మనిషిని ఆధ్యాత్మికంగా నడిపించే దివ్య సాధనం యోగా-యోగాచార్యులు మార్కండేయులు

నేటి ఆధునిక కాలంలో మానవ సమాజం ఎదుర్కొంటున్న మానసిక ఒత్తిడి, శారీరక సవాళ్లకు యోగాభ్యాసమే సరైన పరిష్కారమని ప్రముఖ యోగాచార్యులు మార్కండేయులు పిలుపునిచ్చారు. స్వర్గీయ శ్రీశ్రీశ్రీ విద్యాప్రకాశానంద స్వామివారిచే స్థాపించబడిన పవిత్ర శ్రీ శుకబ్రహ్మాశ్రమం వార్షికోత్సవం సందర్భంగా నిర్వహించిన యోగ శిక్షణ శిబిరం శనివారంతో విజయవంతంగా ముగిసింది. ఈ సందర్భంగా పరిచయ శిక్షణ పూర్తి చేసుకున్న అభ్యర్థులకు విద్యా వికాస పరిషత్ తరపున సర్టిఫికేట్లను అందజేశారు. ఈ వేడుకలో యోగాచార్యులు మార్కండేయులు మాట్లాడుతూ.. యోగా అనేది కేవలం వ్యాయామం మాత్రమే కాదని, అది మన ప్రాచీన భారతీయ మనో-శారీరక దివ్య సాధన అని పేర్కొన్నారు. శారీరక భంగిమలు (ఆసనాలు), శ్వాస పద్ధతులు (ప్రాణాయామం), ధ్యానాన్ని నిత్య జీవితంలో భాగం చేసుకోవడం ద్వారా మానసిక ప్రశాంతతతో పాటు ఆధ్యాత్మిక ఉన్నతిని సాధించవచ్చని ఆయన వివరించారు. ప్రతి ఒక్కరూ యోగాను నిత్యకృత్యం చేసుకోవడం ద్వారా మెరుగైన ఆరోగ్యాన్ని పొందవచ్చని సూచించారు. ఈ కార్యక్రమంలో యోగా శిక్షకులు భాస్కర్ నాయుడు, రాజేశ్వరరావు పాల్గొని శిక్షణార్థులకు పలు సూచనలు చేశారు. సర్టిఫికేట్లు అందుకున్న వారిలో యోగాభ్యాసకులు నివేదిత, రేణుశ్రీ సరస్వతీ, మణిదీప్ తదితరులు ఉన్నారు. ఆశ్రమ భక్తులు, యోగా ప్రేమికులు పెద్ద సంఖ్యలో పాల్గొని ఈ కార్యక్రమాన్ని జయప్రదం చేశారు.