*ప్రశాంత వాతావరణంలో వినాయక చవితి నిర్వహణే లక్ష్యం,*
*మండపాలకు ఆన్లైన్ అనుమతి తప్పనిసరి.. నిబంధనలు ఉల్లంఘిస్తే కఠిన చర్యలు,*
*డీజేలకు అనుమతి లేదు.. మద్యం సేవించి వాహనాలు నడిపితే సీజ్‌,*
*మండపాల వద్ద జూదం, మత్తు పదార్థాలకు పూర్తిగా నిషేధం,*
*నియమాలు పాటించకపోతే కఠిన చర్యలు తప్పవు చిటమూరు ఎస్సై నాగరాజు,*
*పున్నమి న్యూస్ రిపోర్టర్ హరికృష్ణ సెప్టెంబర్ 4 చిట్టమూరు మండలం,*
వినాయక చవితి వేడుకలను భక్తిశ్రద్ధలతో, ప్రశాంత వాతావరణంలో నిర్వహించేందుకు పోలీసు శాఖ పటిష్ఠ చర్యలు చేపడుతోందని చిట్టమూరు ఎస్సై నాగరాజు తెలిపారు. పండుగ సందర్భంగా ఎలాంటి అవాంఛనీయ ఘటనలు చోటుచేసుకోకుండా మండపాల నిర్వాహకులు, భక్తులు పోలీసులకు సహకరించాలని ఆయన కోరారు. వినాయక మండపాల ఏర్పాటు నుంచి నిమజ్జనం వరకు పాటించాల్సిన నిబంధనలను ఆయన వెల్లడించారు.
ఆన్లైన్ అనుమతి తప్పనిసరి
వినాయక విగ్రహాలను ఏర్పాటు చేసే నిర్వాహకులు ముందుగా సంబంధిత అధికారుల నుంచి ఆన్లైన్ అనుమతి పొందాలని ఎస్సై స్పష్టం చేశారు. అనుమతి లేకుండా మండపాలు ఏర్పాటు చేయడం, అనుమతికి విరుద్ధంగా కార్యక్రమాలు నిర్వహించడం చేస్తే నిబంధనల ప్రకారం చర్యలు తీసుకుంటామని హెచ్చరించారు. ప్రతి మండపానికి ఐదుగురు ఆర్గనైజర్లను తప్పనిసరిగా నియమించుకోవాలని, మండపం వద్ద జరిగే కార్యక్రమాలకు వారే బాధ్యత వహించాల్సి ఉంటుందని తెలిపారు.
డీజేలకు అనుమతి లేదు
వినాయక చవితి వేడుకల్లో డీజేలు వినియోగించేందుకు అనుమతి లేదని ఎస్సై నాగరాజు స్పష్టం చేశారు. అధిక శబ్దంతో ప్రజలకు, వృద్ధులకు, విద్యార్థులకు, ఇతరులకు ఇబ్బందులు కలిగించే విధంగా కార్యక్రమాలు నిర్వహించకూడదన్నారు. పోలీసుల సూచనలు, నిబంధనలు అతిక్రమిస్తే నిర్వాహకులపై చట్టపరమైన చర్యలు తప్పవని హెచ్చరించారు.
మద్యం సేవించి వాహనాలు నడిపితే సీజ్‌
నిమజ్జనం సందర్భంగా వాహనాలు నడిపే వారు మద్యం సేవించకుండా జాగ్రత్తలు తీసుకోవాలని సూచించారు. మద్యం సేవించి వాహనం నడుపుతూ పట్టుబడితే వాహనాలను సీజ్‌ చేసి, సంబంధిత వ్యక్తులపై చట్ట ప్రకారం చర్యలు తీసుకుంటామని హెచ్చరించారు. నిమజ్జన కార్యక్రమాల్లో యువత అత్యుత్సాహానికి వెళ్లకుండా నిర్వాహకులు ప్రత్యేకంగా పర్యవేక్షించాలని సూచించారు.
జూదం, మత్తు పదార్థాలకు నో
వినాయక మండపాల వద్ద జూదం, మత్తు పదార్థాల వినియోగం పూర్తిగా నిషేధం అని ఎస్సై తెలిపారు. భక్తి కార్యక్రమాల పేరుతో అసాంఘిక కార్యకలాపాలకు పాల్పడితే ఎట్టి పరిస్థితుల్లోనూ ఉపేక్షించబోమన్నారు. మండపాల నిర్వాహకులు అప్రమత్తంగా ఉండి, అనుమానాస్పద వ్యక్తులు లేదా కార్యకలాపాలు కనిపిస్తే వెంటనే పోలీసులకు సమాచారం అందించాలని కోరారు.
అగ్నిప్రమాదాలపై అప్రమత్తత అవసరం
మండపాల వద్ద విద్యుత్‌ వైర్లు, అలంకరణలు, లైటింగ్‌ ఏర్పాటు చేసేటప్పుడు ప్రత్యేక జాగ్రత్తలు తీసుకోవాలని సూచించారు. షార్ట్‌సర్క్యూట్‌ కారణంగా అగ్నిప్రమాదాలు జరగకుండా నాణ్యమైన విద్యుత్‌ పరికరాలను వినియోగించాలని, మండపాల వద్ద అగ్నిమాపక భద్రతకు సంబంధించిన ముందస్తు జాగ్రత్తలు తీసుకోవాలని నిర్వాహకులకు సూచించారు.
రోడ్లకు అడ్డంగా మండపాలు ఏర్పాటు చేయొద్దు
ప్రధాన రహదారులు, రాకపోకలకు ఇబ్బంది కలిగించే ప్రాంతాల్లో అడ్డంగా మండపాలు ఏర్పాటు చేయరాదని ఎస్సై నాగరాజు స్పష్టం చేశారు. అత్యవసర వాహనాలు, అంబులెన్స్‌లు, ఇతర వాహనాల రాకపోకలకు అంతరాయం కలిగేలా మండపాలు లేదా అలంకరణలు ఏర్పాటు చేస్తే చర్యలు తీసుకుంటామని హెచ్చరించారు. ప్రజలకు ఇబ్బంది కలగకుండా తగిన స్థలంలోనే మండపాలను ఏర్పాటు చేసుకోవాలని సూచించారు.
నిమజ్జనంలో ప్రత్యేక జాగ్రత్తలు
వినాయక విగ్రహాల నిమజ్జనం సమయంలో భక్తులు అప్రమత్తంగా ఉండాలని ఎస్సై కోరారు. లోతైన చెరువులు, గుంటలు, ప్రమాదకర నీటి ప్రాంతాల్లో నిమజ్జనం చేయకుండా పోలీసు, అధికారులు సూచించిన సురక్షిత ప్రాంతాల్లోనే నిమజ్జనం నిర్వహించాలని తెలిపారు. చిన్నారులు, ఈత రాని వారు నీటిలోకి వెళ్లకుండా తల్లిదండ్రులు, నిర్వాహకులు జాగ్రత్తలు తీసుకోవాలన్నారు.
నిమజ్జన ఊరేగింపులో వాహనాలపై అధిక సంఖ్యలో వ్యక్తులు ప్రయాణించకుండా, రోడ్డు భద్రతా నిబంధనలు పాటించాలని సూచించారు. విగ్రహాల తరలింపు సమయంలో పోలీసుల సూచనలను తప్పనిసరిగా పాటించాలన్నారు.
పోలీసులకు సహకరించాలి
వినాయక చవితి పండుగను ఎలాంటి అవాంఛనీయ ఘటనలకు తావులేకుండా సంతోషకరంగా నిర్వహించడమే పోలీసుల ప్రధాన లక్ష్యమని ఎస్సై నాగరాజు పేర్కొన్నారు. ప్రజలు, మండపాల నిర్వాహకులు, యువత పోలీసు శాఖకు సహకరించి నిబంధనలు పాటించాలని కోరారు.
భక్తిశ్రద్ధలు, సామాజిక సౌహార్దం, ప్రశాంత వాతావరణంలో వినాయక చవితి వేడుకలు నిర్వహించేందుకు ప్రతి ఒక్కరూ బాధ్యతగా వ్యవహరించాలని ఎస్సై నాగరాజు విజ్ఞప్తి చేశారు.
