ఖమ్మం: సెప్టెంబర్‌ 12న నిర్వహించనున్న జాతీయ లోక్‌ అదాలత్‌ను దృష్టిలో ఉంచుకుని పోలీస్ స్టేషన్ల పరిధిలో పెండింగ్‌లో ఉన్న రాజీ పడదగిన కేసులను గుర్తించి, త్వరితగతిన పరిష్కరించేలా చర్యలు తీసుకోవాలని పోలీస్ కమిషనర్‌ సునీల్ దత్ అధికారులను ఆదేశించారు. గురువారం పోలీస్ అధికారులతో నిర్వహించిన వీడియో కాన్ఫరెన్స్‌లో ఆయన మాట్లాడుతూ.. కోర్టుల్లో పెండింగ్‌లో ఉన్న కేసులతో పాటు రాజీకి అవకాశం ఉన్న కేసులను ఇరుపక్షాల సమ్మతితో స్నేహపూర్వకంగా పరిష్కరించుకునే అవకాశం లోక్‌ అదాలత్‌ ద్వారా లభిస్తుందని తెలిపారు. అధికారులు తమ పరిధిలోని కేసులను సమీక్షించి, లోక్‌ అదాలత్‌కు పంపేందుకు అర్హత ఉన్న కేసులను గుర్తించాలన్నారు. ఫిర్యాదుదారులు, నిందితులు, ఇతర పక్షాలకు లోక్‌ అదాలత్‌ ప్రయోజనాలపై అవగాహన కల్పించాలని సూచించారు. న్యాయ సేవా సంస్థలతో సమన్వయం చేసుకుంటూ నిర్దేశించిన లక్ష్యాలను సాధించాలని తెలిపారు. కార్యక్రమంలో అడిషనల్‌ డీసీపీ రామానుజం, ఏసీపీ మహేష్, నరసింహరావు, సీఐ సర్వయ్య పాల్గొన్నారు.
