ముత్తుకూరు, (అక్టోబర్ 07పున్నమి ప్రతినిధి):-
ముత్తుకూరు ప్రధాన రహదారి రోజురోజుకీ ప్రమాదాలకు నిలయమవుతోంది. ఇరుకైన రహదారిపై వాహనాల రద్దీ పెరుగుతుండగా, ట్రాఫిక్ నియంత్రణ లేకపోవడంతో ప్రజలు తీవ్ర ఇబ్బందులు ఎదుర్కొంటున్నారు.
పాఠశాల సమయాల్లో రహదారి బిక్కుబిక్కుమంటూ మారుతోంది. విద్యార్థులు, మహిళలు, వృద్ధులు వాహనాల మధ్య నడవడం ప్రాణహానికే సమానమవుతోంది. ద్విచక్ర వాహనాలపై యువత అడ్డదిడ్డంగా తిరుగుతుండగా, భారీ లారీలు, ట్రాక్టర్ల రాకపోకలతో పరిస్థితి మరింత క్లిష్టంగా మారింది.
స్థానికులు ఆవేదన వ్యక్తం చేస్తూ — “ఇక్కడ ప్రతిరోజూ ప్రాణాలు పణంగా పెట్టి రోడ్డు దాటాల్సి వస్తోంది. పలుమార్లు ప్రమాదాలు జరిగినా అధికారులు మాత్రం నిమ్మకునీరెత్తినట్లు వ్యవహరిస్తున్నారు,” అని వాపోతున్నారు.
ప్రజలు డిమాండ్ చేస్తూ —
భారీ వాహనాలను ఊర్లో కాకుండా దారి మళ్లించాలి.
ఆక్రమణలను తొలగించాలి.
పాఠశాలల సమీపంలో ‘నో పార్కింగ్’ బోర్డులు ఏర్పాటు చేయాలి.
ట్రాఫిక్ పోలీసులు క్రమం తప్పకుండా పర్యవేక్షణ చేయాలి అని కోరుతున్నారు.
ముత్తుకూరు రహదారి ప్రజల రవాణా మార్గమే కాదు — వారి జీవనాధారం కూడా.
ఈ నిర్లక్ష్యం కొనసాగితే రహదారి పేరు “ప్రజల ప్రాణాలకు నిలయంగా” మారిపోతుందనే ఆందోళనను ముత్తుకూరు ప్రజలు వ్యక్తం చేస్తున్నారు.