ప్రేమించి పెళ్లి చేసుకున్న భర్తే చంపుతానని బెదిరిస్తున్నాడు.

04-06-2020 బుచ్చిరెడ్డిపాలెం (పున్నమి విలేఖరి – జి.పి.ప్రవీణ్) బుచ్చిరెడ్డిపాలెం మండలం లోని కాగులపాడు గ్రామంలోని జె.అనిత అనే ఒక వివాహిత తన భర్త సుకుమార్ తనను చంపుతానని బెదిరిస్తున్నాడని బుచ్చిరెడ్డిపాలెం పోలీస్ స్టేషన్లో ఫిర్యాదు చేయడం జరిగింది. వివరాల్లోకి వెళితే ఒకే గ్రామానికి చెందిన సుకుమార్ అనితకు 2013లో ఒకరికొకరు పరిచయం ఏర్పడి ఆ పరిచయం కాస్త ప్రేమగా మారి 2017లో ప్రేమ వివాహం చేసుకున్నారు. సుకుమార్ తల్లిదండ్రులు ఈ ప్రేమ వివాహాన్ని అంగీకరించలేదు. ఈ నేపధ్యంలో అనిత వాళ్ళ ఇంటికి వెళ్లారు. కానీ వెళ్లిన రోజు నుండి సుకుమార్ ప్రవర్తనలో మార్పు వచ్చిందని, తమను ఐదు లక్షలు కట్నం తీసుకురమ్మని తరచూ వేధించేవాడని బాదితురాలు ఫిర్యాదులో పేర్కొన్నారు. ఈనేపథ్యంలో ఇరువురు పోలీసు కేసులు పెట్టుకోవడం జరిగింది. ఈ కేసులు కోర్టులో నడుస్తూ ఉన్న నేపథ్యంలో సుకుమార్ మళ్లీ తన దగ్గరకు వచ్చి నువ్వంటే నాకు ఇష్టం నీ దగ్గర ఉండడం మా తల్లిదండ్రులకు ఇష్టం లేదని అన్నాడని, అప్పటి నుండి మాఇంటికి వచ్చి వెళ్ళేవాడని బాధితురాలు చెప్పడం జరిగింది. అలా కొద్ది రోజులు జరిగిన తర్వాత ఇప్పుడు బాధితురాలు గర్భవతి కావడంతో సుకుమార్ నువ్వు ఎవరో నాకు తెలియదు అంటున్నాడని, అంతేకాకుండా నన్ను నా కడుపులోని బిడ్డను చంపుతానని బెదిరిస్తున్నాడు అని బాధితురాలు వాపోతుంది. సుకుమార్ తనకు రాజకీయ పలుకుబడి ఉండడంతో నన్ను చంపుతాడని భయంగా ఉంది. కాబట్టి పోలీసు వారు నాకు ప్రాణ రక్షణ కల్పించాలని కోరుకుంటున్నానని బాధితురాలు అన్నారు.