రేపటి నుంచే అంగన్‌వాడీ పోస్టులకు దరఖాస్తుల స్వీకరణ: ఐసీడీఎస్ సీడీపీఓ శాంతిదుర్గ వెల్లడి

శ్రీకాళహస్తి, తొట్టంబేడు మండలాల్లోని వివిధ అంగన్‌వాడీ కేంద్రాల్లో ఖాళీగా ఉన్న సహాయక (హెల్పర్) పోస్టుల భర్తీకి ప్రభుత్వం ఉత్తర్వులు జారీ చేసినట్లు శ్రీకాళహస్తి ఐసీడీఎస్ (ICDS) సీడీపీఓ బి. శాంతిదుర్గ ఒక ప్రకటనలో తెలిపారు. మొత్తం 36 అంగన్‌వాడీ కేంద్రాల్లో ఈ నియామకాలు జరగనున్నాయని, అర్హులైన స్థానిక మహిళా అభ్యర్థులు ఈ అవకాశాన్ని సద్వినియోగం చేసుకోవాలని కోరారు. దరఖాస్తు తేదీలు: ఈ నెల 6వ తేదీ (సోమవారం) నుండి 15 రోజుల పాటు దరఖాస్తులు స్వీకరించబడతాయి. వయస్సు: 01.07.2026 నాటికి అభ్యర్థుల వయస్సు 21 ఏళ్ల నుండి 35 ఏళ్ల లోపు ఉండాలి. నిబంధనలు: ఎస్సీ, ఎస్టీ హ్యాబిటేషన్లలోని కేంద్రాలకు సంబంధిత సామాజిక వర్గ అభ్యర్థులు మాత్రమే దరఖాస్తు చేసుకోవాలి. అభ్యర్థులు తప్పనిసరిగా స్థానికులై ఉండాలి. ఆసక్తి గల అభ్యర్థులు సంబంధిత ఐసీడీఎస్ ప్రాజెక్ట్ కార్యాలయం నుండి దరఖాస్తు ఫారాలను పొంది, వాటితో పాటు క్రింది ధృవీకరణ పత్రాలను జతచేయాలి. 1. పదవ తరగతి మార్కుల మెమో. కుల ధృవీకరణ పత్రం (SC/ST/BC అయితే). 2. నివాస ధృవీకరణ పత్రం. 3. పుట్టిన తేదీ ధృవీకరణ పత్రం.4. ఆధార్ కార్డు నకలు. 5. వికలాంగులైన పక్షంలో సంబంధిత ధృవీకరణ పత్రం. ప్రభుత్వ జి.ఓ. నెం. 13 (26.06.2019) ప్రకారం, అంగన్‌వాడీ కార్యకర్తలకు నెలకు రూ. 11,500/-, సహాయకులకు (హెల్పర్స్) నెలకు రూ. 7,000/- గౌరవ వేతనం చెల్లించబడుతుందని సీడీపీఓ వివరించారు. మరిన్ని వివరాల కోసం అభ్యర్థులు నేరుగా శ్రీకాళహస్తిలోని ఐసీడీఎస్ కార్యాలయాన్ని సంప్రదించవచ్చని ఆమె సూచించారు.