వేదమంత్రాల నడుమ అత్యంత వైభవంగా ముక్కంటి ధ్వజారోహణం

శ్రీకాళహస్తి పున్నమి టెంపుల్ న్యూస్, ఫిబ్రవరి 11: శ్రీకాళహస్తీశ్వర స్వామి వారి బ్రహ్మోత్సవాలు భక్తిశ్రద్ధలతో ఘనంగా ప్రారంభమయ్యాయి. ఉత్సవాల్లో భాగంగా ఆలయ ప్రాంగణంలో నిర్వహించిన ధ్వజారోహణ కార్యక్రమం బుదవారం నాడు అత్యంత వైభవంగా నిర్వహించారు. వేద మంత్రోచ్ఛారణల నడుమ ఆలయ పండితులు సంప్రదాయ పద్ధతుల్లో ధ్వజారోహణం నిర్వహించగా, భక్తులు “ఓం నమః శివాయ” నినాదాలతో ఆలయాన్ని మార్మోగించడంతో బ్రహ్మోత్సవాలకు శ్రీకారం చుట్టారు. ప్రతిరోజూ ఉదయం, సాయంత్రం వేళల్లో స్వామివారికి ప్రత్యేక పూజలు, అభిషేకాలు, వాహన సేవలు నిర్వహించనున్నట్లు, ఉత్సవాల సందర్భంగా భక్తులకు ఎలాంటి ఇబ్బందులు తలెత్తకుండా ఆలయ సిబ్బంది ప్రత్యేక ఏర్పాట్లు చేసింది. భద్రతా చర్యలు పటిష్టం చేయడంతో పాటు తాగునీరు, ప్రసాద వితరణ, దర్శన సౌకర్యాలపై ప్రత్యేక శ్రద్ధ తీసుకోవడం జరిగినది. ఇప్పటికే పలు ప్రాంతాల నుంచి పెద్ద సంఖ్యలో భక్తులు శ్రీకాళహస్తికి తరలివస్తుండటంతో ఆలయం భక్తి వాతావరణంతో కళకళలాడుతోంది. ఈ బ్రహ్మోత్సవాలు భక్తులకు ఆధ్యాత్మిక ఆనందాన్ని అందించడమే కాకుండా శ్రీకాళహస్తి ప్రాంతానికి ప్రత్యేక శోభను తీసుకువస్తున్నాయని భక్తులు ఆనందం వ్యక్తం చేస్తున్నారు.