మార్కాపురం సమీపంలో ఘోర బస్సు ప్రమాదం… నాయుడుపల్లిలో విషాదం, బాధిత కుటుంబానికి ఆర్థిక సహాయం

మార్కాపురం సమీపంలో ఇటీవల జరిగిన ఘోర బస్సు ప్రమాదంలో ప్రాణాలు కోల్పోయిన గొల్లపల్లి వెంకటేశ్వర్లు గారి మృతదేహం స్వగ్రామమైన నాయుడుపల్లికి చేరుకోవడంతో గ్రామం మొత్తం శోకసంద్రంలో మునిగిపోయింది. కుటుంబ సభ్యులు, బంధువుల రోదనలు గ్రామంలో హృదయ విదారక వాతావరణాన్ని సృష్టించాయి.
మృతుడికి గ్రామస్తులు, ప్రజాప్రతినిధులు ఘనంగా నివాళులు అర్పించారు. ఈ దుర్ఘటన పట్ల స్థానికులు తీవ్ర దిగ్భ్రాంతి వ్యక్తం చేస్తూ, కుటుంబానికి తమ ప్రగాఢ సానుభూతిని తెలియజేశారు.
ఉదయగిరి ఎమ్మెల్యే కాకర్ల సురేష్ గారి ఆదేశాల మేరకు కాకర్ల చారిటబుల్ ట్రస్ట్ తరఫున బాధిత కుటుంబానికి ఆర్థిక సహాయం అందజేయడం జరిగింది. ఈ సందర్భంగా నాయకులు మాట్లాడుతూ, ఈ క్లిష్ట సమయంలో కుటుంబానికి అండగా నిలుస్తామని, ప్రభుత్వం తరఫున కూడా అన్ని విధాలుగా సహాయం అందేలా చర్యలు తీసుకుంటామని భరోసా ఇచ్చారు.
ఈ ప్రమాదం మరోసారి రోడ్డు భద్రతపై ప్రశ్నలు లేవనెత్తుతుండగా, ఇలాంటి ఘటనలు పునరావృతం కాకుండా కట్టుదిట్టమైన చర్యలు తీసుకోవాలని ప్రజలు కోరుతున్నారు.