చిట్వేల్ జడ్పీ హైస్కూల్లో ఘోర ప్రమాదం తప్పింది – వర్షానికి ప్రహరీ గోడ కూలిపోవడంతో విద్యార్థులు తృటిలో ప్రాణాలతో బయటపడ్డ ఘటన
చిట్వేలి సెప్టెంబర్ 17( పున్నమి ప్రతినిధి)
చిట్వేల్ మండల కేంద్రంలోని జిల్లా పరిషత్ ఉన్నత పాఠశాలలో బుధవారం తెల్లవారుజామున పెద్ద ప్రమాదం తప్పింది. తెల్లవారుజామున కురిసిన వర్షానికి పాఠశాల ప్రహరీ గోడలో ఒక భాగం ఆకస్మికంగా కూలిపోయింది. సాధారణంగా ఆ సమయానికి పాఠశాల ప్రాంగణంలో విద్యార్థులు చేరుకునే అవకాశం ఉన్నప్పటికీ, అదృష్టవశాత్తూ ఘటన జరిగిన సమయంలో అక్కడ ఎవరూ లేకపోవడంతో ఎటువంటి ప్రాణనష్టం జరగలేదు.గోడ ఒక్కసారిగా కూలిపోవడంతో పెద్ద శబ్దం రావటంతో స్థానికులు అక్కడికి చేరుకున్నారు. వెంటనే పాఠశాల సిబ్బందికి సమాచారం అందించగా, వారు సంఘటనా స్థలాన్ని పరిశీలించి విద్యార్థుల భద్రత కోసం వెంటనే చర్యలు తీసుకున్నారు. గ్రామస్థులు, తల్లిదండ్రులు సంఘటనను చూసి తీవ్ర ఆందోళన వ్యక్తం చేశారు. ఇలాంటి సంఘటనలు మళ్లీ జరగకుండా ప్రహరీ గోడ మొత్తాన్ని బలపరిచేలా చర్యలు తీసుకోవాలని వారు డిమాండ్ చేశారు.వర్షాలు కొనసాగుతున్న దృష్ట్యా విద్యార్థుల ప్రాణాలకు ఎలాంటి ప్రమాదం వాటిల్లకుండా సంబంధిత అధికారులు తక్షణమే స్పందించాలని గ్రామస్థులు కోరుతున్నారు. పాఠశాల విద్యార్థుల సంఖ్య ఎక్కువగా ఉండటంతో, వారి భద్రతకు ప్రాధాన్యం ఇవ్వాలని తల్లిదండ్రులు పట్టుబడుతున్నారు. అదృష్టవశాత్తూ ప్రాణాపాయం జరగకపోవడంతో తల్లిదండ్రులు, గ్రామస్థులు ఊపిరి పీల్చుకున్నారు.
