संपर्क करें ताज़ा खबरें
सच्ची खबर। तेज़ जानकारी। आंध्र प्रदेश • तेलंगाना • राष्ट्रीय
लेखक पैनल

Tag: రిపోర్టర్ ఆనంద్

అనకాపల్లి

ఎస్‌బీ డీఎస్పీగా బాబ్జీరావు బాధ్యతలు

ఎస్పీ తుహిన్ సిన్హాను మర్యాదపూర్వకంగా కలిసిన నూతన డీఎస్పీ పున్నమి ప్రతినిధి ఆనంద్ (జిల్లా బ్యూరో ) : అనకాపల్లి జిల్లా స్పెషల్ బ్రాంచ్ (ఎస్‌బీ) డీఎస్పీగా నూతనంగా నియమితులైన వి.బాబ్జీరావు సోమవారం జిల్లా ఎస్పీ కార్యాలయంలో ఎస్పీ తుహిన్ సిన్హా, ఐపీఎస్‌ను మర్యాదపూర్వకంగా కలిశారు. ఈ సందర్భంగా ఎస్పీకి పూల మొక్కను అందజేశారు. 1995 ఎస్సై బ్యాచ్‌కు చెందిన బాబ్జీరావు గతంలో సీఐడీ విభాగంలో సీఐగా పనిచేస్తూ డీఎస్పీగా పదోన్నతి పొందారు. గతంలో అనకాపల్లి ట్రాఫిక్ సీఐగా విధులు నిర్వహించి ప్రజలు, ఉన్నతాధికారుల ప్రశంసలు పొందారు. ఈ సందర్భంగా ఎస్పీ మాట్లాడుతూ శాంతిభద్రతల పరిరక్షణలో ఎస్‌బీ కీలకమని తెలిపారు. సమస్యాత్మక ప్రాంతాలు, సంఘటనలపై ముందస్తు సమాచారాన్ని సేకరించి పోలీసు శాఖను అప్రమత్తం చేయాలని సూచించారు. ఆధునిక సాంకేతికతతో సమాచార వ్యవస్థను బలోపేతం చేసి అవాంఛనీయ ఘటనలను ముందుగానే నివారించాలని సూచించారు. కార్యక్రమంలో పోలీసు అధికారులు, ఎస్‌బీ సిబ్బంది పాల్గొన్నారు.

అనకాపల్లి

పరిశ్రమల్లో కార్మికులకు 20 శాతం బోనస్ ఇవ్వాలి: సీఐటీయూ

పున్నమి ప్రతినిధి ఆనంద్ (జిల్లా బ్యూరో ) అచ్యుతాపురం: సెజ్‌, ఫార్మా, ఇతర పరిశ్రమల్లో పనిచేస్తున్న కార్మికులకు ఈ నెల వేతనాలతో పాటు 20 శాతం బోనస్‌ తక్షణమే చెల్లించాలని సీఐటీయూ నాయకులు డిమాండ్‌ చేశారు. ఈ మేరకు అచ్యుతాపురం జంక్షన్‌లో సీఐటీయూ ఆధ్వర్యంలో నిరసన కార్యక్రమం నిర్వహించారు. ఈ సందర్భంగా సీఐటీయూ జిల్లా కార్యదర్శి ఆర్‌. రాము, మండల కన్వీనర్‌ కె. సోమునాయుడు మాట్లాడుతూ.. బోనస్‌ చట్టం-1965 ప్రకారం అర్హత కలిగిన పరిశ్రమల్లో కార్మికులకు కనీసం 8.33 శాతం నుంచి గరిష్ఠంగా 20 శాతం వరకు బోనస్‌ చెల్లించాల్సి ఉందన్నారు. బోనస్‌ యాజమాన్యాల దయాదాక్షిణ్యాలు కాదని, కార్మికుల హక్కు అని స్పష్టం చేశారు. పర్మినెంట్‌, కాంట్రాక్ట్‌, డైలీవేజ్‌, ఇతర కేటగిరీల్లో పనిచేస్తున్న కార్మికులందరికీ బోనస్‌ వర్తించేలా చర్యలు తీసుకోవాలని కోరారు. లాభనష్టాలతో సంబంధం లేకుండా కార్మికులకు వెంటనే 20 శాతం బోనస్‌ చెల్లించాలని, ఇందుకోసం పరిశ్రమల యాజమాన్యాలపై ఒత్తిడి తీసుకురావాలని కార్మికులకు పిలుపునిచ్చారు. కార్యక్రమంలో సీఐటీయూ నాయకులు సత్తిబాబు, బయ్యవరపు సన్యాసిరావు, రాము, అప్పన్న, బిస్వాల్‌ తదితరులు పాల్గొన్నారు.

అనకాపల్లి

అర్హులకు గృహ నిర్మాణ ప్రొసీడింగ్ కాపీలు

కొత్తపాలెంలో కూటమి ప్రభుత్వం ఆధ్వర్యంలో పంపిణీ పున్నమి ప్రతినిధి, ఆనంద్ (జిల్లా బ్యూరో ) యలమంచిలి:శాసనసభ్యులు శ్రీ సుందరపు విజయ్ కుమార్ ఆదేశాల మేరకు యలమంచిలి పరిధిలోని కొత్తపాలెం గ్రామంలో అర్హత కలిగిన లబ్ధిదారులకు సోమవారం గృహ నిర్మాణ ప్రొసీడింగ్ కాపీలను అందజేశారు. కూటమి ప్రభుత్వం ఆధ్వర్యంలో నిర్వహించిన ఈ కార్యక్రమంలో అర్హులైన వారికి సొంతింటి నిర్మాణానికి సంబంధించిన ప్రొసీడింగ్ కాపీలను అందించడం జరిగింది. ఈ సందర్భంగా ఎలమంచిలి టౌన్ జనసేన అధ్యక్షులు బొద్ధపు శ్రీను, కర్రీ ఝాన్సీ, నక్క శివ, ఆది మూర్తి, ఆది బాబు, బుజ్జి తదితరులతో పాటు కూటమి నాయకులు పాల్గొన్నారు. అర్హులైన ప్రతి కుటుంబానికి ప్రభుత్వ సంక్షేమ పథకాల ప్రయోజనాలు అందేలా కృషి చేస్తామని నాయకులు తెలిపారు. గృహ నిర్మాణ ప్రొసీడింగ్ కాపీలు అందుకోవడంతో లబ్ధిదారులు ఆనందం వ్యక్తం చేశారు.

అనకాపల్లి

కొక్కిరాపల్లిలో ఘనంగా దుర్గాభవాని అమ్మవారి పందిరి పూజలు..!

శ్రీ దుర్గాభవాని అమ్మవారి పందిరి నిర్మాణానికి పూజలు పున్నమి ప్రతినిధి ఆనంద్ (జిల్లా బ్యూరో ) యలమంచిలి: అనకాపల్లి జిల్లా యలమంచిలి మున్సిపాలిటీ 23వ వార్డు కొక్కిరాపల్లిలో దసరా శరన్నవరాత్రి ఉత్సవాలకు ఏర్పాట్లు ప్రారంభమయ్యాయి. ఉత్సవాల్లో భాగంగా శ్రీ దుర్గాభవాని అమ్మవారి పందిరి నిర్మాణానికి సంబంధించి పూజా కార్యక్రమాన్ని భక్తిశ్రద్ధలతో ఘనంగా నిర్వహించారు. ఈ సందర్భంగా పలకా రమేష్–లక్ష్మి దంపతుల చేతుల మీదుగా అమ్మవారికి ప్రత్యేక పూజలు నిర్వహించి, పందిరి నిర్మాణానికి శ్రీకారం చుట్టారు. అనంతరం గ్రామ పెద్దలు, శ్రీ దుర్గాభవాని అమ్మవారి కమిటీ సభ్యులు, గ్రామస్థులు కలిసి రాట వేశారు. కార్యక్రమంలో ప్రధానోపాధ్యాయులు, ఉపాధ్యాయులు, విద్యార్థులు పాల్గొని ఉత్సవ కార్యక్రమంలో భాగస్వాములయ్యారు. శ్రీ దుర్గాభవాని అమ్మవారి ఆశీస్సులతో శరన్నవరాత్రి ఉత్సవాలు భక్తిశ్రద్ధలతో, వైభవంగా జరగాలని గ్రామస్థులు ఆకాంక్షించారు.

అనకాపల్లి

పాములు, పందుల నిలయంగా మామిడి కొండయ్య వీధి..!

పారిశుధ్యం కరువు.. వీధి దీపాలు లేవు.. అధికారుల నిర్లక్ష్యంపై స్థానికుల ఆవేదన! పున్నమి – కే ఆనంద్ (అనకాపల్లి బ్యూరో ) : యలమంచిలి మున్సిపాలిటీ పరిధిలోని 14వ వార్డు మామిడి కొండయ్య వీధిలో పారిశుధ్య సమస్యలు ప్రజలను తీవ్ర ఇబ్బందులకు గురిచేస్తున్నాయి. వీధిలో పందుల సంచారం పెరగడంతో పాటు, అవి మృతి చెందినప్పుడు మృతదేహాలను తొలగించకపోవడంతో స్థానికులు అవస్థలు పడుతున్నారు. మరోవైపు, తరచూ విషసర్పాలు కనిపిస్తుండటంతో ప్రజలు భయాందోళనకు గురవుతున్నారు. రాత్రివేళ వీధి దీపాలు లేక చీకట్లు అలుముకుంటున్నాయి. కాలువల శుభ్రత సక్రమంగా లేకపోవడం, నీటి కుళాయిల లీకేజీలతో సమస్యలు తీవ్రమవుతున్నాయి. పలుమార్లు అధికారులకు విన్నవించినా తగిన చర్యలు తీసుకోవడం లేదని స్థానికులు ఆవేదన వ్యక్తం చేస్తున్నారు. పంచాయతీగా ఉన్నప్పుడు కంటే మున్సిపాలిటీగా మారిన తర్వాత పన్నులు భారీగా పెరిగాయని, అయినప్పటికీ కనీస పారిశుధ్య సౌకర్యాలు కల్పించడం లేదని ప్రజలు ప్రశ్నిస్తున్నారు. ఇప్పటికైనా మున్సిపల్ అధికారులు స్పందించి వీధిని పరిశీలించి, కాలువల శుభ్రత, వీధి దీపాల ఏర్పాటు, పందుల నియంత్రణ, నీటి లీకేజీల నివారణకు తక్షణ చర్యలు తీసుకోవాలని స్థానికులు కోరుతున్నారు.

అనకాపల్లి

రామారాయుడుపాలెం మార్గంలో వీధి దీపాలు ఏర్పాటు చేయాలి..!

విషపూరిత పాముల సంచారంతో ప్రజల్లో భయాందోళనలు..!! అధికారులకు గొర్లె బాబురావు విజ్ఞప్తి..!!! పున్నమి – కే ఆనంద్ (అనకాపల్లి బ్యూరో ) : యలమంచిలి మున్సిపాలిటీ పరిధిలోని రామారాయుడుపాలెం గ్రామానికి వెళ్లే మార్గంలో వీధి దీపాలు ఏర్పాటు చేయాలని 32వ వార్డు అధ్యక్షులు, వ్యవసాయ మార్కెట్ కమిటీ వైస్ చైర్మన్ గొర్లె బాబురావు అధికారులను కోరారు. ఈ మార్గంలో వీధి దీపాలు లేకపోవడంతో రాత్రివేళ రాకపోకలు సాగించే ప్రజలు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు. మార్గంలో ప్రతిరోజూ ఎక్కడో ఒకచోట రక్తపింజర, పొడపాములు, త్రాచుపాములు వాటి పిల్లలతో సహా వివిధ రకాల విషపూరిత పాములు కనిపిస్తుండటంతో ప్రజలు భయాందోళనలకు గురవుతున్నారని తెలిపారు. చీకటి కారణంగా పాములను గుర్తించడం కష్టంగా మారి ప్రమాదాలు జరిగే అవకాశం ఉందని ఆందోళన వ్యక్తం చేశారు. ప్రజల భద్రతను దృష్టిలో ఉంచుకుని స్థానిక ఎమ్మెల్యే శ్రీ సుందరపు విజయ్ కుమార్, మున్సిపల్ కమిషనర్, ఏఈ నానాజీ వెంటనే స్పందించి రామారాయుడుపాలెం మార్గంలో వీధి దీపాలు ఏర్పాటు చేయాలని గొర్లె బాబురావు విజ్ఞప్తి చేశారు. ప్రజల ప్రాణాలకు ముప్పు వాటిల్లకముందే అధికారులు తక్షణ చర్యలు చేపట్టి సమస్యను పరిష్కరించాలని కోరారు.

అనకాపల్లి

ఒకేసారి నాలుగు బ్రహ్మకమలాలు వికాసం

ఆహ్లాదకరమైన సువాసనతో ఆకట్టుకున్న అరుదైన పుష్పాలు పున్నమి ప్రతినిధి ఆనంద్ (జిల్లా బ్యూరో ) హరిపాలెం, అందలపల్లి: అరుదైన బ్రహ్మకమలం పుష్పాలు ఒకేసారి నాలుగు వికసించడంతో అందలపల్లిలోని ఓ ఇంటి పెరటి తోట ప్రత్యేక ఆకర్షణగా నిలిచింది. గ్రామానికి చెందిన విశ్రాంత ఉపాధ్యాయుడు, ఎస్ఎస్ఎఫ్ సబ్ డివిజన్ కన్వీనర్ బి.వి. రమణ పెరటి తోటలో ఈ అద్భుత దృశ్యం ఆవిష్కృతమైంది. మూడు సంవత్సరాల క్రితం తీర్థయాత్ర సందర్భంగా తీసుకొచ్చిన బ్రహ్మకమలం మొక్కను అప్పటి నుంచి ఎంతో శ్రద్ధగా సంరక్షిస్తున్నారు. సాధారణంగా రాత్రివేళ వికసించే బ్రహ్మకమలం తెల్లని రేకులతో అందంగా కనిపించడమే కాకుండా, వికసించిన సమయంలో ఆహ్లాదకరమైన సువాసనను వెదజల్లుతుంది. రాత్రి సమయంలో పుష్పాలు పూర్తిగా విచ్చుకుని ఉదయం వరకు మాత్రమే అందంగా కనిపించడం దీని ప్రత్యేకత. ఒకేసారి నాలుగు పుష్పాలు వికసించడంతో స్థానికులు ఆసక్తిగా తిలకించారు. భారతీయ సంప్రదాయాల్లో బ్రహ్మకమలానికి ప్రత్యేక ఆధ్యాత్మిక ప్రాధాన్యత ఉందని భావిస్తారు. సరైన సంరక్షణతో ఇళ్ల పెరటి తోటల్లోనూ ఈ అరుదైన పుష్పాన్ని పెంచుకోవచ్చని రమణ తెలిపారు.

అనకాపల్లి

నూకాంబిక అమ్మవారిని దర్శించుకున్న హోంమంత్రి వంగలపూడి అనిత

పున్నమి ప్రతినిధి ఆనంద్ (జిల్లా బ్యూరో ) అనకాపల్లి, అక్టోబర్ 4: రాష్ట్ర హోంశాఖ మంత్రి శ్రీమతి వంగలపూడి అనిత ఆదివారం అనకాపల్లిలోని శ్రీశ్రీశ్రీ నూకాంబిక అమ్మవారి దేవస్థానాన్ని సందర్శించి అమ్మవారిని దర్శించుకున్నారు. ఈ సందర్భంగా మాజీ మంత్రి, అనకాపల్లి ఎమ్మెల్యే శ్రీ కొణతాల రామకృష్ణ హోంమంత్రి అనితకు సాదర స్వాగతం పలికారు. అనంతరం దేవస్థానం సిబ్బంది పూర్ణకుంభంతో హోంమంత్రికి ఘన స్వాగతం పలికారు. అమ్మవారిని దర్శించుకున్న మంత్రి ప్రత్యేక పూజలు నిర్వహించి పట్టువస్త్రాలు సమర్పించారు. ఆలయ అర్చకులు వేద ఆశీర్వచనం అందించి సంప్రదాయబద్ధంగా పట్టు వస్త్రాలు అందజేశారు. అనంతరం హోంమంత్రి అమ్మవారి తీర్థప్రసాదాలను స్వీకరించారు. ఈ కార్యక్రమంలో నూకాంబిక అమ్మవారి దేవస్థానం చైర్మన్ శ్రీ పీల నాగశీను, ఆలయ ఈవో వై. శ్రీధర్, ఆలయ డైరెక్టర్లు, దేవస్థానం సిబ్బంది తదితరులు పాల్గొన్నారు.

అనకాపల్లి

నూతగుంటపాలెం లో మెగా మెడికల్ క్యాంపు..

పున్నమి ప్రతినిధి ఆనంద్ (జిల్లా బ్యూరో ) యలమంచిలి సెప్టెంబర్ 04: సమిద స్వచ్ఛంద సంస్థ ఆధ్వర్యంలో ఆదివారం నూతగుంటపాలెం లో మెగా మెడికల్ క్యాంపు నిర్వహించారు. ఈ సందర్భంగా సుమారు 250 మందికి బీపీ, షుగర్ పరీక్షలతో పాటు వివిధ రకాల వ్యాధులకు వైద్య పరీక్షలు నిర్వహించి చికిత్స అందించారు. అలాగే సుమారు 250 మందికి ఐసీటీసీ ( ఐ సి టి సి) పరీక్షలు నిర్వహించారు. ఈ కార్యక్రమంలో సమిద స్వచ్ఛంద సంస్థ ప్రతినిధి డి. వీరభద్రరావు, ప్రెసిడెంట్ పి. రమణ, ప్రోగ్రామ్ మేనేజర్ వరహాలు బాబు, ఎం&ఈ సంధ్యారాణి, ఏఎన్‌ఎం కే.లక్ష్మి, ఔట్రీచ్ వర్కర్లు కే.నాగు, సీహెచ్. బాల, టీ.నాగదుర్గ, కె. అనురాధ మెడికవర్ హాస్పిటల్స్ సిబ్బంది మరియు కూటమి నాయకులు, గ్రామ పెద్దలు పాల్గొన్నారు. ప్రజలకు ఉచిత వైద్య పరీక్షలు, ఆరోగ్య సేవలు అందించాలనే ఉద్దేశంతో నిర్వహించిన ఈ మెగా మెడికల్ క్యాంపునకు స్థానిక ప్రజల నుంచి మంచి స్పందన లభించింది.

అనకాపల్లి

సీడ్ బాల్స్‌తో పచ్చదనానికి బాట..!

పర్యావరణ పరిరక్షణకు ప్రతి ఒక్కరూ కృషి చేయాలి: అప్పికొండ గణేష్ పున్నమి ప్రతినిధి ఆనంద్ (జిల్లా బ్యూరో ) అనకాపల్లి: పర్యావరణ పరిరక్షణ, పచ్చదనం పెంపొందించడమే లక్ష్యంగా హేమగిరి సత్యనారాయణ స్వామి కొండపై గ్రీన్ క్లబ్ ఆధ్వర్యంలో సీడ్ బాల్స్ కార్యక్రమం నిర్వహించారు. ముఖ్య అతిథిగా దేవస్థానం చైర్మన్ అప్పికొండ గణేష్ పాల్గొని కొండ ప్రాంతంలో సీడ్ బాల్స్ వేశారు. ఈ సందర్భంగా ఆయన మాట్లాడుతూ పర్యావరణ పరిరక్షణ ప్రతి ఒక్కరి సామాజిక బాధ్యత అన్నారు. సీడ్ బాల్స్ ద్వారా ఖాళీ ప్రదేశాల్లో సహజసిద్ధంగా మొక్కలు పెరిగేలా చేయవచ్చని తెలిపారు. భోగలింగేశ్వర దేవస్థానం చైర్మన్ కాండ్రేగుల సత్యనారాయణ, గ్రీన్ క్లబ్ వ్యవస్థాపకులు, వృక్షమిత్ర, జాతీయ ఉత్తమ ఉపాధ్యాయ అవార్డు గ్రహీత కొణతాల పణిభూషణ్ శ్రీధర్ పాల్గొన్నారు. “ఒక సీడ్ బాల్–ఒక మొక్కకు నాంది” అనే సందేశంతో కార్యక్రమం చేపట్టినట్లు తెలిపారు. గ్రీన్ క్లబ్ సభ్యులు, మహిళా విభాగం ప్రతినిధులు పాల్గొన్నారు. అనంతరం పర్యావరణ పరిరక్షణ ప్రతిజ్ఞ చేసి, నినాదాలతో ర్యాలీ నిర్వహించారు.