అసెంబ్లీ గ్యాలరీలో ద స్కూల్ విద్యార్థుల సందడి ప్రత్యక్షంగా బడ్జెట్ వీక్షణ

శ్రీకాళహస్తి పున్నమి న్యూస్, ఫిబ్రవరి 14:శ్రీకాళహస్తి పట్టణంలోని ద స్కూల్ విద్యార్థులు పుస్తకాల్లో చదువుకున్న చట్టసభల పనితీరును శనివారం నాడు ప్రత్యక్షంగా వీక్షించారు. రాష్ట్ర బడ్జెట్ ప్రవేశపెట్టిన సందర్భంగా, అసెంబ్లీ గ్యాలరీ నుండి ఈ చారిత్రాత్మక ఘట్టాన్ని చూసే అరుదైన అవకాశాన్ని పాఠశాల విద్యార్థులు దక్కించుకున్నారు. ఈ సందర్భంగా పాఠశాల కరెస్పాండెంట్ జనార్దన్ రావు మాట్లాడుతూ.. విద్యార్థులు కేవలం పాఠ్యపుస్తకాలకే పరిమితం కాకుండా, సమాజంపై అవగాహన పెంచుకోవాలనే ఉద్దేశంతో ఈ పర్యటన ఏర్పాటు చేసినట్లు తెలిపారు. శాసనసభలో బడ్జెట్ ప్రవేశపెట్టే విధానాన్ని, సభా మర్యాదలను విద్యార్థులు నేరుగా చూసి ఎంతో నేర్చుకున్నారని ఆయన పేర్కొన్నారు. ప్రభుత్వం విద్యార్థులకు ఇలాంటి ప్రత్యక్ష వీక్షణ అవకాశాలు కల్పించడం శుభపరిణామమని కొనియాడారు. అసెంబ్లీ గ్యాలరీలో కూర్చుని బడ్జెట్ సమావేశాలను చూడటం ఒక గొప్ప మరపురాని అనుభూతిని ఇచ్చిందని టీవీల్లో చూసే దానికంటే నేరుగా చూడటం వల్ల చట్టసభల ప్రాముఖ్యత మాకు అర్థమైందని విద్యార్థులు సంతోషం వ్యక్తం చేశారు. తమకు ఈ అద్భుతమైన అవకాశం కల్పించిన పాఠశాల యాజమాన్యానికి వారు ప్రత్యేక కృతజ్ఞతలు తెలిపారు.