పెనుబల్లి మండలం లో బీసీ బంద్ విజయవంతం

పున్నమి ప్రతి నిధి ఖమ్మం జిల్లా పెనుబల్లి మండలంలో బీసీ సంఘాల పిలుపుతో జరిగిన బంద్ ఘనవిజయం సాధించింది. బీజేపీ, తెలంగాణా రాష్ట్ర సమితి (బీఆర్ఎస్), తెలుగు దేశం పార్టీ (టీడీపీ), కాంగ్రెస్, సీపీఏం, ఎంఆర్ఎపీఎస్ వంటి ప్రధాన రాజకీయ పార్టీలు, సామాజిక సంస్థలు బంద్‌కు మద్దతు తెలుపడంతో మండల వ్యాప్తంగా వ్యాపార, వాణిజ్య సంస్థలు, ప్రభుత్వ కార్యాలయాలు మూతపడ్డాయి. బంద్ సందర్భంగా స్థానిక నేతలు ర్యాలీలు, ఆందోళనలు నిర్వహించి బీసీ వర్గాల హక్కుల కోసం రాష్ట్ర ప్రభుత్వం తక్షణ చర్యలు తీసుకోవాలని డిమాండ్ చేశారు. ఈ కార్యక్రమంలో బీజేపీ నాయకుడు బొర్రా నరసింహరావు, బీఆర్ఎస్ నేత చెక్కిళ్లాల మోహన్‌రావు, సీపీఏం నాయకుడు చాలామల విఠల్‌రావు, ఎంఆర్ఎపీఎస్ ప్రతినిధులు కొలికపోగు వెంకటేశ్వరరావు, తోట ప్రసాద్, కాంగ్రెస్ నాయకుడు పంది వెంకటేశ్వరరావు పాల్గొన్నారు. బంద్ పూర్తిగా శాంతియుతంగా సాగింది. ప్రజలు, వ్యాపారవేత్తలు, విద్యార్థులు బీసీ సమాజాల సమస్యలపై ఐక్యతతో స్పందించారు. నేతలు మాట్లాడుతూ, బీసీ వర్గాల రాజకీయ ప్రాధాన్యాన్ని గుర్తించి తగిన ప్రాతినిధ్యం కల్పించకపోతే రాష్ట్రవ్యాప్తంగా మరింత ఉధృతమైన ఉద్యమాలు చేపడతామని హెచ్చరించారు.