సేవా సంకల్ప్ అభియాన్‌లో వైద్య శిబిరం అయినవిల్లి మండలం కె.జగన్నాధపురంలో నిర్వహణ

అయినవిల్లి మండలం కె.జగన్నాధపురంలో భారత ప్రధానమంత్రి నరేంద్ర మోదీ జన్మదినోత్సవాన్ని పురస్కరించుకుని నిర్వహిస్తున్న సేవా సంకల్ప్ అభియాన్ కార్యక్రమాల్లో భాగంగా శనివారం వైద్య శిబిరం నిర్వహించారు. ఎం.ఎల్.హెచ్.పి. టి. షారోన్ ఆధ్వర్యంలో నిర్వహించిన ఈ వైద్య శిబిరానికి స్థానిక ప్రజల నుంచి మంచి స్పందన లభించింది. ఈ సందర్భంగా బీజేపీ మండల అధ్యక్షులు యనమదల వెంకటరమణ, జిల్లా ఉపాధ్యక్షులు గనిశెట్టి వెంకటేశ్వరరావు, పీఏసీఎస్ చైర్మన్ నల్లా శ్రీను, ఎస్‌ఎంసీ చైర్మన్ జిలగం శ్రీ సుధ వైద్య శిబిరాన్ని సందర్శించి ఏర్పాట్లను పరిశీలించారు. శిబిరానికి వచ్చిన ప్రజలతో మాట్లాడి వారి ఆరోగ్య సమస్యలను అడిగి తెలుసుకున్నారు. ఈ సందర్భంగా వారు మాట్లాడుతూ, ప్రధానమంత్రి నరేంద్ర మోదీ జన్మదినాన్ని కేవలం వేడుకగా కాకుండా సేవా కార్యక్రమాల ద్వారా ప్రజలకు చేరువయ్యేలా నిర్వహించడం సేవా సంకల్ప్ అభియాన్ ప్రధాన ఉద్దేశమని తెలిపారు. సమాజంలోని ప్రతి వర్గానికి ఆరోగ్య సేవలు అందుబాటులో ఉండేలా ఇటువంటి వైద్య శిబిరాలు నిర్వహించడం అభినందనీయమన్నారు. ప్రజలు తమ ఆరోగ్యం పట్ల నిర్లక్ష్యం చేయకుండా ఎప్పటికప్పుడు ఆరోగ్య పరీక్షలు చేయించుకోవాలని సూచించారు. ముఖ్యంగా రక్తపోటు, మధుమేహం, రక్తహీనత వంటి సమస్యలను ప్రారంభ దశలోనే గుర్తించి తగిన వైద్య సలహాలు, చికిత్స తీసుకోవడం ద్వారా అనేక అనారోగ్య సమస్యలను నియంత్రించవచ్చని పేర్కొన్నారు. గ్రామీణ ప్రాంతాల్లో వైద్య శిబిరాల నిర్వహణ వల్ల ప్రజలకు తమ గ్రామంలోనే ప్రాథమిక ఆరోగ్య పరీక్షలు, వైద్యుల సూచనలు పొందే అవకాశం కలుగుతుందని తెలిపారు. ప్రజలకు ఆరోగ్యంపై అవగాహన కల్పించడంతో పాటు అవసరమైన వారికి మెరుగైన వైద్య సేవలు అందేలా సంబంధిత వైద్య సిబ్బంది సహకరించాలని కోరారు. ప్రధాని మోదీ సేవా స్ఫూర్తితో సేవ, ఆరోగ్యం, ప్రజా సంక్షేమం అనే లక్ష్యాలతో బీజేపీ ఆధ్వర్యంలో మరిన్ని సేవా కార్యక్రమాలు నిర్వహించనున్నట్లు వారు తెలిపారు. ప్రజలకు ఉపయోగపడే కార్యక్రమాలకు స్థానిక ప్రజలు కూడా సహకరించాలని పిలుపునిచ్చారు.
అనంతరం వెలువలపల్లి లో డాక్టర్ సంతోష్, ఎం.ఎల్.హెచ్.పి శైలజ ఆద్వర్యంలో జరిగిన వైద్య శిబిరం లో యనమదల వెంకటరమణ, గనిశెట్టి వెంకటేశ్వరరావు పాల్గొని పరిశీలించారు. అనంతరం అదే గ్రామంలో ఉన్న అంగన్వాడీ కేంద్రాన్ని సందర్శించి, గర్భిణీ స్త్రీలకు పౌష్టికాహార కిట్లను పంపిణీ చేశారు.
ఈ వైద్య శిబిరాలలో ప్రజలకు ఆరోగ్య పరీక్షలు నిర్వహించి, అవసరమైన వైద్య సూచనలు అందించారు. ఈ కార్యక్రమంలో హెల్త్ సూపర్వైజర్ ముద్రగడ చంటి, గొలకోటి కృష్ణారావు, స్థానిక నాయకులు, కార్యకర్తలు, వైద్య సిబ్బంది, గ్రామ ప్రజలు పాల్గొన్నారు.