హైదరాబాద్, సెప్టెంబర్ 24:
ఆయుర్వేద వైద్య విధానం యొక్క ప్రాధాన్యతను ప్రజలకు తెలియజేయడంతో పాటు, ఆరోగ్య పరిరక్షణ, వ్యాధుల నివారణ మరియు ఆరోగ్యకరమైన జీవనశైలిపై అవగాహన కల్పించే లక్ష్యంతో 11వ ఆయుర్వేద దినోత్సవ వేడుకలను సెప్టెంబర్ 23న హైదరాబాద్ ఎర్రగడ్డలోని డా. బి.ఆర్.కె.ఆర్. ప్రభుత్వ ఆయుర్వేద వైద్య కళాశాల మరియు ఆసుపత్రిలో ఘనంగా నిర్వహించారు.
“ఆరోగ్యకరమైన భవిష్యత్తు కోసం ఆయుర్వేదం” అనే ప్రధాన సందేశంతో నిర్వహించిన ఈ వేడుకల్లో ఆయుర్వేద వైద్య విధానం ద్వారా ఆరోగ్యాన్ని కాపాడుకోవడం, వ్యాధులను ముందుగానే నివారించడం, ప్రకృతి ఆధారిత జీవన విధానాన్ని అలవర్చుకోవడం వంటి అంశాలపై అవగాహన కల్పించారు. సంప్రదాయ ఆయుర్వేద విజ్ఞానాన్ని ఆధునిక ఆరోగ్య అవసరాలతో అనుసంధానం చేస్తూ ప్రజల్లో ఆయుర్వేదంపై మరింత అవగాహన పెంపొందించేందుకు కార్యక్రమాలు నిర్వహించారు.
ఈ కార్యక్రమానికి జూబ్లీహిల్స్ నియోజకవర్గ ఎమ్మెల్యే శ్రీ వి. నవీన్ యాదవ్ ముఖ్య అతిథిగా హాజరయ్యారు. ఆయుష్ శాఖ డైరెక్టర్ శ్రీమతి ఐషా మస్రత్ ఖానమ్, ఐ.ఏ.ఎస్., ఆయుష్ శాఖ అదనపు డైరెక్టర్ డా. ఎ. పరమేశ్వర్ నాయక్ ప్రత్యేక అతిథులుగా పాల్గొన్నారు.
కళాశాల ప్రిన్సిపాల్ డా. బి. జోహార్, వైస్ ప్రిన్సిపాల్ డా. ఉమా శ్రీనివాసరావు, అధ్యాపకులు, బోధన సిబ్బంది, వైద్యులు, ఆయుష్ పీజీ విద్యార్థులు, హౌస్ సర్జన్స్, యూజీ విద్యార్థులు ఆయుష్ విద్యార్థులు తదితరులు కార్యక్రమంలో పాల్గొన్నారు.
ఈ సందర్భంగా విద్యార్థులు, హౌస్ సర్జన్స్, పీజీ విద్యార్థులు, వైద్యులు మరియు అధ్యాపకుల భాగస్వామ్యంతో ఆయుర్వేద వైద్య విధానంపై ప్రజలకు అవగాహన కల్పించే కార్యక్రమాలు నిర్వహించారు. ఆరోగ్య పరిరక్షణలో ఆయుర్వేదం అందిస్తున్న సేవలు, వ్యక్తిగత ఆరోగ్యం కోసం అనుసరించాల్సిన ఆరోగ్యకరమైన జీవన విధానాలు, వ్యాధుల నివారణలో ఆయుర్వేదం ప్రాధాన్యత వంటి అంశాలను ప్రజలకు వివరించారు.
ఆయుర్వేదం కేవలం వ్యాధులకు చికిత్స అందించే విధానం మాత్రమే కాకుండా, ఆరోగ్యవంతమైన వ్యక్తి ఆరోగ్యాన్ని కాపాడుకోవడం, వ్యాధులు రాకుండా ముందస్తు జాగ్రత్తలు తీసుకోవడం, సమతుల్యమైన జీవనశైలిని పాటించడం వంటి అంశాలకు ప్రాధాన్యతనిస్తుందని కార్యక్రమంలో వివరించారు.
విద్యార్థులు, వైద్యులు మరియు అధ్యాపకులు ఉత్సాహంగా పాల్గొనడంతో కళాశాల ప్రాంగణంలో ఆయుర్వేద దినోత్సవ వేడుకలు సందడిగా జరిగాయి. ప్రజలకు ఆయుర్వేద వైద్య విధానం పట్ల అవగాహన పెంపొందించి, ఆరోగ్యకరమైన జీవనశైలి వైపు ప్రోత్సహించడమే ఈ కార్యక్రమాల ప్రధాన ఉద్దేశ్యమని నిర్వాహకులు తెలిపారు.
