డాక్టర్ బి.ఆర్. అంబేద్కర్ కోనసీమ జిల్లా అమలాపురంలో ఈవీఎం, వీవీప్యాట్‌ల భద్రతా ఏర్పాట్లపై జిల్లా కలెక్టర్ డా. ఆర్. మహేష్ కుమార్ అధికారులకు కీలక ఆదేశాలు జారీ చేశారు. ఎన్నికల సంఘం మార్గదర్శకాలను కచ్చితంగా అమలు చేస్తూ, భద్రతా విషయంలో ఎలాంటి లోపాలకు తావులేకుండా చర్యలు చేపట్టాలని సూచించారు. స్ట్రాంగ్‌రూమ్‌లను 24×7 సీసీ కెమెరాల నిఘాలో ఉంచాలని, కెమెరాల పనితీరును నిరంతరం పర్యవేక్షించాలని ఆదేశించారు. స్ట్రాంగ్‌రూమ్‌ల వద్ద పోలీసు బందోబస్తును పటిష్టంగా ఏర్పాటు చేయడంతో పాటు నిరంతర విద్యుత్ సరఫరా, అగ్నిమాపక భద్రతా చర్యలను నిర్ధారించాలని తెలిపారు. ప్రవేశం, నిష్క్రమణ మార్గాలపై ప్రత్యేక నియంత్రణ ఉండాలని సూచించారు. అనధికార వ్యక్తులు స్ట్రాంగ్‌రూమ్‌ల పరిసరాల్లోకి ప్రవేశించకుండా కట్టుదిట్టమైన చర్యలు తీసుకోవాలని అధికారులను ఆదేశించారు. భద్రతా ఏర్పాట్లను ఎప్పటికప్పుడు సమీక్షిస్తూ, ఏవైనా సమస్యలు తలెత్తితే వెంటనే ఉన్నతాధికారుల దృష్టికి తీసుకురావాలని కలెక్టర్ స్పష్టం చేశారు.
