ఇవాళ ఆంధ్రప్రదేశ్‌లో అతిభారీ వర్షాలు! మొంథా తుఫాన్ ప్రభావం తీవ్రత

మొంథా తీవ్ర తుఫాన్ ప్రభావంతో ఆంధ్రప్రదేశ్ రాష్ట్రవ్యాప్తంగా వాతావరణం తీవ్రంగా మారింది. అమరావతి వాతావరణ కేంద్రం హెచ్చరికలు జారీ చేస్తూ, ఇవాళ రాష్ట్రంలోని పలు జిల్లాల్లో భారీ నుంచి అతిభారీ వర్షాలు కురిసే అవకాశం ఉందని తెలిపింది. శ్రీకాకుళం, పార్వతీపురం, విజయనగరం, విశాఖపట్నం, అల్లూరి సీతారామరాజు, అనకాపల్లి, ఏలూరు, NTR, కృష్ణా, గుంటూరు, పల్నాడు, బాపట్ల, నంద్యాల జిల్లాల్లో అతిభారీ వర్షాలు నమోదవుతాయని అంచనా. అలాగే కాకినాడ, డాక్టర్ బి.ఆర్ అంబేద్కర్ కోనసీమ, తూర్పు గోదావరి, పశ్చిమ గోదావరి, ప్రకాశం, కడప, కర్నూలు, అనంతపురం, యానాం ప్రాంతాల్లో కూడా భారీ వానలు కురిసే అవకాశం ఉందని వాతావరణశాఖ తెలిపింది. బలమైన గాలులు, వడగళ్ల వానలు సంభవించే అవకాశం ఉన్నందున ప్రజలు అప్రమత్తంగా ఉండాలని అధికారులు సూచించారు. తుఫాన్ కారణంగా తీర ప్రాంతాల్లో సముద్రం ఉద్ధృతంగా ఉండవచ్చని, మత్స్యకారులు సముద్రయాత్రలకు వెళ్లరాదని హెచ్చరికలు జారీ అయ్యాయి. అత్యవసర పరిస్థితుల్లో మాత్రమే బయటకు రావాలని సూచించారు.