శ్రీకాళహస్తి సమీపంలో పిడుగుపాటుకు రైతు బలి – ఎర్పేడు మండలంలో విషాదం

ఎర్పేడు, ఏప్రిల్ 05 (పున్నమి న్యూస్): ప్రకృతి ప్రకోపానికి ఓ నిరుపేద రైతు బలయ్యాడు. పొలం పనుల కోసం వచ్చిన రైతుపై అకస్మాత్తుగా పిడుగు పడటంతో ఆయన దుర్మరణం చెందారు. ఈ విషాద ఘటన శ్రీకాళహస్తి మండలంలోని కోట గ్రామంలో చోటుచేసుకుంది. స్థానికులు తెలిపిన వివరాల ప్రకారం.. ఎర్పేడు మండలం పరమరపల్లి గ్రామానికి చెందిన వి. కామరాజు (రైతు) వ్యవసాయ పనుల నిమిత్తం శ్రీకాళహస్తి మండలం కలవగుంట పంచాయతీ పరిధిలోని కోట గ్రామానికి వచ్చారు. పొలంలో పని చేసుకుంటుండగా, ఒక్కసారిగా వాతావరణం మారి భారీ శబ్దంతో ఆయనపై పిడుగు పడింది. ఈ ప్రమాదంలో తీవ్రంగా గాయపడిన కామరాజును గమనించిన తోటి రైతులు, స్థానికులు వెంటనే స్పందించి శ్రీకాళహస్తి ప్రభుత్వ ఆసుపత్రికి తరలించే ప్రయత్నం చేశారు. అయితే, గాయాల తీవ్రత ఎక్కువగా ఉండటంతో ఆసుపత్రికి చేరుకోకముందే మార్గమధ్యంలోనే ఆయన ప్రాణాలు కోల్పోయారు. కష్టపడి పనిచేస్తూ కుటుంబాన్ని పోషించుకునే కామరాజు అకాల మరణంతో పరమరపల్లి గ్రామంలో విషాద ఛాయలు అలుముకున్నాయి. సమాచారం అందుకున్న పోలీసులు కేసు నమోదు చేసుకుని దర్యాప్తు చేస్తున్నారు. కామరాజు మృతి పట్ల స్థానిక నాయకులు, గ్రామస్థులు తమ ప్రగాఢ సానుభూతిని తెలియజేశారు.