సంపూర్ణ ఆరోగ్యంపై అవగాహన కార్యక్రమం – పాటలు, నాటికలతో గ్రామస్తుల్లో చైతన్యం

శ్రీకాళహస్తి, మార్చి 16 (పున్నమి న్యూస్): శ్రీకాళహస్తి ఐసీడీఎస్ ప్రాజెక్టు పరిధిలోని తొట్టంబేడు మండలంలోని దిగువసంబాయిపాలెం, గుమ్మడిగుంట గ్రామాలు, శాస్త్రి గిరిజన కాలనీలో సంపూర్ణ ఆరోగ్యంపై అవగాహన కార్యక్రమాన్ని నిర్వహించారు. విజయ వాహిని ఫౌండేషన్ ఆధ్వర్యంలో, టాటా ట్రస్ట్స్ సహకారంతో ఈ కార్యక్రమం నిర్వహించబడింది. ఈ సందర్భంగా గ్రామస్తులకు ఆరోగ్యకర జీవన విధానం గురించి అవగాహన కల్పించారు. ముఖ్యంగా శరీరానికి అవసరమైన పోషకాహారం, విటమిన్ల ప్రాముఖ్యత, అంగన్వాడి కేంద్రాల ద్వారా అందిస్తున్న పోషకాహారం, అలాగే పాఠశాలల్లో అమలు చేస్తున్న మధ్యాహ్న భోజన పథకం ద్వారా లభించే పోషకాల గురించి వివరంగా తెలియజేశారు. పిల్లలు, గర్భిణీ స్త్రీలు పోషకాహారం తీసుకోవడం ఎంతో అవసరమని నిపుణులు వివరించారు. అదేవిధంగా బాల్యవివాహాల వల్ల కలిగే నష్టాలు, చిన్న వయసులో గర్భధారణ వల్ల తల్లి-శిశువులకు కలిగే ఆరోగ్య సమస్యలపై కూడా ప్రజలకు అవగాహన కల్పించారు. ఈ అంశాలను మరింత ప్రభావవంతంగా ప్రజలకు చేరవేసేందుకు జయరావు కళాబృందం పాటలు, నాటికల రూపంలో ప్రదర్శనలు ఇచ్చింది. ఈ ప్రదర్శనలు గ్రామస్తులను ఆకట్టుకోవడంతో పాటు సామాజిక సమస్యలపై చైతన్యం పెంచాయి. ఈ కార్యక్రమంలో ఐసీడీఎస్ సూపర్వైజర్ మరియమ్మ, విజయ వాహిని ఫౌండేషన్ ప్రోగ్రాం అసోసియేట్ వి. లక్ష్మి తదితరులు పాల్గొని కార్యక్రమాన్ని విజయవంతం చేశారు. గ్రామస్తులు, అంగన్వాడి సిబ్బంది పెద్ద సంఖ్యలో హాజరై ఆరోగ్య అవగాహన కార్యక్రమాన్ని ఆసక్తిగా వీక్షించారు.