ఎమ్మెల్యేలు మారారు.. నిర్ణయాలు మాత్రం మారలేదు!
గతంలో బీఆర్ఎస్.. ఇప్పుడు కాంగ్రెస్.. ఫార్మాసిటీ విషయంలో తేడా ఏముంది?
రద్దు చేస్తామని హామీ ఇచ్చి.. ఇప్పుడు అదే నిర్ణయాల అమలు అంటూ విమర్శలు
ఇబ్రహీంపట్నం:ఆగష్టు 10
ఫార్మాసిటీ విషయంలో గత బీఆర్ఎస్ ప్రభుత్వం తీసుకున్న నిర్ణయాలనే ప్రస్తుత కాంగ్రెస్ ప్రభుత్వం కూడా కొనసాగిస్తోందని స్థానికంగా తీవ్ర విమర్శలు వ్యక్తమవుతున్నాయి. గతంలో బీఆర్ఎస్ ఎమ్మెల్యే మంచిరెడ్డి కిషన్రెడ్డి ఫార్మాసిటీకి అనుకూలంగా వ్యవహరించారని ఆరోపించిన కాంగ్రెస్ నాయకులు, ఎన్నికల సమయంలో ఫార్మాసిటీని రద్దు చేస్తామని హామీలు ఇచ్చారని, ఇప్పుడు అధికారంలోకి వచ్చిన తర్వాత అదే విధానాలను కొనసాగిస్తున్నారని పలువురు ప్రశ్నిస్తున్నారు.
ఫార్మాసిటీ రద్దు చేస్తామని ఎన్నికల సమయంలో గ్రామగ్రామాన తిరిగి ప్రజలకు హామీలు ఇచ్చారని, ఎన్నికల మేనిఫెస్టోలో సైతం ఈ అంశాన్ని ప్రస్తావించారని స్థానికులు గుర్తు చేస్తున్నారు. అయితే కాంగ్రెస్ అధికారంలోకి వచ్చిన తర్వాత పరిస్థితుల్లో ఆశించిన మార్పు కనిపించడం లేదని వారు ఆవేదన వ్యక్తం చేస్తున్నారు. గత ప్రభుత్వం తీసుకున్న నిర్ణయాలను వ్యతిరేకించిన వారే ఇప్పుడు వాటిని అమలు చేసే పరిస్థితి ఎందుకు వచ్చిందని ప్రజలు ప్రశ్నిస్తున్నారు.
“ఎమ్మెల్యేలు మారారు.. కానీ నిర్ణయాలు మారలేదు” అనే భావన ఫార్మాసిటీ ప్రభావిత ప్రాంతాల్లో బలంగా వినిపిస్తోంది. గతంలో బీఆర్ఎస్ ప్రభుత్వం తీసుకున్న నిర్ణయాలను కాంగ్రెస్ తీవ్రంగా వ్యతిరేకించిందని, ఇప్పుడు అధికారంలో ఉన్న కాంగ్రెస్ ప్రభుత్వం కూడా వాటినే కొనసాగిస్తే ఇక ప్రభుత్వాలు మారడం వల్ల ప్రజలకు ప్రయోజనం ఏమిటని స్థానికులు ప్రశ్నిస్తున్నారు.
ఫార్మాసిటీ కారణంగా భూములు కోల్పోయే పరిస్థితి ఎదుర్కొంటున్న రైతులు, బాధిత కుటుంబాలు తమ భూములు, జీవనాధారం, భవిష్యత్తుపై ఆందోళన వ్యక్తం చేస్తున్నారు. తమ సమస్యలను పరిష్కరిస్తామని, గత నిర్ణయాలను పునఃసమీక్షిస్తామని ఎన్నికల సమయంలో హామీలు ఇచ్చిన నాయకులు ఇప్పుడు తమను ఎందుకు పట్టించుకోవడం లేదని వారు నిలదీస్తున్నారు.
హామీలు ఎన్నికల వరకేనా?
ఎన్నికల సమయంలో ఒక మాట, అధికారంలోకి వచ్చిన తర్వాత మరో మాట ఎందుకని ప్రజలు ప్రశ్నిస్తున్నారు. ఫార్మాసిటీ రద్దు చేస్తామని చెప్పి ఓట్లు అడిగిన నాయకులు, ఇప్పుడు అదే అంశంపై గత ప్రభుత్వ నిర్ణయాలకు భిన్నంగా స్పష్టమైన విధానం ఎందుకు ప్రకటించడం లేదని స్థానికులు ప్రశ్నిస్తున్నారు.
“ప్రభుత్వాలు మారినా.. పాలకులు మారినా.. మా భూముల సమస్య మాత్రం ఎందుకు పరిష్కారం కావడం లేదు?” అని బాధిత రైతులు ప్రశ్నిస్తున్నారు. ఎన్నికల సమయంలో ఇచ్చిన హామీలను అమలు చేయడం ప్రభుత్వాల బాధ్యత అని, ప్రజల విశ్వాసాన్ని నిలబెట్టుకోవాల్సిన అవసరం ఉందని వారు అంటున్నారు.
ప్రజల నమ్మకంతో రాజకీయాలు చేయొద్దు
ప్రజలు తమ ఓటుతో ప్రభుత్వాలను ఎన్నుకుంటారని, ఆ ఓటుకు విలువ ఉండేలా పాలకులు పనిచేయాలని పలువురు అభిప్రాయపడుతున్నారు. ఎన్నికల సమయంలో ఇచ్చిన హామీలు కేవలం ఓట్లు సాధించేందుకు ఉపయోగించే రాజకీయ అస్త్రాలుగా మారకూడదని అంటున్నారు.
ప్రజలు కూడా ఎన్నికల సమయంలో అభ్యర్థుల మాటలను మాత్రమే కాకుండా, గతంలో వారి పనితీరును పరిశీలించి నిర్ణయం తీసుకోవాల్సిన అవసరం ఉందని కొందరు పేర్కొంటున్నారు. “ఓటు అనేది ఐదేళ్ల భవిష్యత్తును నిర్ణయించే ఆయుధం.. దానిని డబ్బు, ప్రలోభాలకు అమ్ముకుంటే తరువాత ప్రభుత్వాలను ప్రశ్నించే నైతిక హక్కును మనమే బలహీనపరుచుకున్నట్టే” అనే అభిప్రాయాలు వ్యక్తమవుతున్నాయి.
“తప్పు ఎవరిది?” అనే చర్చ
ప్రభుత్వాలు ప్రజల కోసం పనిచేయాల్సిందే. అయితే ప్రజలు కూడా తమ ఓటు హక్కును బాధ్యతగా వినియోగించాల్సిన అవసరం ఉందని స్థానికులు చెబుతున్నారు. నోటుకు ఓటు అమ్ముకునే రాజకీయ సంస్కృతి కొనసాగుతున్నంతకాలం ఎన్నికల హామీలు, ప్రజా సమస్యలు, అభివృద్ధి అంశాలు పక్కకు వెళ్లి రాజకీయ ప్రయోజనాలకే ప్రాధాన్యత దక్కే ప్రమాదం ఉందని వారు హెచ్చరిస్తున్నారు.
ఫార్మాసిటీ విషయంలో గత ప్రభుత్వం తీసుకున్న నిర్ణయాలు, ప్రస్తుత ప్రభుత్వం అనుసరిస్తున్న విధానాలపై ప్రజలకు పూర్తి స్పష్టత ఇవ్వాలని డిమాండ్ పెరుగుతోంది. ఎన్నికల సమయంలో ఇచ్చిన హామీలపై ప్రభుత్వం తన వైఖరిని బహిరంగంగా ప్రకటించాలని, ఫార్మాసిటీ ప్రభావిత రైతులు, భూయజమానులు, స్థానిక ప్రజల అభిప్రాయాలను పరిగణనలోకి తీసుకోవాలని వారు కోరుతున్నారు.
ఎన్నికల ముందు ఒక మాట.. అధికారంలోకి వచ్చిన తర్వాత మరో మాట కాకుండా, ప్రజలకు ఇచ్చిన హామీలను నిలబెట్టుకోవాలని ఫార్మాసిటీ బాధితులు, స్థానిక ప్రజలు డిమాండ్ చేస్తున్నారు.
“ఎమ్మెల్యేలు మారారు.. పార్టీలు మారాయి.. కానీ మా సమస్యలు మాత్రం మారలేదు. మరి మారింది ఏమిటి?” అనే ప్రశ్న ఇప్పుడు ఫార్మాసిటీ ప్రాంతాల్లో చర్చనీయాంశంగా మారింది.
