మహిళా విద్యార్థినులకు ఆత్మరక్షణలో నైపుణ్యం – శ్రీకాళహస్తిలో శిక్షణ ఘన ముగింపు

శ్రీకాళహస్తి పట్టణంలోని ప్రభుత్వ మహిళా డిగ్రీ కళాశాలలో గత 40 రోజులుగా నిర్వహించిన పీఎం ఉషా సాఫ్ట్ కాంపోనెంట్స్‌లో భాగమైన బాలికల స్వీయ రక్షణ శిక్షణ కార్యక్రమం మంగళవారం విజయవంతంగా ముగిసింది. విద్యార్థినుల్లో ఆత్మరక్షణ నైపుణ్యాలను పెంపొందించేందుకు నిర్వహించిన ఈ శిక్షణకు విశేష స్పందన లభించింది. ముగింపు సందర్భంగా నిర్వహించిన బెల్ట్ టెస్ట్‌లో విద్యార్థినులు ప్రతిభ కనబరచగా, ఇద్దరికి గ్రీన్ బెల్ట్‌లు, ఎనిమిది మందికి ఆరెంజ్ బెల్ట్‌లు, మిగిలిన వారికి యెల్లో బెల్ట్‌లు మరియు ప్రశంస పత్రాలు అందజేశారు. ఈ సందర్భంగా కళాశాల ప్రిన్సిపల్ డా. బి. రాజశేఖర్ మాట్లాడుతూ…ప్రస్తుత కాలంలో ప్రతి విద్యార్థిని ఆత్మరక్షణ నైపుణ్యాలు నేర్చుకోవడం అత్యవసరమని, ఇవి ధైర్యం, ఆత్మవిశ్వాసాన్ని పెంపొందిస్తాయని పేర్కొన్నారు. కార్యక్రమాన్ని ఫిజికల్ డైరెక్టర్ నరసింహరావు సమన్వయం చేయగా, రవి మాస్టర్, సరిత మాస్టర్ శిక్షణ అందించారు. పీఎం ఉషా కోఆర్డినేటర్ వీ.కే. దీనదయాల్, నర్రా లక్ష్మీతో పాటు అధ్యాపక బృందం పాల్గొన్నారు.