9వ తరగతి విద్యార్థి అదృశ్యం – పోలీస్ స్టేషన్‌లో కేసు నమోదు

కేవీబీపురం మండలంలోని రాగిగుంట ప్రభుత్వ ఉన్నత పాఠశాలలో చదువుతున్న ఓ 9వ తరగతి విద్యార్థి అదృశ్యమైన ఘటన కలకలం రేపింది. ఈ సంఘటనపై స్థానిక పోలీస్ స్టేషన్‌లో కేసు నమోదు చేసి పోలీసులు దర్యాప్తు ప్రారంభించారు. పోలీసుల కథనం మేరకు, కేవీబీపురం మండలం తిమ్మసముద్రం గ్రామానికి చెందిన చెంచయ్య పెద్ద కుమారుడు బి. చందు (14) రాగిగుంట ప్రభుత్వ ఉన్నత పాఠశాలలో 9వ తరగతి చదువుతున్నాడు. ఈ నెల 14వ తేదీ ఉదయం ఇంటి నుంచి బయటకు వెళ్లిన చందు తిరిగి ఇంటికి రాకపోవడంతో కుటుంబ సభ్యులు ఆందోళనకు గురయ్యారు. మొదట బడికి వెళ్లి ఉంటాడని భావించిన తల్లిదండ్రులు సాయంత్రం వరకు వేచి చూశారు. అయితే రాత్రి వరకు ఇంటికి రాకపోవడంతో చుట్టుపక్కల ప్రాంతాలు, సమీప గ్రామాలు, బంధువుల ఇళ్ల వద్ద వెతికినా అతని ఆచూకీ లభించలేదు. దీంతో విద్యార్థి తండ్రి చెంచయ్య ఆదివారం రాత్రి కేవీబీపురం పోలీస్ స్టేషన్‌లో ఫిర్యాదు చేయగా, ఎస్ఐ ఓబయ్య కేసు నమోదు చేసి దర్యాప్తు ప్రారంభించినట్లు తెలిపారు. విద్యార్థి ఆచూకీ తెలిసిన వారు పోలీసులకు సమాచారం అందించాలని కోరారు. విద్యార్థి గురించి సమాచారం తెలిసిన వారు ఎస్ఐ సెల్ నంబర్ 9491074520 లేదా తండ్రి చెంచయ్య సెల్ నంబర్ 8639332033 కు సమాచారం అందించాలని పోలీసులు విజ్ఞప్తి చేశారు.