కోవూరు షుగర్ ఫ్యాక్టరీను పునరుద్ధరించాలి
అఖిలపక్ష రైతు సంఘాల రౌండ్ టేబుల్ డిమాండ్
కోవూరు షుగర్ ఫ్యాక్టరీను అమ్మకుండా, తక్షణమే పునరుద్ధరించాలని అఖిలపక్ష రైతు సంఘాలు డిమాండ్ చేశాయి. ఈ నెల 21న, ఆదివారం ఉదయం 11 గంటలకు నెల్లూరు డాక్టర్ జేఎస్ ట్రస్ట్‌లో జరిగిన రౌండ్ టేబుల్ సమావేశంలో ఈ తీర్మానం వెలువడింది. చెరుకు రైతుల సంఘం జిల్లా కార్యదర్శి గండవరపు శ్రీనివాసులరి అధ్యక్షతన ఈ సమావేశం నిర్వహించబడింది.
124 ఎకరాల విలువైన భూమిని కలిగి ఉన్న ఈ ఫ్యాక్టరీను, చౌకగా రియల్ ఎస్టేట్ వ్యాపారులకు అప్పగించాలన్న ప్రభుత్వ యత్నాలను వెంటనే ఆపాలని సమావేశంలో పాల్గొన్నవారు డిమాండ్ చేశారు. 15 మండలాల్లోని 4 వేల పైగా చెరుకు రైతు కుటుంబాలు, ఈ ఫ్యాక్టరీ ద్వారా ఆధారపడ్డాయి. అలాగే వేలాది మంది కార్మికులు, కూలీలు జీవనోపాధిని పొందారు.
పాలక వర్గాల పాలనా వైఫల్యం కారణంగా ఫ్యాక్టరీ మూత పడినప్పటికీ, ఇప్పుడు తిరిగి ప్రారంభిస్తే 3 నియోజకవర్గాలలోని 10 వేల పైగా కుటుంబాలకు లాభం చేకూరుతుంది. నిరుద్యోగ యువతకు ఉద్యోగ అవకాశాలు కలుగుతాయని స్పష్టం చేశారు. ముఖ్యమంత్రి ఎన్నికల సమయంలో ఫ్యాక్టరీని తెరిచే హామీ ఇచ్చిన విషయాన్ని గుర్తు చేశారు.
ఈ సమావేశంలో రైతు నాయకులు యర్రం రెడ్డి, గోవర్ధన రెడ్డి, ఏవి రమణయ్య నాయుడు, హనుమంతరావు, చంద్ర రాజగోపాల్, ములి వెంగయ్య, జొన్నలగడ్డ వెంకటరాజు, బిళ్ళా రఘురామయ్య, ఏటూరు శ్రీనివాసుల రెడ్డి, గండవరపు శేషయ్య, పి. మల్లికార్జున, పి. శ్రీరాములు తదితరులు పాల్గొన్నారు.
