శ్రీకాళహస్తిలో భారీగా అక్రమ గ్యాస్ సిలిండర్ల నిల్వలు గుర్తింపు.. విజిలెన్స్ దాడుల్లో బట్టబయలు!

శ్రీకాళహస్తి, మార్చి 20, పున్నమి ప్రతినిధి: శ్రీకాళహస్తి పట్టణంలో నిబంధనలకు విరుద్ధంగా సాగుతున్న గ్యాస్ సిలిండర్ల దందాను విజిలెన్స్ అధికారులు రట్టు చేశారు. జిల్లా విజిలెన్స్ ఎస్పీ ఆదేశాల మేరకు గురువారం విజిలెన్స్ అధికారి సి.ఐ. చంద్రశేఖర్ ఆధ్వర్యంలో రెవెన్యూ, పోలీసు సిబ్బంది సంయుక్తంగా పట్టణంలోని పలు ప్రాంతాల్లో ఆకస్మిక తనిఖీలు నిర్వహించారు. తనిఖీల్లో భాగంగా బైపాస్ రోడ్డు సమీపంలోని ఒక ప్రైవేట్ దుకాణంపై అధికారులు మెరుపు దాడి చేశారు. ఈ క్రమంలో అక్కడ ఎటువంటి అనుమతులు లేకుండా, అత్యంత ప్రమాదకర రీతిలో నిల్వ ఉంచిన భారీ సంఖ్యలోని గ్యాస్ సిలిండర్లను చూసి అధికారులు ఒక్కసారిగా ఆశ్చర్యానికి గురయ్యారు. నివాస ప్రాంతాలకు సమీపంలో ఇంత పెద్ద మొత్తంలో గ్యాస్ నిల్వలు ఉంచడం వల్ల ఏదైనా ప్రమాదం జరిగితే భారీ ప్రాణ, ఆస్తి నష్టం సంభవించే అవకాశం ఉందని అధికారులు ఆందోళన వ్యక్తం చేశారు. ఈ సందర్భంగా విజిలెన్స్ సి.ఐ. చంద్రశేఖర్ మాట్లాడుతూ.. నాగరాని అనే మహిళా అక్రమంగా గ్యాస్ సిలిండర్లను నిల్వ ఉంచడం, బ్లాక్ మార్కెట్‌కు తరలించడం ఇటువంటి పనులు చేస్తుందని ఇవి చట్టరీత్యా నేరమని హెచ్చరించారు. పట్టుబడిన సిలిండర్లను స్వాధీనం చేసుకున్నామని, నిబంధనలు ఉల్లంఘించిన సదరు దుకాణ యజమానిపై కఠినమైన సెక్షన్ల కింద కేసులు నమోదు చేసి తదుపరి చర్యలు తీసుకుంటామని స్పష్టం చేశారు. ప్రజల భద్రతతో ఆడుకునే ఇలాంటి అక్రమ వ్యాపారాలపై తనిఖీలు నిరంతరం కొనసాగుతాయని ఆయన పేర్కొన్నారు.