గిరిజన సంక్షేమమే ధ్యేయం-నేషనల్ కమిషన్ చైర్మన్‌కు ఘన స్వాగతం

శ్రీకాళహస్తి, మార్చి 20, పున్నమి న్యూస్: ఆంధ్రప్రదేశ్ రాష్ట్ర గిరిజన సంక్షేమ శాఖ ఆధ్వర్యంలో గురువారం నాడు నెల్లూరు జిల్లా పరిషత్ సమావేశ మందిరంలో గిరిజనుల అభ్యున్నతిపై కీలక సమీక్షా సమావేశం నిర్వహించారు. ఈ కార్యక్రమానికి ముఖ్య అతిథిగా విచ్చేసిన నేషనల్ కమిషన్ ఫర్ షెడ్యూల్డ్ ట్రైబ్స్ (NCST) చైర్పర్సన్ అంతర్ సింగ్ ఆర్యకు అపూర్వ స్వాగతం లభించింది. ఆంధ్రప్రదేశ్ రాష్ట్ర ప్రభుత్వ గిరిజన సలహా మండలి సభ్యులు సుబ్బయ్య చైర్పర్సన్ ఆర్యకు పుష్పగుచ్ఛం అందజేసి ఆత్మీయ స్వాగతం పలికి అనంతరం ఆయనను శాలువాతో ఘనంగా సత్కరించారు. ఈ సందర్భంగా జరిగిన సమావేశంలో గిరిజన ప్రాంతాల్లో అమలవుతున్న సంక్షేమ పథకాలు, విద్య, వైద్య సౌకర్యాల గురించి చర్చించారు. గిరిజనుల హక్కుల రక్షణకు, వారి ఆర్థికాభివృద్ధికి కేంద్ర, రాష్ట్ర ప్రభుత్వాలు సమన్వయంతో కృషి చేయాలని ఈ సందర్భంగా నేతలు అభిప్రాయపడ్డారు. గిరిజన సమస్యలను నేరుగా తెలుసుకునేందుకు చైర్పర్సన్ పర్యటన దోహదపడుతుందని సుబ్బయ్య పేర్కొన్నారు. ఈ కార్యక్రమంలో జిల్లా ఉన్నతాధికారులు, గిరిజన సంక్షేమ శాఖ ప్రతినిధులు మరియు పలువురు ప్రముఖులు పాల్గొన్నారు.