విశాఖపట్నం:
ఇందిరాగాంధీ జూలాజికల్ పార్క్లో భద్రతా లోపాలు మళ్లీ బహిర్గతమయ్యాయి. ఆదివారం ఉదయం జూలోని ప్రహరీ గోడ దాటి ఒక జింకపిల్ల బహిరంగ రోడ్డుపైకి రావడం స్థానికులను, ప్రయాణికులను ఆశ్చర్యపరిచింది. జింకపిల్ల రోడ్డుపై హల్చల్ చేస్తుండగా, అటుగా వెళ్తున్న చాలామంది దృశ్యాలను తమ మొబైల్ ఫోన్లలో చిత్రీకరించి ప్రసార మాధ్యమాలకు పంపించారు.
ప్రహరీ గోడ ధ్వంసం – కంచె పగలగొట్టుకుని బహిరంగ ప్రదేశానికి
జూ పరిధి కంచె పాడై ఉండటమే ఈ ఘటనకు కారణమని ప్రత్యక్ష సాక్షులు చెబుతున్నారు. జూ సిబ్బంది నిర్లక్ష్యం కారణంగానే జంతువులు బయటకు వస్తున్నాయన్న విమర్శలు విస్తృతంగా వినిపిస్తున్నాయి.
“జింక తప్పించుకోవడం చిన్న విషయం కాదు… అందులోనే జూ భద్రత స్థాయి బయటపడింది”
సాధారణ జీవి అయిన జింక బయటకు వచ్చినా పెద్ద ప్రమాదం లేదు కానీ, ఇదే పరిస్థితి చిరుత, పులి, ఎలుగుబంటి వంటి క్రూరమృగాల విషయంలో జరుగితే ప్రజల పరిస్థితి ఏమవుతుంది? అని ప్రత్యక్ష సాక్షులు ప్రశ్నిస్తున్నారు.
జూ భద్రతలో ఉన్న లోపాలు, సిబ్బంది అలక్ష్యం పర్యాటకుల ప్రాణాలను ప్రమాదంలోకి నెట్టే పరిస్థితి ఉందని పలువురు తీవ్ర ఆగ్రహం వ్యక్తం చేస్తున్నారు.
జూ సిబ్బంది నిర్లక్ష్యం స్పష్టంగా కనిపిస్తోంది
జూ పరిధిలో పర్యవేక్షణ, ప్రహరీ గోడల మరమ్మతులు, జంతువుల నిరంతర పరిశీలన వంటి మూలపనులు చేయడంలో సిబ్బంది పూర్తిగా విఫలమయ్యారని విమర్శలు వ్యక్తమవుతున్నాయి. ప్రతి సంవత్సరం భారీగా నిధులు కేటాయించబడుతున్నా, భద్రతా ఏర్పాట్లు మాత్రం నీరసంగా ఉన్నాయని స్థానికులు ఆవేదన వ్యక్తం చేస్తున్నారు.
“ఇప్పటికైనా మేల్కొని కట్టుదిట్టమైన చర్యలు తీసుకోవాలి”
జూ అధికారులపై కఠిన చర్యలు తీసుకోవాలని, ప్రహరీ గోడలు, కంచెలు, సీసీ కెమెరాలు, భద్రతా పర్యవేక్షణ వ్యవస్థను వెంటనే పునరుద్ధరించాలని ప్రజలు డిమాండ్ చేస్తున్నారు.
జంతువుల భద్రత మాత్రమే కాదు… ప్రజల ప్రాణాల భద్రత కూడా జూ అధికారుల బాధ్యతే!
