మీ ఇంటికి – మీ డాక్టర్” ప్రారంభం… తిరుపతిలో రెడ్ క్రాస్ సేవలకు కొత్త దిశ

శ్రీకాళహస్తి, మార్చి 26 (పున్నమి న్యూస్): ఇండియన్ రెడ్ క్రాస్ సొసైటీ తిరుపతి జిల్లా శాఖ ఆధ్వర్యంలో నూతనంగా చేపట్టిన “మీ ఇంటికి – మీ డాక్టర్” కార్యక్రమాన్ని జిల్లా కలెక్టర్ ఎస్. వెంకటేశ్వర్ లాంఛనంగా ప్రారంభించారు. ఈ సందర్భంగా ఎంపికైన వైద్య సిబ్బందిని ఆయన అభినందించారు. ప్రారంభోత్సవం అనంతరం కలెక్టర్ నూతనంగా ఏర్పాటు చేసిన రక్త నిల్వ కేంద్రాన్ని సందర్శించి, రెడ్ క్రాస్ నూతన కార్యవర్గాన్ని ప్రశంసించారు. అక్టోబర్‌లో బాధ్యతలు స్వీకరించిన తర్వాత కార్యవర్గం ప్రజా సేవల్లో చురుకుదనం చూపుతూ అనేక ప్రయోజనకర కార్యక్రమాలు చేపట్టిందని తెలిపారు. జిల్లా వ్యాప్తంగా రెడ్ క్రాస్ సేవలను విస్తరించి ప్రతి గ్రామానికి చేరేలా చర్యలు తీసుకోవాలని కలెక్టర్ సూచించారు. ఇలాంటి సేవా కార్యక్రమాలకు జిల్లా యంత్రాంగం పూర్తి సహకారం అందిస్తుందని స్పష్టం చేశారు.ఈ సందర్భంగా వైస్ చైర్మన్ డాక్టర్ గుడ్లూరు మయూర్ మాట్లాడుతూ….సమిష్టి కృషితోనే ఇటువంటి సేవా కార్యక్రమాలు సాధ్యమయ్యాయని, సభ్యులందరి సహకారంతో బ్లడ్ బ్యాంక్, “మీ ఇంటికి – మీ డాక్టర్” వంటి కార్యక్రమాలు అమలు చేస్తున్నామని తెలిపారు. ఈ కార్యక్రమంలో రెడ్ క్రాస్ చైర్మన్ డాక్టర్ డి. శ్రీహరి రావు, సెక్రటరీ ప్రతీత్, ట్రెజరర్ జి.వి. సుబ్బారావు, కార్యవర్గ సభ్యులు, ఇతరులు పాల్గొన్నారు.