కారాకొల్లులో రోడ్డుపై బహిరంగ కల్లు విక్రయాలు–మహిళల భద్రతపై ఆందోళన

తొట్టంబేడు, మార్చి 16 (పున్నమి న్యూస్: తొట్టంబేడు మండలంలోని కారాకొల్లు గ్రామానికి వెళ్లే రహదారిపై బహిరంగంగా కల్లు విక్రయాలు జరగడం స్థానికుల్లో ఆందోళన కలిగిస్తోంది. రోడ్డుపైనే విక్రయాలు జరుగుతుండటంతో మందుబాబులు మహిళలు, పాఠశాలకు వెళ్లే విద్యార్థుల పట్ల అసభ్యంగా ప్రవర్తిస్తున్నారని పలువురు మహిళలు వాపోతున్నారు. ఇంతకుముందు గ్రామ శివారు ప్రాంతాల్లో జరిగే ఈ విక్రయాలు ప్రస్తుతం ప్రధాన రహదారిపైకి మారడంతో సమస్య మరింత తీవ్రతరమైందని స్థానికులు చెబుతున్నారు. ప్రధాన రహదారి నుంచి కారాకొల్లు గ్రామం వరకు సుమారు మూడు కిలోమీటర్ల దూరం ప్రయాణించే మహిళలు రోజూ ఇబ్బందులు ఎదుర్కొంటున్నారని పేర్కొన్నారు. అధికారులు చర్యలు తీసుకోవాల్సిన సమయంలో నిర్లక్ష్యంగా వ్యవహరిస్తున్నారని స్థానికులు ఆవేదన వ్యక్తం చేస్తున్నారు. ఇప్పటికైనా సంబంధిత శాఖలు స్పందించి రోడ్డుపై బహిరంగంగా జరుగుతున్న కల్లు విక్రయాలను అరికట్టి మహిళల భద్రతను కాపాడాలని ప్రజలు కోరుతున్నారు.