ ఎందుకు ఇవ్వరు?
‘దళితులు వస్తే పని చేయాలా?’ అంటూ అధికారులు మాట్లాడటం దురదృష్టకరం
కలెక్టర్ స్పందించకపోతే MRO కార్యాలయం ముట్టడిస్తాం
రాజంపేట టీడీపీ మహిళా నాయకురాలు కోటపాటి సుబ్బమ్మ
పున్నమి ప్రతినిధి
సెప్టెంబర్ 19
రాజంపేట: అర్హులైన ప్రతి ఒక్కరికీ సంక్షేమ పథకాలు అందిస్తున్నామని ప్రభుత్వం చెబుతున్నప్పటికీ, క్షేత్రస్థాయిలో నిరుపేద దళితులకు అన్యాయం జరుగుతోందని రాజంపేట నియోజకవర్గ టీడీపీ మహిళా నాయకురాలు కోటపాటి సుబ్బమ్మ ఆరోపించారు.
ఒంటిమిట్ట మండలం మల్లేశ్వరపురం గ్రామానికి చెందిన దళిత వృద్ధురాలు చెరువుపల్లి సావిత్రమ్మకు పింఛన్ మంజూరు చేయకపోవడం, ఒంటరి మహిళ సర్టిఫికెట్ కోసం ఆమె ఇబ్బందులు ఎదుర్కొంటున్నారని పేర్కొంటూ శనివారం నిర్వహించిన విలేకరుల సమావేశంలో సుబ్బమ్మ తీవ్రంగా స్పందించారు.
ఈ సందర్భంగా ఆమె మాట్లాడుతూ.. మల్లేశ్వరపురానికి చెందిన చెరువుపల్లి సావిత్రమ్మకు 55 సంవత్సరాల వయస్సు ఉందని, ఆమెకు పిల్లలు, భర్త లేరని తెలిపారు. ఆధార్, రేషన్ కార్డుల్లో కూడా భర్త పేరు లేదని, ప్రభుత్వ నిబంధనల ప్రకారం ఆమె ఒంటరి మహిళ పింఛన్‌కు అర్హురాలని సుబ్బమ్మ పేర్కొన్నారు.
ఒంటరి మహిళ సర్టిఫికెట్, పింఛన్ కోసం సావిత్రమ్మ MRO కార్యాలయం చుట్టూ తిరుగుతున్నప్పటికీ అధికారులు స్పందించడం లేదని ఆమె ఆరోపించారు. అంతేకాకుండా, కార్యాలయ సిబ్బంది దళిత మహిళ పట్ల అవమానకరంగా మాట్లాడినట్లు ఆరోపిస్తూ, ఈ వ్యవహారంపై సమగ్ర విచారణ జరపాలని డిమాండ్ చేశారు.
దళిత మహిళ పట్ల అధికారులు కులవివక్ష చూపినట్లు వచ్చిన ఆరోపణలు తీవ్రంగా పరిగణించాల్సిన అంశమని, జిల్లా కలెక్టర్ వెంటనే స్పందించి వాస్తవాలను విచారించాలని సుబ్బమ్మ కోరారు. సావిత్రమ్మకు తక్షణమే ఒంటరి మహిళ సర్టిఫికెట్ జారీ చేసి, ఆమెకు అర్హత ఉంటే పింఛన్ మంజూరు చేయాలని డిమాండ్ చేశారు.
అలాగే, ఈ ఘటనపై విచారణ జరిపి బాధ్యులపై చర్యలు తీసుకోవాలని కోరారు. అధికారులు స్పందించి సావిత్రమ్మకు న్యాయం చేయకపోతే ‘తెలుగు మహిళ’ ఆధ్వర్యంలో టీడీపీ శ్రేణులతో కలిసి తహశీల్దార్ కార్యాలయం వద్ద ఆందోళన చేపడతామని కోటపాటి సుబ్బమ్మ హెచ్చరించారు. దళితులకు న్యాయం జరిగే వరకు పోరాటం కొనసాగిస్తామని తెలిపారు.
