గాయాలతోనే పరీక్షకు హాజరైన విద్యార్థి – ధైర్యం చూపిన ధనుష్

శ్రీకాళహస్తి, మార్చి 16 (పున్నమి న్యూస్): శ్రీకాళహస్తి పట్టణంలోని బాయ్స్ హైస్కూల్‌లో సోమవారం నాడు పదో తరగతి పబ్లిక్ పరీక్షలు ప్రారంభమయ్యాయి. ఈ సందర్భంగా ఒక విద్యార్థి చూపిన పట్టుదల అక్కడ ఉన్న వారిని ఆకట్టుకుంది. తొండమనాడు జెడ్పీ ఉన్నత పాఠశాలకు చెందిన విద్యార్థి ధనుష్ ఇటీవల జరిగిన ప్రమాదంలో గాయపడి ఆసుపత్రిలో చికిత్స పొందుతున్నాడు. ఈ నెల 13వ తేదీన జరిగిన ప్రమాదంలో అతనికి తీవ్ర గాయాలు కావడంతో వైద్యుల పర్యవేక్షణలో చికిత్స కొనసాగుతోంది. అయితే చదువుపై ఉన్న ఆసక్తి, పరీక్షలను కోల్పోకూడదనే సంకల్పంతో ధనుష్ గాయాలపై కట్లు కట్టుకున్న పరిస్థితిలోనే నేరుగా పరీక్షా కేంద్రానికి చేరుకుని పదో తరగతి పరీక్షకు హాజరయ్యాడు. అతని పట్టుదల చూసి ఉపాధ్యాయులు, ఇతర విద్యార్థులు ఆశ్చర్యం వ్యక్తం చేశారు. విద్యార్థి ధైర్యసాహసం ప్రశంసనీయమని పలువురు ఉపాధ్యాయులు పేర్కొన్నారు. ఇబ్బందులు ఉన్నప్పటికీ పరీక్షలకు హాజరై తన లక్ష్యాన్ని సాధించాలనే ధనుష్ పట్టుదల అందరికీ స్ఫూర్తిదాయకంగా నిలుస్తుందని వారు అభిప్రాయపడ్డారు.