ప్రజారోగ్య సేవలకు జీవితాన్నే అంకితం చేసిన DM&HO డాక్టర్ స్వరాజ్యలక్ష్మి: ఎమ్మెల్యే డాక్టర్ చిక్కుడు వంశీకృష్ణ
ప్రజారోగ్య రంగంలో మూడు దశాబ్దాలకు పైగా విశిష్ట సేవలందించి వేలాది మంది ప్రజల జీవితాల్లో వెలుగులు నింపిన నాగర్‌కర్నూల్ జిల్లా వైద్య ఆరోగ్య శాఖ అధికారి (DM&HO) డాక్టర్ కె.వి. స్వరాజ్యలక్ష్మి గారి సేవలు చిరస్మరణీయమని అచ్చంపేట ఎమ్మెల్యే డాక్టర్ చిక్కుడు వంశీకృష్ణ కొనియాడారు.
శనివారం జిల్లా కేంద్రంలోని ఓ ప్రైవేట్ ఫంక్షన్ హాల్‌లో డాక్టర్ స్వరాజ్యలక్ష్మి గారి ఆత్మీయ పదవీ విరమణ సన్మానోత్సవం అత్యంత వైభవంగా, భావోద్వేగ వాతావరణంలో జరిగింది. ఈ కార్యక్రమానికి ముఖ్య అతిథిగా హాజరైన ఎమ్మెల్యే మాట్లాడుతూ, ప్రజల ఆరోగ్య పరిరక్షణను తన విధిగా కాకుండా సేవా ధర్మంగా భావించి పనిచేసిన అరుదైన అధికారిణిగా డాక్టర్ స్వరాజ్యలక్ష్మి గారు నిలిచారని పేర్కొన్నారు.
కరోనా వంటి క్లిష్ట పరిస్థితుల్లోనూ, గ్రామీణ ప్రాంతాల్లో వైద్య సేవల విస్తరణలోనూ, ప్రజారోగ్య కార్యక్రమాల అమలులోనూ ఆమె చూపిన అంకితభావం యువ వైద్యులకు ఆదర్శంగా నిలుస్తుందని ఎమ్మెల్యే అన్నారు. పదవీ విరమణ అనేది ఉద్యోగ జీవితానికి మాత్రమే పరిమితమని, సమాజ సేవకు మాత్రం ముగింపు కాదని పేర్కొంటూ, భవిష్యత్తులోనూ ఆమె తన అనుభవాన్ని సమాజ శ్రేయస్సుకు వినియోగించాలని ఆకాంక్షించారు.
ఈ సందర్భంగా ఎమ్మెల్యే డాక్టర్ చిక్కుడు వంశీకృష్ణ దంపతులను శాలువాతో సత్కరించి, జ్ఞాపికను అందజేసి ఘనంగా సన్మానించారు. ఆమె శేష జీవితం ఆనందమయం, ఆరోగ్యమయం, సుఖసంతోషాలతో నిండాలని శుభాకాంక్షలు తెలిపారు.
కార్యక్రమంలో ముఖ్య అతిథులుగా పాల్గొన్న జిల్లా అడిషనల్ కలెక్టర్ ఎల్.బి. శ్రీ దేవసహాయం, అడిషనల్ కలెక్టర్ (రెవెన్యూ) శ్రీ పి అమరేందర్ గారు,డాక్టర్ స్వరాజ్యలక్ష్మి గారి సేవలను ప్రశంసిస్తూ, ప్రజారోగ్య రంగంలో ఆమె చేసిన కృషి జిల్లాకు చిరస్మరణీయమని పేర్కొన్నారు.
ఇంచార్జీ జిల్లా వైద్య ఆరోగ్య శాఖ అధికారి డాక్టర్ రవికుమార్ నాయక్ అధ్యక్షతన జరిగిన ఈ కార్యక్రమంలో ప్రముఖ వైద్యులు డాక్టర్ వెంకటదాస్, డాక్టర్ శ్రీనివాస్, డిప్యూటీ డీఎంఅండ్‌హెచ్‌ఓలు, వివిధ ప్రాథమిక ఆరోగ్య కేంద్రాల వైద్యాధికారులు, సిబ్బంది మరియు ఆరోగ్య శాఖకు చెందిన పలువురు అధికారులు పెద్ద సంఖ్యలో పాల్గొన్నారు.
ఈ కార్యక్రమంలో వైద్య అధికారులు, పర్యవేక్షణ అధికారులు, సిబ్బంది, మిత్రులు, బంధువులు కలిసి డాక్టర్ స్వరాజ్యలక్ష్మి గారి సేవలను స్మరించుకుంటూ ఆమెకు హృదయపూర్వకంగా వీడ్కోలు పలికారు. కార్యక్రమం మొత్తం ఆత్మీయత, కృతజ్ఞతాభావం, గౌరవప్రదమైన సన్మానాలతో నిండిపోయింది.
