చట్టపరమైన పోరాటంతో పార్టీ పరంగా రిజర్వేషన్లు మైలవరం ఎమ్మెల్యే వసంత వెంకట కృష్ణ ప్రసాద్

బీసీలకు 34 శాతం రిజర్వేషన్లు కల్పించేందుకు టీడీపీ కట్టుబడి ఉంది.

స్థానిక సంస్థల్లో బీసీలకు న్యాయం జరిగేలా పార్టీ పరంగా రిజర్వేషన్లు అమలు చేస్తాం.

బీసీలకు రాజ్యాధికారం కల్పించిన ఘనత టీడీపీదే.

-మైలవరం ఎమ్మెల్యే వసంత వెంకట కృష్ణప్రసాద్ గారు.

విజయవాడ రూరల్, గొల్లపూడి, 10/10/2026.

బీసీలకు స్థానిక సంస్థల ఎన్నికల్లో 34 శాతం రిజర్వేషన్లు కల్పించి, వారికి రాజకీయంగా సముచిత ప్రాధాన్యం కల్పించేందుకు తెలుగుదేశం పార్టీ కట్టుబడి ఉందని మైలవరం శాసనసభ్యులు, టీడీపీ రాష్ట్ర అధికార ప్రతినిధి వసంత వెంకట కృష్ణప్రసాద్ గారు స్పష్టం చేశారు. చట్టపరమైన పరిమితుల కారణంగా రిజర్వేషన్ల అమలులో ఇబ్బందులు ఎదురైనా, బీసీలకు న్యాయం చేయాలనే లక్ష్యంతో పార్టీ పరంగా 34 శాతం రిజర్వేషన్లు కల్పిస్తామని ప్రకటించారు.

విజయవాడ రూరల్ మండలం గొల్లపూడిలోని ఎమ్మెల్యే కార్యాలయంలో శనివారం బీసీ నాయకులతో కలిసి నిర్వహించిన మీడియా సమావేశంలో ఆయన మాట్లాడారు.

బీసీలకు దక్కాల్సిన రాజకీయ ప్రాతినిధ్యాన్ని తగ్గించింది వైసీపీ ప్రభుత్వమే.

2019 ఎన్నికలకు ముందు జరిగిన స్థానిక సంస్థల ఎన్నికల్లో తెలుగుదేశం పార్టీ బీసీలకు 34 శాతం రిజర్వేషన్లు కల్పించి పోటీకి అవకాశం ఇచ్చిందని వసంత వెంకట కృష్ణప్రసాద్ గారు గుర్తుచేశారు. అనంతరం వైఎస్ జగన్ మోహన్ రెడ్డి ప్రభుత్వం అధికారంలోకి వచ్చిన తర్వాత బీసీ రిజర్వేషన్లను 34 శాతం నుంచి 24 శాతానికి తగ్గించిందని విమర్శించారు. ఈ నిర్ణయం కారణంగా బీసీలు 16 వేలకుపైగా రాజకీయ పదవులను కోల్పోయారని పేర్కొన్నారు. కోల్పోయిన రాజకీయ ప్రాతినిధ్యాన్ని తిరిగి సాధించాలనే ఉద్దేశంతోనే తెలుగుదేశం పార్టీ 34 శాతం రిజర్వేషన్ల కోసం నిరంతరం ప్రయత్నిస్తోందని వివరించారు.

చట్టపరమైన పోరాటంతో పాటు పార్టీ పరంగా రిజర్వేషన్లు.

బీసీలకు 34 శాతం రిజర్వేషన్లు కల్పించే అంశంపై అసెంబ్లీలో బిల్లు ఆమోదించడం నుంచి న్యాయపరమైన పోరాటం వరకు తెలుగుదేశం పార్టీ ప్రయత్నించిందని ఎమ్మెల్యే కృష్ణప్రసాదు గారు తెలిపారు. హైకోర్టులో ఎదురైన అడ్డంకుల అనంతరం సుప్రీంకోర్టులోనూ ప్రయత్నాలు చేసినట్లు పేర్కొన్నారు. న్యాయవ్యవస్థకు రాజ్యాంగపరమైన పరిధులు, పరిమితులు ఉంటాయని, వాటి కారణంగా చట్టపరంగా ఆశించిన ఫలితం సాధ్యం కాని పరిస్థితుల్లోనూ బీసీలకు న్యాయం చేయాలన్న సంకల్పంతో పార్టీ ముందుకు వెళ్తుందని చెప్పారు. ఎస్సీ, ఎస్టీలకు రాజ్యాంగపరంగా కల్పించిన రిజర్వేషన్లకు భిన్నంగా బీసీలకు సంబంధించి చట్టపరమైన పరిమితులు ఉన్నప్పటికీ, పార్టీ పరంగా 34 శాతం రిజర్వేషన్లు కల్పించేందుకు టీడీపీ సిద్ధంగా ఉందని స్పష్టం చేశారు.

టీడీపీతో బీసీలకు విడదీయలేని అనుబంధం.

తెలుగుదేశం పార్టీకి, బీసీలకు విడదీయలేని అనుబంధం ఉందని ఎమ్మెల్యే వసంత వెంకట కృష్ణప్రసాద్ గారు పేర్కొన్నారు. ఎన్టీఆర్ తెలుగుదేశం పార్టీని స్థాపించిన తర్వాత బీసీలకు రాజకీయాల్లో మరింత ప్రాధాన్యం లభించిందని, నందమూరి తారక రామారావు గారు, చంద్రబాబు నాయుడు గారి నాయకత్వంలో బీసీలకు రాజ్యాధికారంలో భాగస్వామ్యం పెరిగిందని అన్నారు. గతంలో పటేల్‌–పట్వారీ వ్యవస్థ రద్దు వంటి నిర్ణయాలు, బీసీ నాయకులకు రాజకీయ అవకాశాలు కల్పించడం తెలుగు రాష్ట్రాల్లో వారి ప్రాతినిధ్యాన్ని పెంపొందించాయని వివరించారు.

తెలంగాణలోనూ తెలుగుదేశం పార్టీ ప్రభావం కొనసాగుతోందని, పార్టీ అక్కడ ఎన్నికల్లో పోటీ చేయని పరిస్థితుల్లో కూడా పదేళ్ల తర్వాత నిర్వహించిన సర్వేల్లో టీడీపీకి ఐదు శాతం ఓట్లు ఉన్నట్లు వెల్లడైందని ఆయన పేర్కొన్నారు. తెలుగు రాష్ట్రాల్లో వివిధ పార్టీల తరఫున ప్రాతినిధ్యం వహిస్తున్న పలువురు బీసీ నాయకులకు రాజకీయంగా ఎదిగేందుకు తెలుగుదేశం పార్టీ పునాది వేసిందని అభిప్రాయపడ్డారు. బీసీ నాయకులు మంత్రులుగా, ఇతర కీలక పదవుల్లో కొనసాగడానికి టీడీపీ కల్పించిన అవకాశాలు దోహదపడ్డాయని తెలిపారు.

బీసీ కార్పొరేషన్లపై వైసీపీ తీరును విమర్శించిన ఎమ్మెల్యే.

వైఎస్సార్ కాంగ్రెస్ పార్టీ హయాంలో బీసీల కోసం అనేక కార్పొరేషన్లు ఏర్పాటు చేసినట్లు ప్రకటించినప్పటికీ, వాటికి అవసరమైన నిధులు, విధులు, కార్యాలయ సదుపాయాలు కల్పించలేదని ఎమ్మెల్యే వసంత వెంకట కృష్ణప్రసాద్ గారు విమర్శించారు. కార్పొరేషన్లకు చైర్మన్లను నియమించినప్పటికీ, వారికి సమర్థంగా పనిచేసేందుకు అవసరమైన సదుపాయాలు కల్పించకపోవడంతో బీసీ వర్గాలకు ఆశించిన ప్రయోజనం చేకూరలేదని ఆరోపించారు. బీసీల సంక్షేమం, అభ్యున్నతి విషయంలో ప్రకటనలకు పరిమితం కాకుండా ఆచరణలో ఫలితాలు చూపాల్సిన అవసరం ఉందని పేర్కొన్నారు.

రజకులు, వడ్డెరలు, గౌడలు, యాదవులు, నాయీ బాహ్మణులు సహా బీసీ వర్గాల్లోని అన్ని కులాలకు రాజకీయంగా, సామాజికంగా అవకాశాలు కల్పించడంలో తెలుగుదేశం పార్టీ కీలక పాత్ర పోషించిందని ఆయన తెలిపారు. బీసీల అభ్యున్నతికి పార్టీ భవిష్యత్తులోనూ కట్టుబడి ఉంటుందని స్పష్టం చేశారు.

బీసీలకు రాజ్యాధికారం కల్పించే నిర్ణయానికి అన్ని వర్గాల మద్దతు.

బీసీలకు జనాభా ప్రాతిపదికన సముచిత గుర్తింపు కల్పించడంతో పాటు రాజకీయ అధికారంలోనూ వారి భాగస్వామ్యం పెరగాలన్నదే తెలుగుదేశం పార్టీ లక్ష్యమని ఎమ్మెల్యే వసంత వెంకట కృష్ణప్రసాద్ గారు తెలిపారు. పార్టీ పరంగా బీసీలకు 34 శాతం రిజర్వేషన్లు కల్పించాలన్న నిర్ణయానికి టీడీపీలోని కమ్మ, రెడ్డి, కాపు తదితర సామాజిక వర్గాల నాయకులు కూడా మద్దతు తెలుపుతున్నారని చెప్పారు. బీసీలకు మరింత రాజకీయ ప్రాతినిధ్యం, నాయకత్వ అవకాశాలు కల్పించాలన్న లక్ష్యంతో అందరూ కలిసికట్టుగా పనిచేయాలని పిలుపునిచ్చారు.

ఈ కార్యక్రమంలో పాల్గొన్న బీసీ నాయకులకు ఎమ్మెల్యే వసంత వెంకట కృష్ణప్రసాద్ గారు కృతజ్ఞతలు తెలిపారు.