అధికారుల నిర్లక్ష్యంతో పెరుగుతున్న అక్రమ నిర్మాణాలు..!
ప్రజల్లో ఆందోళన.. నిబంధనలు ఎక్కడ..?
అధికారుల మౌనంతో అక్రమ నిర్మాణాల జోరు..!
అనుమతుల్లేకుండానే ఆకాశాన్ని తాకుతున్న భవనాలు..!
పున్నమి న్యూస్ ప్రతినిధి
09జూన్ 2026
రంగారెడ్డి జిల్లా ఇబ్రహీంపట్నం నియోజకవర్గం ఇంచార్జ్ :
రంగారెడ్డి జిల్లా పరిధిలోని పలు ప్రాంతాల్లో అక్రమ నిర్మాణాలు రోజురోజుకు పెరుగుతుండటంపై స్థానిక ప్రజలు తీవ్ర ఆందోళన వ్యక్తం చేస్తున్నారు. ముఖ్యంగా మంగళపల్లి, తుర్కయంజాల్, ఇబ్రహీంపట్నం, బొంగుళూరు యాచారం, ఆదిభట్ల ప్రాంతాల్లో అనుమతులు లేకుండా భారీ భవన నిర్మాణాలు కొనసాగుతున్నాయని ఆరోపణలు వినిపిస్తున్నాయి. సంబంధిత శాఖల అనుమతులు లేకుండానే బహుళ అంతస్తుల భవనాలు నిర్మిస్తున్నప్పటికీ అధికారులు పట్టించుకోవడం లేదని స్థానికులు మండిపడుతున్నారు.
కొన్ని ప్రాంతాల్లో నివాస ప్రాంతాల మధ్యే వాణిజ్య సముదాయాలు నిర్మిస్తుండటంతో ట్రాఫిక్ సమస్యలు, పార్కింగ్ ఇబ్బందులు, భద్రతా సమస్యలు పెరుగుతున్నాయని ప్రజలు చెబుతున్నారు. ముఖ్యంగా నిర్మాణ సమయంలో పాటించాల్సిన భద్రతా ప్రమాణాలు ఎక్కడా కనిపించడం లేదని, కార్మికుల ప్రాణాలు సైతం ప్రమాదంలో పడుతున్నాయని ఆరోపిస్తున్నారు.
అనుమతులు లేని నిర్మాణాల వల్ల ప్రభుత్వానికి భారీగా ఆదాయ నష్టం జరుగుతోందని స్థానిక మేధావులు అభిప్రాయపడుతున్నారు. బిల్డింగ్ పర్మిషన్ ఫీజులు, పన్నులు, ఇతర రుసుములు చెల్లించకుండా అక్రమంగా నిర్మాణాలు చేపట్టడం వల్ల ప్రభుత్వ ఖజానాకు కోట్ల రూపాయల నష్టం వాటిల్లుతోందని పేర్కొంటున్నారు.
కొన్ని నిర్మాణాలు నాలుగు నుంచి ఐదు అంతస్తుల వరకు నిర్మాణ దశలో ఉన్నప్పటికీ అధికారులు ఇప్పటివరకు ఎలాంటి చర్యలు తీసుకోకపోవడం అనుమానాలకు తావిస్తోంది. ప్రజలు పలుమార్లు ఫిర్యాదులు చేసినప్పటికీ స్పందన లేకపోవడం పట్ల తీవ్ర అసంతృప్తి వ్యక్తం చేస్తున్నారు.
ఇదిలా ఉండగా నిర్మాణాల చుట్టూ సరైన రక్షణ ఏర్పాట్లు లేకపోవడంతో స్థానికులకు ఇబ్బందులు ఎదురవుతున్నాయి. రోడ్లపై నిర్మాణ సామగ్రి వేయడం వల్ల రాకపోకలకు ఆటంకం కలుగుతోంది. వర్షాకాలంలో మట్టి, చెత్త రోడ్లపై పేరుకుపోవడంతో ప్రమాదాలు జరిగే అవకాశాలు ఉన్నాయని ప్రజలు ఆందోళన చెందుతున్నారు.
ప్రభుత్వ నిబంధనలను ఉల్లంఘిస్తూ నిర్మాణాలు జరుగుతున్నా సంబంధిత అధికారులు చూసీ చూడనట్టుగా వ్యవహరిస్తున్నారని ప్రజలు విమర్శిస్తున్నారు. అక్రమ నిర్మాణాలకు రాజకీయ అండ ఉందా..? లేక అధికారుల నిర్లక్ష్యమా..? అనే ప్రశ్నలు ఇప్పుడు స్థానికంగా చర్చనీయాంశమయ్యాయి.
ఇప్పటికైనా అధికారులు స్పందించి అక్రమ నిర్మాణాలపై సమగ్ర విచారణ చేపట్టి, నిబంధనలు ఉల్లంఘించిన వారిపై కఠిన చర్యలు తీసుకోవాలని ప్రజలు డిమాండ్ చేస్తున్నారు. అలాగే భవిష్యత్తులో ఇటువంటి అక్రమ నిర్మాణాలు జరగకుండా కట్టుదిట్టమైన పర్యవేక్షణ వ్యవస్థ ఏర్పాటు చేయాలని కోరుతున్నారు.
